Congress; ಡಿ.ಕೆ ಶಿವಕುಮಾರ್ ರೊಂದಿಗೆ ಉತ್ತಮ ಸಮನ್ವಯತೆ ಇದೆ:ಸತೀಶ್ ಜಾರಕಿಹೊಳಿ

Team Udayavani, Dec 29, 2023, 11:07 PM IST

ಕುಷ್ಟಗಿ: ನನ್ನ ಹಾಗೂ ರಾಜ್ಯದ ಉಪಮುಖ್ಯಮಂತ್ರಿಗಳಾದ ಡಿ.ಕೆ ಶಿವಕುಮಾರ್ ರವರ ನಡುವೆ ಯಾವುದೇ ರೀತಿಯ ಸಮನ್ವಯತೆಯ ಕೊರತೆ ಇರುವುದಿಲ್ಲ. ನಮ್ಮ ಪಕ್ಷದ ಎಲ್ಲಾ ನಾಯಕರುಗಳ ನಡುವೆ ಉತ್ತಮವಾದ ಸಮನ್ವಯತೆ ಇದೆ ಎಂದು ಇತ್ತೀಚಿನ ರಾಜಕೀಯ ಊಹಾಪೋಹಗಳ ಬಗ್ಗೆ ಲೋಕೋಪಯೋಗಿ ಸಚಿವ ಸತೀಶ ಜಾರಕಿಹೊಳಿ ತೆರೆ ಎಳೆಯಲು ಯತ್ನಿಸಿದರು.

ಶುಕ್ರವಾರ ರಾತ್ರಿ ಲಿಂಗಸುಗೂರಿನಿಂದ ಹೊಸಪೇಟೆಗೆ ಹೋಗುವ ಮಾರ್ಗದಲ್ಲಿ ಕುಷ್ಟಗಿಯಲ್ಲಿ ತಮ್ಮನ್ನು ಭೇಟಿಯಾದ ಸುದ್ದಿಗಾರರೊಂದಿಗೆ ಮಾತನಾಡಿ ತಮ್ಮ ಹಾಗೂ ಡಿಕೆಶಿ ಮದ್ಯೆ ಗುಸುಗುಸು ರಾಜಕೀಯ ವಿದ್ಯಾಮಾನಕ್ಕೆ ತಾರ್ಕಿಕ ಅಂತ್ಯವಾಡಲು ಯತ್ನಿಸಿ, ನಮ್ಮ ಸರಕಾರದಲ್ಲಿ ಮೂರು ಡಿಸಿಎಂ ಹುದ್ದೆಗಳನ್ನು ನೀಡುವ ಕುರಿತು ನಾನು ಯಾವುದೇ ಬೇಡಿಕೆ ಇಟ್ಟಿಲ್ಲ ಎಂದರು.

ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಗಳಿಂದ ಯಾವುದೇ ರೀತಿಯ ಆರ್ಥಿಕ ಹೊರೆಯಾಗಿಲ್ಲ. ಬದಲಾಗಿ ಈ ಹಿಂದಿನ ಬಿಜೆಪಿ ಸರಕಾರವು ತನ್ನ ಅಧಿಕಾರವಧಿಯ ಕೊನೆ ಗಳಿಗೆಯಲ್ಲಿ ಹೆಚ್ಚಿನ ಅನುದಾನ ನೀಡುವ ಮೂಲಕ ಹೆಚ್ಚಿನ ಸಾಲ ಮಾಡಿ ಹೋಗಿರುವುದು ಆರ್ಥಿಕವಾಗಿ ಹೊರೆಯಾಗಿರುತ್ತದೆ ಎಂದರು.