ಕಾಂಗ್ರೆಸ್‌ಗೆ 136 ಸ್ಥಾನ ಖಚಿತ: ಡಿ.ಕೆ.ಶಿವಕುಮಾರ್‌

Team Udayavani, Dec 17, 2022, 12:49 AM IST

ಕುಷ್ಟಗಿ: ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದರೆ ಉದ್ಯೋಗ ಸೃಷ್ಟಿಗೆ ವಿಶೇಷ ಆರ್ಥಿಕ ವಲಯ ಸ್ಥಾಪಿಸಲಾಗುವುದು. ಕೈಗಾರಿಕೆ ಸ್ಥಾಪಿಸಲು ಮುಂದೆ ಬಂದವರಿಗೆ ಕಡಿಮೆ ದರ ದಲ್ಲಿ ನೀರು, ವಿದ್ಯುತ್‌ ಮೂಲಸೌಕರ್ಯಗಳ ವಿಶೇಷ ಪ್ಯಾಕೇಜ್‌ ಕಲ್ಪಿಸಲಾಗುವುದು. ಆ ಧೈರ್ಯದಿಂದಲೇ ಮಾತನಾಡುತ್ತಿದ್ದೇವೆ ಎಂದು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಹೇಳಿದರು.

ಅಮರೇಗೌಡ ಪಾಟೀಲ್‌ ಬಯ್ನಾಪುರ ಅವರ ಜನ್ಮದಿನೋತ್ಸವ ಹಾಗೂ ಕಾಂಗ್ರೆಸ್‌ ಕಾರ್ಯಕರ್ತರ ಸಮಾವೇಶದಲ್ಲಿ ಮಾತನಾಡಿದ ಅವರು, ಕಾಂಗ್ರೆಸ್‌ 136 ಸ್ಥಾನ ಗೆದ್ದು ಅ ಧಿಕಾರಕ್ಕೆ ಬರುವುದು ಬಹುತೇಕ ಖಚಿತ. ಎಲ್ಲರಿಗೂ ಸರಕಾರಿ ನೌಕರಿ ಕೊಡುವ ಭರವಸೆ ನೀಡುವುದಿಲ್ಲ. ಖಾಲಿ ಇರುವ ಎಲ್ಲ ಹುದ್ದೆಗಳನ್ನು ಭರ್ತಿ ಮಾಡಲಾಗುವುದು. ಈ ಹಿಂದೆ ಇಂಧನ ಸಚಿವನಾಗಿದ್ದ ವೇಳೆ ಲೈನ್‌ಮೆನ್‌ ಹುದ್ದೆಗಳನ್ನು ಯಾರಿಗೂ ಲಂಚ ಇಲ್ಲದೇ ಭರ್ತಿ ಮಾಡಲಾಗಿತ್ತು ಎಂದರು.

ಬಿಜೆಪಿ ಸರಕಾರದಲ್ಲಿ ಪಿಎಸ್‌ಐ ಹುದ್ದೆಗೆ ಲಂಚ ತೆಗೆದುಕೊಂಡ ಐಎಎಸ್‌, ಐಪಿಎಸ್‌ ಅ ಧಿಕಾರಿ ಸಹಿತ ಈ ಪ್ರಕರಣದಲ್ಲಿ ಶಾಮೀಲಾದವರು ಕೋರ್ಟ್‌ನಲ್ಲಿ ಮಾತನಾಡುವುದಕ್ಕೂ ಅವಕಾಶ ನೀಡದೆ ಜೈಲಿಗೆ ಹೋಗಿ ಕೊಳೆಯಬೇಕಾಯಿತು. ಶಿಕ್ಷಕರ ಹಾಗೂ ಗುಮಾಸ್ತ ಹುದ್ದೆ ಕೂಡ ಲಂಚವಿಲ್ಲದೇ ಮಾತಿಲ್ಲ. ನಾವೇನಾದರೂ ಹುದ್ದೆಗಳ ನೇಮಕಾತಿ ವಿಷಯದಲ್ಲಿ ಲಂಚ ತೆಗೆದುಕೊಂಡಿದ್ದರೆ ತನಿಖೆ ಮಾಡಲಿ ಎಂದು ಸವಾಲೆಸೆದರು.