ಮಳೆಗೆ ಮಾವು, ಟೊಮೆಟೋ ನಷ್ಟ

Team Udayavani, May 1, 2020, 2:30 PM IST

ಸಾಂದರ್ಭಿಕ ಚಿತ್ರ

ಟೇಕಲ್‌: ಹೋಬಳಿಯಲ್ಲಿ ಬುಧವಾರ ಬೆಳಗಿನ ಜಾವ 4 ರಿಂದ 10 ಗಂಟೆವರೆಗೂ ಬಿದ್ದ ಗುಡುಗು ಸಹಿತ ಆಲಿಕಲ್ಲು ಮಳೆಯಿಂದಾಗಿ ಮಾವಿನ ತೋಟ, ಟೊಮೆಟೋ , ಚಿಕ್ಕಡಿ ಬೆಳೆ ಸೇರಿ 25 ಎಕರೆ ಪ್ರದೇಶದಲ್ಲಿ ಬೆಳೆದಿದ್ದ ಬೆಳೆ ನಷ್ಟವಾಗಿ ಅಂದಾಜು 5 ಲಕ್ಷ ರೂ. ಗೂ ಹೆಚ್ಚು ನಷ್ಟವಾಗಿರುವುದು ಕಂಡು
ಬಂದಿದೆ.

ಕೆಂಪಸಂದ್ರ ಗ್ರಾಮದಲ್ಲಿ ಟೊಮೆಟೋ ಬೆಳೆ 5 ಎಕರೆ, ಯಜ್ಞಾವದಾನಿ ಗ್ರಾಮದಲ್ಲಿ ಚಿಕ್ಕಡಿ 1.20 ಎಕರೆ ಮತ್ತು ಟೊಮೆಟೋ, ಬಸಾಪುರ ಗ್ರಾಮದಲ್ಲಿ ಹೂಕೋಸು 1 ಎಕರೆ ಮತ್ತು ಟೊಮೆಟೋ ತೋಟ 7 ಎಕರೆ ಹಾಗೂ ಕರಡುಗುರ್ಕಿ ಗ್ರಾಮದ ಬಳಿ ಮಾವು 8 ಎಕರೆ ಪ್ರದೇಶದಲ್ಲಿದ್ದು, ಮಳೆಯಿಂದ ನೆಲಕಚ್ಚಿದೆ. ನಷ್ಟವಾಗಿರುವ ಅಂದಾಜು ಮೌಲ್ಯ 5 ಲಕ್ಷ ರೂ. ಇರಬಹುದೆಂದು ತಿಳಿದು ಬಂದಿದೆ. ಇನ್ನೂ ಕೆಲವು ಗ್ರಾಮಗಳಲ್ಲಿ ಮಳೆ ಗಾಳಿಗೆ ತೋಟಗಾರಿಕಾ ಬೆಳೆಗಳು ನಷ್ಟವಾಗಿವೆ. ಈ ಬಗ್ಗೆ ಮಾಹಿತಿ ಪಡೆಯುತ್ತಿರುವುದಾಗಿ ಮಾಲೂರು ತೋಟಗಾರಿಕಾ ಇಲಾಖೆಯ ನಿರ್ದೇಶಕಿ ಶಿಲ್ಪಶ್ರೀ ತಿಳಿಸಿದ್ದಾರೆ.

ಇಲಾಖೆ ಸಿಬ್ಬಂದಿ ರೈತರ ತೋಟಗಳಿಗೆ ಭೇಟಿ ನೀಡಿ, ಸಂಪೂರ್ಣ ಮಾಹಿತಿ ಸಂಗ್ರಹಿಸುತ್ತಿದ್ದು, ಇನ್ನೂ ಮಾಹಿತಿ ಬರಬೇಕಿದೆ ಎಂದು ಅವರು ತಿಳಿಸಿದರು.