ಮೃತಪಟ್ಟು ವಾರ್ಷಿಕ‌ ಪುಣ್ಯ ತಿಥಿ ಸಮೀಪಿಸುತ್ತಿದ್ದರೂ, ಇನ್ನೂ ದೊರೆಯದ ಕೋವಿಡ್ ಪರಿಹಾರ ಮೊತ್ತ

Team Udayavani, Mar 21, 2022, 6:05 PM IST

ಕುಷ್ಟಗಿ: ಕೋವಿಡ್ ನಿಂದ ಮೃತರಾದವರ ವಾರ್ಷಿಕ‌ ಪುಣ್ಯತಿಥಿ ಸಮೀಪಿಸುತ್ತಿದ್ದರೂ, ಬಹುತೇಕ ಮೃತ ಕುಟುಂಬ ವರ್ಗಕ್ಕೆ ಕೋವಿಡ್ ಪರಿಹಾರ ಬಂದಿಲ್ಲ. ಇಲ್ಲಿನ ತಹಶೀಲ್ದಾರ ಕಚೇರಿಗೆ ಅಲೆದಾಡುತ್ತಿದ್ದರೂ, ಈ ಕುಟುಂಬದವರಿಗೆ ಕೋವಿಡ್ ಪರಿಹಾರದ ಮೊತ್ತ ಕನ್ನಡಿಯೊಳಗಿನ ಗಂಟಾಗಿದೆ.

ಕಳೆದ ವರ್ಷ ಕೋವಿಡ್ ಸಂಧರ್ಭದಲ್ಲಿ ತಾಲೂಕಿನಲ್ಲಿ 112 ಜನ ಮೃತರಾಗಿದ್ದಾರೆ. ಇವರಲ್ಲಿ 49 ಜನರ ಕುಟುಂಬಕ್ಕೆ ತಲಾ 1ಲಕ್ಷ ರೂ. ಪರಿಹಾರ ಸಿಕ್ಕಿದೆ. ಇನ್ನುಳಿದ 63 ಜನ ನೊಂದ ಕುಟುಂಬಕ್ಕೆ ಕೋವಿಡ್ ಪರಿಹಾರ ಮರೀಚಿಕೆಯಾಗಿದೆ.

ಕೋವಿಡ್ ನಿಂದ ಸತ್ತವರ ಹೆಸರು ಕಡತದಲ್ಲಿ ಉಳಿದುಕೊಂಡಿದ್ದು, ಕೋವಿಡ್ ನಿಂದ ಸತ್ತವರು ಜೀವನ ಮೋಕ್ಷ ಕಂಡಿದ್ದು, ಸರ್ಕಾರದ ಕೋವಿಡ್ ಪರಿಹಾರದ ದಾಖಲೆಗಳಿಗೆ ಇನ್ನೂ ಮೋಕ್ಷ ಕಂಡಿಲ್ಲ.

ಕುಷ್ಟಗಿಯ ರೈತ ಭಾಷುಸಾಬ್ ಹೊನ್ನೂರುಸಾಬ್ ಗೈಬಣ್ಣನವರ್ ಕಳೆದ ವರ್ಷ ಮೆ. 11ರಂದು ಇಲ್ಲಿನ ತಾಲೂಕಾ ಸರ್ಕಾರಿ ಆಸ್ಪತ್ರೆಯ ಡಿಸಿಎಚ್ ಸಿಯಲ್ಲಿ ನಿಧನರಾಗಿದ್ದಾರೆ. ಕಳೆದ ಸೋಮವಾರ ಹಿರಿಯರ ಹಬ್ಬ ಮಾಡಿದ್ದು, ಇನ್ನೂ 1ಲಕ್ಷ ರೂ. ಪರಿಹಾರ ಮೊತ್ತ ಬಂದಿಲ್ಲ. ತಹಶೀಲ್ದಾರ ಕಚೇರಿಗೆ ಅಲೆದಾಡಿ ಸುಸ್ತಾಗಿರುವ ಕುಟುಂಬ ವರ್ಗಕ್ಕೆ ತಹಶೀಲ್ದಾರ ಕಚೇರಿಯ ಇಲಾಖೆಯ ಅನಗತ್ಯ ವಿಳಂಬ ಧೋರಣೆಯಿಂದಾಗಿ ಕುಟುಂಬ ವರ್ಗವೂ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದೆ. ತಮ್ಮವರನ್ನು ಕಳೆದುಕೊಂಡವರಗಿಂತ ಹೆಚ್ಚಿನ ದುಃಖವನ್ನು ತಹಶೀಲ್ದಾರ ಕಚೇರಿಯ ವಿಳಂಬ ಧೋರಣೆ ಕಾರಣವಾಗಿದೆ.

ಇದನ್ನೂ ಓದಿ:ಉನ್ನತ ಶಿಕ್ಷಣ.. ಇದು ಶ್ರೀಮಂತರು, ರಾಜಕಾರಣಿಗಳು ದುಡ್ಡು ಸಂಗ್ರಹ ಮಾಡುವ ಹುಂಡಿ : HDK ಕಿಡಿ

ತಹಸೀಲ್ದಾರ ಕಚೇರಿಯಲ್ಲಿ ವಿಚಾರಿಸಿದರೆ, ಜಿಲ್ಲಾಡಳಿತಕ್ಕೆ ಕಳಿಸಿರುವುದಾಗಿ ನೆಪ ಹೇಳುತ್ತಿದ್ದು, ಜಿಲ್ಲಾಡಳಿತ ಕಚೇರಿಯ ಸಂಬಂಧಿಸಿದ ಸಿಬ್ಬಂದಿಯನ್ನು ವಿಚಾರಿಸಿದರೆ ಕುಷ್ಟಗಿ ತಹಶೀಲ್ದಾರ ಕಚೇರಿಯತ್ತ ಬೆರಳು ಮಾಡುತ್ತಿದ್ದು, ಇವರ ಅಲೆದಾಡಿಸುವಿಕೆಗೆ ಪರಿಹಾರ ಮೊತ್ತ ಯಾವಾಗ್ಲಾದರೂ ಬರಲಿ ಎಂದು ಕೇಳುವುದನ್ನೇ ಬಿಟ್ಟಿದ್ದಾರೆ.

ಇದೇ ರೀತಿ ಕುಷ್ಟಗಿ ಯ ನಾಗಪ್ಪ ಕುರಿ, ಡೊಣ್ಣೆಗುಡ್ಡ ಗ್ರಾಮದ ದುರಗಪ್ಪ ವಾಲೀಕಾರ ಅವರ ಕುಟುಂಬ ವರ್ಗದವರು ಸೇರಿದಂತೆ‌ ಮೊದಲಾದವರು ಕೋವಿಡ್ ಪರಿಹಾರದ ನಿರೀಕ್ಷೆಯಲ್ಲಿದ್ದಾರೆ.

ತಾಂತ್ರಿಕ ಲೋಪ ಎಲ್ಲಿ?: ಕೋವಿಡ್ ನಿಂದ ಮೃತರಾದ ಕುಟುಂಬಗಳಿಂದ ಮೃತ ಆಧಾರ ಕಾರ್ಡ, ಎಸ್.ಆರ್. ಎಫ್. ಐಡಿ ಇತ್ಯಾಧಿ ಪೂರಕ ದಾಖಲೆಗಳನ್ನು ಸ್ವೀಕರಿಸಲಾಗಿದೆ. ಸ್ವೀಕೃತ ದಾಖಲೆಗಳ ಪೈಕಿ 42 ಬಿಪಿಎಲ್ ಕಾರ್ಡದಾರ ಕುಟುಂಬಗಳು, ಎಪಿಎಲ್ 7 ಕುಟುಂಬಗಳಿಗೆ 1 ಲಕ್ಷ ರೂ. ಪರಿಹಾರ ವಿತರಿಸಲಾಗಿದೆ. ಈ ಕುಟುಂಬಗಳಿಗೆ ಇನ್ನೂ ತಲಾ 50ಸಾವಿರ ರೂ. ಕೇಂದ್ರ ಸರ್ಕಾರದಿಂದ ಬರಬೇಕಿದ್ದು ಅದರ ಬಗ್ಗೆ ಯಾವೂದೇ ಮಾಹಿತಿ ಇಲ್ಲ. ಇನ್ನೂ 63 ಕುಟುಂಗಳಿಗೆ ಪರಿಹಾರ ಪರಿಚೀಕೆಯಾಗಿದ್ದು ಇಷ್ಟು ವಿಳಂಬ ಧೋರಣೆಗೆ ಸಂಬಂಧಿಸಿದ ಜಿಲ್ಲಾಧಿಕಾರಿಗಳು ಗಮನಿಸದೇ ಇರುವುದು ವಿಪರ್ಯಸವೆನಿಸಿದೆ. ಮಾಹಿತಿ ಪ್ರಕಾರ ದಾಖಲೆಗಳನ್ನು ಆನಲೈನ್ ನಲ್ಲಿ ನೊಂದಣಿ ವೇಳೆ ಎಸ್ ಆರ್ ಎಫ್ ಐಡಿ ಸಂಖ್ಯೆಯನ್ನು ತಪ್ಪಾಗಿ ನೊಂದಾಯಿಸಿದ್ದು, ಈ ಹಿನ್ನೆಲೆಯಲ್ಲಿ ಸದರಿ ಕುಟುಂಬಗಳು ನೀಡುವ ಎಸ್ ಆರ್ ಎಫ್ ಐಡಿ ಸಂಖ್ಯೆಗೆ ಹೊಂದಾಣಿಕೆಯಾಗದೇ ಡಾಟಾ ನಾಟ್ ಪೌಂಡ್ ಎಂದು ಬರುತ್ತಿದೆ. ಇಷ್ಟು ದಿನಗಳಾದರೂ ಎಲ್ಲಿ ಲೋಪವಾಗಿದೆ ಎಂದು ಸರಿಪಡಿಸಲಾಗಿಲ್ಲ.

– ಮಂಜುನಾಥ ಮಹಾಲಿಂಗಪುರ ಕುಷ್ಟಗಿ.