ಶೈಕ್ಷಣಿಕ ಪ್ರಗತಿ ಮೊದಲ ಗುರಿ: ಆಚಾರ್‌

Team Udayavani, Mar 28, 2022, 4:03 PM IST

ಕುಕನೂರು: ಮುಂದಿನ ಬೇಸಿಗೆ ಎನ್ನುವಷ್ಟರಲ್ಲಿ ಕ್ಷೇತ್ರವನ್ನು ನೀರಾವರಿಯಾಗಿಸುವ ಮೂಲಕ ದುಡಿಯುವ ಕೈಗಳಿಗೆ ಕೆಲಸ ಒದಗಲಿದ್ದು, ಕ್ಷೇತ್ರದ ಜನ ದುಡಿಮೆ ಅರಸಿ ಬೇರೆಡೆ ವಲಸೆ ಹೋಗುವ ಅಗತ್ಯವಿಲ್ಲ ಎಂದು ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಸಚಿವ ಹಾಲಪ್ಪ ಆಚಾರ್‌ ಹೇಳಿದರು.

ತಾಲೂಕಿನ ಹೊನ್ನೂಣಸಿ ಗ್ರಾಮದಲ್ಲಿ ರವಿವಾರ ನಡೆದ ರಸ್ತೆ ನಿರ್ಮಾಣ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು.

ನಾನು ಒಬ್ಬ ರೈತನ ಮಗನಾಗಿದ್ದು, ಅಧಿಕಾರಕ್ಕೆ ಬರುವ ಮುನ್ನ ಕ್ಷೇತ್ರದಲ್ಲಿ ನೀರಾವರಿ ಹಾಗೂ ಶೈಕ್ಷಣಿಕ ಅಭಿವೃದ್ಧಿಗಾಗಿ ನೀಡಿದ ಭರವಸೆ ಉಳಿಸಿಕೊಳ್ಳಲು ಈಗಾಗಲೇ ನಮ್ಮ ಭಾಗದ ನೀರನ್ನು ಕೆರೆ ತುಂಬಿಸಿಕೊಳ್ಳುವ ಮೂಲಕ ರೈತರ ಭೂಮಿಗೆ ತೇವಾಂಶ ಹೆಚ್ಚಿಸುವ ಕೆಲಸ ಮುಂದುವರಿಸಿದ್ದೇವೆ. ಗೋವಾ, ಮಹಾರಾಷ್ಟ್ರ, ರತ್ನಗಿರಿಗೆ ದುಡಿಮೆ ಹೋಗುವ ಜನ ತಮ್ಮ ಭೂಮಿಯಲ್ಲಿ ಕೆಲಸ ಮಾಡುವಂತಾಗುತ್ತದೆ. ಶೈಕ್ಷಣಿಕ ಅಭಿವೃದ್ಧಿಗಾಗಿ ಯಲಬುರ್ಗಾ ಮತ್ತು ಕುಕನೂರು ಅವಳಿ ತಾಲೂಕಿನಲ್ಲಿ ಸುಮಾರು 350ರಷ್ಟು ಶಾಲಾ-ಕಾಲೇಜ್‌ ಕೊಠಡಿ ನಿರ್ಮಿಸಲಾಗಿದೆ. ಒಂದು ಪಿಜಿ ಸೇಂಟರ್‌, ಎರಡು ಪಿಯು ಕಾಲೇಜ್‌ ಪ್ರಾರಂಭಿಸಲಾಗಿದೆ. ಹಿಂದಿನ ಕಾಂಗ್ರೆಸ್‌ ಸರ್ಕಾರದ ಅವಧಿಯಲ್ಲಿ ಖಾಸಗಿಯವರಿಗೆ ಕೊಟ್ಟ ಕುಕನೂರು ಸರಕಾರಿ ಪದವಿ ಕಾಲೇಜ್‌ನ್ನು ಮುಂದಿನ ದಿನಗಳಲ್ಲಿ ಪ್ರಾರಂಭಿಸಲು ಸರ್ಕಾರಕ್ಕೆ ಮನವಿ ಮಾಡಿದ್ದೇವೆ. ಪಟ್ಟಣದಲ್ಲಿ ಕ್ರೀಡಾ ಮೈದಾನವನ್ನು ಶೀಘ್ರವೇ ಉದ್ಘಾಟಿಸಲಾಗುವುದು.

ಬಿಜೆಪಿ ಸರಕಾರ ರೈತರ ಮಕ್ಕಳಿಗೆ ವಿಶೇಷ ಪ್ಯಾಕೇಜ್‌, ಭಾಗ್ಯಲಕ್ಷ್ಮಿ ಯೋಜನೆ, ಮಹಿಳಾ ಸ್ವ ಸಹಾಯ ಗುಂಪಿಗೆ ನೆರವು, ರೈತರಿಗೆ ಬಿತ್ತನೆ ವೇಳೆ ಸಹಾಯಧನ, ಉಚಿತ ಉಜ್ವಲ್‌ ಗ್ಯಾಸ್‌, ಜೆಜೆಎಂ ಕುಡಿಯುವ ನೀರು ಯೋಜನೆ ಹೀಗೆ ಹಲವಾರ ಜನಪರ ಯೋಜನೆಗಳು, ರಾಷ್ಟ್ರದಲ್ಲಿ ನರೇಂದ್ರ ಮೋದಿಯವರ ಕೋವಿಡ್‌ ಸಂದರ್ಭದಲ್ಲಿ ಜನರ ಜೀವ ಉಳಿಸಿದ ಕ್ರಮ, ಯುದ್ಧ ಸಮಯದಲ್ಲಿ ದಿಟ್ಟ ನಡೆ ಇನ್ನಿತರ ಕಾರ್ಯ ವೈಖರಿ ಜನರ ನಂಬಿಕೆಗೆ ಪಾತ್ರವಾಗಿದೆ ಎಂದರು.

ಕಾಂಗ್ರೆಸ್‌ ಅಧಿಕಾರದ ಅವಧಿಯಲ್ಲಿ ನಡೆದ ಜನವಿರೋಧಿ ನೀತಿಗೆ ಜನ ಅವರಿಗೆ ತಕ್ಕ ಪಾಠ ಕಲಿಸಿದ್ದಾರೆ. ಮೊನ್ನೆ ನಡೆದ ಪಂಚರಾಜ್ಯ ಚುನಾವಣೆ ಫಲಿತಾಂಶ ರಾಜ್ಯ ರಾಷ್ಟ್ರದಲ್ಲಿ ಕಾಂಗ್ರೆಸ್‌ ಅಸ್ತಿತ್ವವನ್ನೇ ಕಳೆದುಕೊಂಡಂತಾಗಿದೆ. ರಾಜ್ಯದಲ್ಲಿ ಕಾಂಗ್ರೆಸ್‌ ಮುಖಂಡರು ಜನ ವಿರೋಧಿ ಹೇಳಿಕೆಯಿಂದ ವಿಶ್ವಾಸ ಕಳೆದುಕೊಳ್ಳುತ್ತಿದ್ದಾರೆ ಎಂದರು.

ಗ್ರಾಪಂ ಅಧ್ಯಕ್ಷ ರೇವಣಸಿದ್ಧಯ್ಯ, ತಹಶೀಲ್ದಾರ್‌ ಕಿರಣಕುಮಾರ ಕುಲಕರ್ಣಿ, ಮುಖಂಡ ವಿಶ್ವನಾಥ ಮರಿಸಬಸಪ್ಪನವರ, ವೀರಭದ್ರಪ್ಪ ಹಾವಾರಿ, ವೀರಣ್ಣ ಹುಬ್ಬಳ್ಳಿ, ಎಂ.ಬಿ. ಅಳವುಂಡಿ, ಎಇಇ ಹೇಮಂತ್‌ರಾಜ್‌ ಇನ್ನಿತರರಿದ್ದರು.

ಗ್ರಾಮದಲ್ಲಿ ಕಾಮಗಾರಿ ಪೂಜೆ ನಂತರ ವೇದಿಕೆ ಕಾರ್ಯಕ್ರಮಕ್ಕೆ ಆಗಮಿಸುವಾಗ ರಸ್ತೆಯಲ್ಲಿ ಉಂಟಾದ ಚರಂಡಿ ಅವ್ಯವಸ್ಥೆಯನ್ನು ಕಂಡು ಸಚಿವರು ಗ್ರಾಪಂ ಅಭಿವೃದ್ಧಿ ಅಧಿಕಾರಿ ದೊಡ್ಡಬಸಮ್ಮನನ್ನು ತರಾಟೆ ತೆಗೆದುಕೊಂಡರು. ಇದೇನೆ ನಿಮ್ಮ ಅಭಿವೃದ್ಧಿ ಗ್ರಾಮದಲ್ಲಿ ಜನ ನಡೆದಾಡುವುದಾರೂ ಹೇಗೆ? ಮೊದಲು ಚರಂಡಿ ನಿರ್ಮಿಸಿ ರಸ್ತೆ ಸುಧಾರಣೆಗೊಳಿಸಿ. ಇಲ್ಲದಿದ್ದರೆ ಸಸ್ಪೆಂಡ್‌ ಮಾಡಿ ಮನೆಗೆ ಕಳಿಸುತ್ತೇನೆ. ಇದೇ ಸಂದರ್ಭದಲ್ಲಿ ಗ್ರಾಮದ ಜನರ ವಿವಿಧ ಸಮಸ್ಯೆಗಳ ಕುರಿತು ಮನವಿ ಪಡೆದು ನಿವಾರಣೆಗೆ ಕ್ರಮ ತೆಗೆದುಕೊಳ್ಳುವದಾಗಿ ತಿಳಿಸಿದರು.

ಕಾಮಗಾರಿಗೆ ಭೂಮಿಪೂಜೆ: ರೂ. 50 ಲಕ್ಷ ವೆಚ್ಚದಲ್ಲಿ ಹೊನ್ನುಣುಸಿ-ಹನುಮನಹಟ್ಟಿ 1 ಕಿ.ಮೀ ರಸ್ತೆ ನಿರ್ಮಾಣ ಕಾಮಗಾರಿ, 1 ಕೋಟಿ ರೂ. ವೆಚ್ಚದ ಚಿಕ್ಕಬೀಡಿನಾಳ ಗ್ರಾಮದ ಕೆರೆ ಅಭಿವೃದ್ಧಿ ಕಾಮಗಾರಿ, 98 ಲಕ್ಷದ ರೂ. ಕದ್ರಳ್ಳಿ-ಹಿರೇಬಿಡಿನಾಳದ ರಸ್ತೆ ನಿರ್ಮಾಣ, 1.20 ಕೋಟಿ ರೂ. ವೆಚ್ಚದ ಕದ್ರಳ್ಳಿ ಗ್ರಾಮದಿಂದ ಮುತ್ತಾಳ ರಸ್ತೆ ಸುಧಾರಣೆ ಕಾಮಗಾರಿ, 10 ಕೋಟಿ ರೂ. ವೆಚ್ಚದಲ್ಲಿ ತಿಪ್ಪರಸನಾಳ ಗ್ರಾಮದಲ್ಲಿ ಅಲ್ಪಸಂಖ್ಯಾತರ ಮೊರಾರ್ಜಿ ದೇಸಾಯಿ ಬಾಲಕಿಯರ ಪಪೂ ವಸತಿ ಕಾಲೇಜು ಕಟ್ಟಡ ಕಾಮಗಾರಿ, 1 ಕೋಟಿ ರೂ. ವೆಚ್ಚದ ತಿಪ್ಪರಸನಾಳ ಗಾವರಾಳ ರಸ್ತೆ ಸುಧಾರಣೆ, 50 ಲಕ್ಷ ರೂ.ವೆಚ್ಚದ ತಿಪ್ಪರಸನಾಳ- ಚಂಡೂರ ರಸ್ತೆ ಸುಧಾರಣೆ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಿದರು.