ಆನೆಗೊಂದಿಗೆ ಸ್ಮಶಾನದ ಹೋರಾಟಕ್ಕೆ 50 ವರ್ಷ; ಗ್ರಾಮಸ್ಥರಿಂದ ರಸ್ತೆ ತಡೆದು ಪ್ರತಿಭಟನೆ

Team Udayavani, Sep 12, 2022, 12:43 PM IST

ಗಂಗಾವತಿ: ವಿಜಯನಗರದ ಮೂಲ ರಾಜಧಾನಿ ಆನೆಗೊಂದಿಗೆ ಸ್ಮಶಾನದ ಕೊರತೆಯಿದ್ದು, ಕಳೆದ 50 ವರ್ಷಗಳಿಂದ ನಿರಂತರ ಹೋರಾಟ ನಡೆಸಿದರೂ ಪ್ರಯೋಜನವಾಗಿಲ್ಲ.ಇದನ್ನು ಖಂಡಿಸಿ ಆನೆಗೊಂದಿ ಗ್ರಾ. ಪಂ. ವ್ಯಾಪ್ತಿಯ ಗ್ರಾಮಗಳ ಮುಖಂಡರು ಹಾಗೂ ಗ್ರಾ.ಪಂ. ಸದಸ್ಯರು, ಸಾರ್ವಜನಿಕರು ಕಡೆಬಾಗಿಲು ವೃತ್ತದಲ್ಲಿ ರಸ್ತೆ ತಡೆದು ಪ್ರತಿಭಟನೆ ನಡೆಸಿದರು.

ಈ ಸಂದರ್ಭದಲ್ಲಿ ಆನೆಗೊಂದಿ ಗ್ರಾ ಪಂ ಅಧ್ಯಕ್ಷ ತಿಮ್ಮಪ್ಪ ಬಾಳೆಕಾಯಿ ಮಾತನಾಡಿ, ಆನೆಗೊಂದಿ ಸಣಾಪುರ ಗ್ರಾ. ಪಂ. ವ್ಯಾಪ್ತಿಯ ಹಳ್ಳಿಗಳಲ್ಲಿ ಸ್ಮಶಾನದ ಕೊರತೆಯಿದ್ದು, ಕಳೆದ ಹಲವು ವರ್ಷಗಳಿಂದ ನಿರಂತರ ಪ್ರತಿಭಟನೆ ನಡೆಸಿದರೂ ಪ್ರಯೋಜನವಾಗಿಲ್ಲ. ಹೈಕೋರ್ಟ್ ಹಾಗೂ ಸರಕಾರ ಸ್ಮಶಾನ ಮಂಜೂರು ಮಾಡಬೇಕು. ಗ್ರಾಮದ ನಿಜಲಿಂಗಪ್ಪನ ವ್ಯಕ್ತಿ ಪ್ರತಿನಿತ್ಯವೂ ನಿರಂತರವಾಗಿ ಆನೆಗೊಂದಿಯ ಸ್ಮಶಾನಕ್ಕಾಗಿ ಹೋರಾಟ ನಡೆಸಿ, ಮನವಿ ಪತ್ರ ಸಲ್ಲಿಸಿದ್ದಾರೆ ಎಂದರು.

ಕಂದಾಯ ಇಲಾಖೆಯ ಗ್ರಾಮ ಲೆಕ್ಕಾಧಿಕಾರಿಗಳು, ಕಂದಾಯ ನಿರೀಕ್ಷಕರು, ನಿರ್ಲಕ್ಷ್ಯ ಹೊಂದಿದ್ದು, ಸರಕಾರಿ ಗಾಂವಠಾಣ ಗೈರಾಣ ಭೂಮಿಯಲ್ಲಿ ಸಾಗುವಳಿ ಚೀಟಿ ನೀಡುವ ಅಧಿಕಾರಿಗಳು ಅತ್ಯಂತ ಅಗತ್ಯವಾದ ಗ್ರಾಮಗಳಿಗೆ ಸ್ಮಶಾನ ಭೂಮಿಯನ್ನು ಮಂಜೂರು ಮಾಡುವಲ್ಲಿ ಹಿಂದೇಟು ಹಾಕುತ್ತಿದ್ದಾರೆ. ಪ್ರತಿ ಕೆಲಸ ಕಾರ್ಯದಲ್ಲೂ ಹಣ ನಿರೀಕ್ಷಿಸಲಾಗುತ್ತದೆ. ಹಲವು ವರ್ಷಗಳಿಂದ ಗಂಗಾವತಿಯಲ್ಲಿ ಠಿಕಾಣಿ ಹೂಡಿರುವ ಕೂಡಲೇ ಕಂದಾಯ ಇಲಾಖೆಯ ಅಧಿಕಾರಿಗಳನ್ನು ವರ್ಗಾವಣೆ ಮಾಡಬೇಕೆಂದು ಆಗ್ರಹಿಸಿದರು.

ಆನೆಗೊಂದಿ ರಾಜವಂಶಸ್ಥರಾದ ಲಲಿತಾರಾಣಿ ಶ್ರೀರಂಗದೇವರಾಯಲು, ಕುಪ್ಪರಾಜು, ಟಿ.ಜಿ. ಬಾಬು, ತಿರುಕಪ್ಪ, ಕೆ.ವಿ.ಬಾಬು. ಮಲ್ಲಯ್ಯಸ್ವಾಮಿ, ಯುವರಾಜ, ಲಕ್ಷ್ಮೀನಾರಾಯಣ, ತಿರುಮಲೇಶ, ಮಂಜುನಾಥ್ ಸೇರಿ ಇತರರಿದ್ದರು.