ಅಶೋಕ ನಗರ ರಸ್ತೆಗೆ ಮತ್ತೆ ಕಂಟಕ ಆರಂಭ

Team Udayavani, May 20, 2019, 12:23 PM IST

ಕೆಜಿಎಫ್ ಅಶೋಕನಗರದ ರಸ್ತೆಯಲ್ಲಿ ಅರ್ಧ ಒಡೆದ ಕಟ್ಟಡಗಳ ಅವಶೇಷಗಳು.

ಕೆಜಿಎಫ್: ಹಲವು ವರ್ಷಗಳಿಂದ ರಸ್ತೆ ಅಗಲೀಕರಣವಾಗಬೇಕಾಗಿದ್ದ ಅಶೋಕ ನಗರ ರಸ್ತೆಗೆ ಮತ್ತೆ ಕಂಟಕ ಶುರುವಾಗಿದೆ. ಸ್ಕೂಲ್ ಆಫ್ ಮೈನ್ಸ್‌ನಿಂದ ಎಂ.ಜಿ.ವೃತ್ತದವರೆಗೂ ಜೋಡಿ ರಸ್ತೆ ಕಾಮಗಾರಿಗೆ ಚಾಲನೆ ನೀಡಲಾಗಿದ್ದು, ಆಸ್ತಿ ಕಳೆದುಕೊಳ್ಳುವವರಲ್ಲಿ ನಡುಕ ಹುಟ್ಟಿದೆ.

ಅಶೋಕ ನಗರದಿಂದ ಎಂ.ಜಿ.ರಸ್ತೆ ಅಭಿವೃದ್ಧಿಗೆ 2013-14ರಲ್ಲಿ 3 ಕೋಟಿ ರೂ. ಮಂಜೂರಾಗಿತ್ತು. ರಸ್ತೆ ಅಗಲೀಕರಣಕ್ಕಾಗಿ ಎರಡೂ ಬದಿಯಲ್ಲಿರುವ ಮನೆಗಳನ್ನು ಲೋಕೋಪಯೋಗಿ ಇಲಾಖೆ ತೆರವುಗೊಳಿಸಿತ್ತು. ಆದರೆ, ಬಡವರ ಮನೆಗಳನ್ನು ತೆರವುಗೊಳಿಸಲು ತೋರಿದ ತಾಕತ್ತನ್ನು ಬಲಾಡ್ಯರ ಮತ್ತು ಹಣವಂತರ ಬಳಿ ತೋರದ ಕಾರಣ, ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿ. ರಸ್ತೆ ಅಗಲೀಕರಣ ನನೆಗುದಿಗೆ ಬಿದ್ದಿದೆ.

ರಸ್ತೆ ಬದಿಯಲ್ಲಿರುವ ಕೆಲವು ವರ್ತಕರು ಹೈಕೋರ್ಟ್‌ ಮೆಟ್ಟಿಲೇರಿ, ನಾವುಗಳು ನಗರಸಭೆಯಿಂದ ಎಲ್ಲಾ ದಾಖಲೆಗಳು ಹೊಂದಿದ್ದೇವೆ. ನಮಗೆ ಸೂಕ್ತ ಪರಿಹಾರ ನೀಡದೆ ತೆರವುಗೊಳಿಸಲು ಆಗುವುದಿಲ್ಲ ಎಂಬ ವಾದವನ್ನು ಮಂಡಿಸಿದ್ದರು. ಹಲವು ವರ್ತಕರು ಸದರಿ ರಸ್ತೆ ರಾಜ್ಯದ ಮುಖ್ಯರಸ್ತೆ ಅಲ್ಲ. ಪಕ್ಕದ ರಸ್ತೆಯನ್ನು ತಪ್ಪಾಗಿ ತೋರಲಾಗುತ್ತಿದೆ ಎಂದು ಪ್ರತಿಪಾದಿ ಸಿದ್ದರು.

ವಾದಗಳನ್ನು ಆಲಿಸಿದ್ದ ಹೈಕೋರ್ಟ್‌ ವಿಚಾರದ ಇತ್ಯರ್ಥಕ್ಕೆ ಜಿಲ್ಲಾಧಿಕಾರಿಗಳಿಗೆ ನೀಡಿತ್ತು. ಜಿಲ್ಲಾಧಿಕಾರಿಗಳು ಪ್ರತಿಯೊಬ್ಬ ಅರ್ಜಿದಾರರ ಅಹವಾಲನ್ನು ಕೇಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಸೂಚಿಸಿತ್ತು. ಹಲವು ಜಿಲ್ಲಾಧಿಕಾರಿಗಳು ಸ್ಥಳ ಪರಿಶೀಲನೆ ಮಾಡಿದ್ದರೂ, ಇಲಾಖೆಗಳ ನಡುವಿನ ಸಮನ್ವಯದ ಕೊರತೆಯಿಂದಾಗಿ ಅಗಲೀಕರಣ ನನೆಗುದಿಗೆ ಬಿದ್ದಿದೆ.

ರಸ್ತೆ ಮಧ್ಯದಿಂದ 12 ಮೀಟರ್‌ ಎರಡೂ ಕಡೆಗಳಲ್ಲಿ ವಿಸ್ತರಣೆಆಗಬೇಕು. ಈಗ 27 ಮಂದಿ ನ್ಯಾಯಾಲಯಕ್ಕೆ ಹೋಗಿದ್ದಾರೆ. ಹೈಕೋರ್ಟ್‌ ರಜಾ ಮುಗಿದ ನಂತರ ತೀರ್ಪು ಬರುವ ಸಂಭವ ಇದೆ. ನ್ಯಾಯಾಲಯದ ಆದೇಶದಂತೆ ರಸ್ತೆಯ ಸರ್ವೆ ಮಾಡಿದ್ದೇವೆ. ನ್ಯಾಯಾಲಯದಲ್ಲಿ ಇಲ್ಲದ ಕಟ್ಟಡಗಳನ್ನು ತೆರವು ಮಾಡಬೇಕಾಗಿದೆ. ಆದರೆ, ಕಟ್ಟಡಗಳು ಜಂಟಿಯಾಗಿರುವುದರಿಂದ ಒಂದು ಕಟ್ಟಡ ಬಿದ್ದರೆ, ಉಳಿದ ಕಟ್ಟಡಕ್ಕೂ ತೊಂದರೆ ಯಾಗುವ ಸಂಭವ ಇದೆ. ಇದು ನ್ಯಾಯಾಲಯ ನಿಂಧನೆಗೆ ಒಳಗಾಗಬಹುದು ಎಂಬ ಭೀತಿಯನ್ನು ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳು ವ್ಯಕ್ತಪಡಿಸಿದ್ದಾರೆ.

ಈಚೆಗೆ ಪಿಡಬ್ಲ್ಯೂಡಿ ಕಾರ್ಯಪಾಲಕ ಎಂಜಿನಿಯರ್‌ ಅವರನ್ನು ಕೋಲಾರದ ಕಚೇರಿಯಲ್ಲಿ ತರಾಟೆಗೆ ತೆಗೆದುಕೊಂಡಿದ್ದ ಶಾಸಕಿ ಎಂ.ರೂಪಕಲಾ, ಅಧಿಕಾರಿಗಳ ತಾತ್ಸಾರದಿಂದಾಗಿ ಕಾಮಗಾರಿ ನನೆಗುದಿಗೆ ಬಿದ್ದಿದೆ. ಕೂಡಲೇ ರಸ್ತೆ ತೆರವು ಮಾಡಿ ಕಾಮಗಾರಿ ಶುರು ಮಾಡಬೇಕು ಎಂದು ಆಕ್ರೋಶ ವ್ಯಕ್ತಪಡಿಸಿದ್ದರು. ಈ ಹಿನ್ನೆಲೆಯಲ್ಲಿ ಮರುದಿನವೇ ಸೂಚನೆ ನೀಡಿದ ಕಾರ್ಯಪಾಲಕ ಎಂಜಿನಿಯರ್‌, ಕೆಳಗಿನ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳುವಂತೆ ಸೂಚಿಸಿದ್ದಾರೆ. ಆದರೆ, ಅಧಿಕಾರಿಗಳ ಮತ್ತು ವರ್ತಕರ ನಡುವಿನ ಗೊಂದಲದಿಂದ ಸಾರ್ವಜನಿಕರು ರಸ್ತೆಯಲ್ಲಿ ಕಷ್ಟಪಟ್ಟು ತಿರುಗಾಟ ನಡೆಸಬೇಕಾದ ಅನಿವಾರ್ಯತೆ ಉಂಟಾಗಿದೆ.

● ಬಿ.ಆರ್‌.ಗೋಪಿನಾಥ್‌