“ರಸ್ತೆಗೆ ಇಳಿದರೆ ನೇರ ಯಮಲೋಕ್ಕೆ ಕರೆದುಕೊಂಡು ಹೋಗುವೆ” ಕೊಪ್ಪಳದಲ್ಲೊಬ್ಬರು “ಹಲೋ ಯಮ”

Team Udayavani, Apr 18, 2020, 9:40 AM IST

ಕೊಪ್ಪಳ: ಲಾಕ್ ಡೌನ್ ವೇಳೆ ಯಾರಾದ್ರೂ ರಸ್ತೆಗೆ ಇಳಿದರೆ ನೀವೆಲ್ಲರನ್ನೂ ನೇರ ಯಮಲೋಕ್ಕೆ ಕರೆದುಕೊಂಡು ಹೋಗುವೆ ಎಂದು ಇಲ್ಲೊಬ್ಬ ಯಮನ ವೇಷಧಾರಿ ಕೊಪ್ಪಳದ ವಿವಿಧ ರಸ್ತೆಯಲ್ಲಿ ಬೆಳ್ಳಂಬೆಳಗ್ಗೆ ಸುತ್ತಾಡಿ ಜನರಿಗೆ ಎಚ್ಚರಿಕೆ ಮೂಡಿಸುತ್ತಿದ್ದಾನೆ.

ಹೌದು… ಕೋವಿಡ್-19 ವೈರಸ್ ನಿಯಂತ್ರಣಕ್ಕಾಗಿ ಕೊಪ್ಪಳದ ಪೊಲೀಸರು ವಿಭಿನ್ನ ಜಾಗೃತಿ ಮೂಡಿಸುವ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ಇದಕ್ಕೆ ಮತ್ತೊಂದು ಉದಾಹರಣೆ ಎಂಬಂತೆ ವೇಷಧಾರಿ ಕುಟುಂಬದ ವ್ಯಕ್ತಿಗೆ ಯಮನ ವೇಷ ಧರಿಸಿ ರಸ್ತೆಯಲ್ಲಿ ಸುತ್ತಾಟ ನಡೆಸುವಂತೆ ಸೂಚನೆ ನೀಡಿದ ಹಿನ್ನೆಲೆಯಲ್ಲಿ ವೇಷಧಾರಿ ಕೈಯಲ್ಲಿ ತನ್ನ ವಾಹನ ಎಮ್ಮೆ ಹಿಡಿದುಕೊಂಡು ಯಾರೂ ರಸ್ತೆಗೆ ಇಳಿಯಬೇಡಿ, ಇಳಿದರೆ ನೇರವಾಗಿ ಯಮಲೋಕಕ್ಕೆ ಬರುತ್ತೀರಿ. ನಾನು ನಿಮ್ಮನ್ನ ಕರೆದುಕೊಂಡು ಹೋಗುತ್ತೇನೆ ಎಂದು ಎಚ್ಚರಿಕೆ ಮೂಡಿಸುತ್ತಾ ರಸ್ತೆಯಲ್ಲಿ ಸುತ್ತಾಟ ನಡೆಸಿ ಜನರಲ್ಲಿ ಜಾಗೃತಿ ಮೂಡಿಸಿದರು.

ಯಮನ ವೇಷಧಾರಿಯೊಂದಿಗೆ ಕೊಪ್ಪಳ ಡಿಎಸ್ಪಿ ವೆಂಕಟಪ್ಪ ನಾಯಕ್, ಬಿಜೆಪಿ ಮುಖಂಡ ಅಮರೇಶ‌ ಕರಡಿ ಸೇರಿದಂತೆ ಇತರೆ ಮುಖಂಡರು ಬೆಳಗ್ಗೆ ರಸ್ತೆಗಿಳಿದು ಎಲ್ಲರೂ ಕಡ್ಡಾಯ ವಾಗಿ ಲಾಕ್ ಡೌನ್ ನಿಯಮ ಪಾಲಿಸಿ ಎನ್ನುವ ಎಚ್ಚರಿಕೆ ನೀಡಿದರು.

ಕೋವಿಡ್-19 ವೈರಸ್ ಇಡೀ ಜಗತ್ತನ್ನು ಬೆಂಬಿಡದೆ ಕಾಡುತ್ತಿದೆ.‌ ಇದನ್ನು ದೂರ ಮಾಡಲು ಎಲ್ಲರೂ ಮನೆಯಲ್ಲೆ ಇರುವಂತೆ ಜಿಲ್ಲಾ ಪೊಲೀಸ್ ಇಲಾಖೆ ಜಾಗೃತಿ ಮೂಡಿಸುವ ವಿಭಿನ್ನ ಕಾರ್ಯ ಕೈಗೊಂಡಿದೆ.