ಇನ್ಸ್ಟಾಗ್ರಾಮ್‌ ನಲ್ಲಿ ಪರಿಚಯ: ಮುಸ್ಲಿಂ ಯುವಕನ ಜೊತೆ ಹಿಂದೂ ಯುವತಿ ವಿವಾಹ

Team Udayavani, Dec 24, 2022, 3:13 PM IST

ಕುಷ್ಟಗಿ: ಇನ್ಸ್ಟಾಗ್ರಾಮ್‌ ನಲ್ಲಿ ಪರಿಚಯವಾದ‌ ಹೈದರಾಬಾದ್‌ ಮೂಲದ ಮುಸ್ಲಿಂ ಯುವಕನೊಬ್ಬನ ಜೊತೆ ಕುಷ್ಟಗಿಯ ಹಿಂದೂ ಯುವತಿಯೊಬ್ಬಳು  ವಿವಾಹವಾಗಿರುವ ಘಟನೆ ಬೆಳಕಿಗೆ ಬಂದಿದೆ.

ಕುಷ್ಟಗಿಯ 4 ನೇ ವಾರ್ಡ್‌ ನ ಇಂದಿರಾ ನಗರದ ನಿವಾಸಿ, ಬಿಎಸ್ಸಿ ಓದುತ್ತಿದ್ದ ಯುವತಿಗೆ, ಹೈದರಾಬಾದ್‌ ಮೂಲದ ಕಾರ್ಪೆಂಟರ್ ಡಿಸೈನರ್ ಶೇಖ್‌ ವಾಹಿದ್ ನೊಂದಿಗೆ ಇನ್ಸ್ಟಾಗ್ರಾಮ್ ನಲ್ಲಿ ಪರಿಚಯವಾಗಿದೆ. ಈ ಪರಿಚಯ ಪ್ರೇಮಕ್ಕೆ ತಿರುಗಿದೆ. ಕಳೆದ ಡಿ.16 ರಂದು, ಕುಷ್ಟಗಿ ಯುವತಿ ಮನೆಯಿಂದ ನಾಪತ್ತೆಯಾಗಿದ್ದಾಳೆ.

ಅದೇ ದಿನ ಸಂಜೆ ಯುವತಿಯ ತಂದೆ ಮಗಳು ಕಾಣೆಯಾಗಿರುವ ಬಗ್ಗೆ ಸ್ಥಳೀಯ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. ದೂರಿನ ಮೇರೆಗೆ ಕುಷ್ಟಗಿಯ ಪೊಲೀಸರು, ಯುವ ಜೋಡಿಗಳನ್ನು ಶನಿವಾರ ಕುಷ್ಟಗಿ ಪೊಲೀಸ್ ಠಾಣೆಗೆ ಕರೆ ತಂದಿದ್ದು  ವಿಚಾರಣೆ ನಡೆಸಲಾಗಿದೆ.

ಶೇಖ್ ವಾಹಿದ್ ಹಾಗೂ ಯುವತಿ ಪ್ರಬುದ್ದರಾಗಿದ್ದು ಪೊಲೀಸರ ಸಮ್ಮುಖದಲ್ಲಿ ಪರಸ್ಪರ ಮದುವೆಗೆ ಸಮ್ಮತಿ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಕುಷ್ಟಗಿಯ ಪಾಲಕರು ಮಗಳ ವಿಷಯದಲ್ಲಿ‌ ಅಸಹಾಯಕರಾಗಿದ್ದಾರೆ. ಹೆಚ್ಚಿನ ವಿಚಾರಣೆಗೆ ಹೊಸ ಜೋಡಿಗಳನ್ನು ತಾವರಗೇರಾ ಪೊಲೀಸ್ ಠಾಣೆಗೆ ಕರೆದೊಯ್ಯಲಾಗಿದೆ.

ಈ ಬಗ್ಗೆ ಕುಷ್ಟಗಿ ಪಿಎಸೈ ಮೌನೇಶ ರಾಠೋಡ್ ಪ್ರತಿಕ್ರಿಯಿಸಿ, ಈ ಯುವ ಜೋಡಿಗಳು ಇನ್ಸ್ಟಾಗ್ರಾಮ್ ಮೂಲಕ ಪರಿಚಯ ಪ್ರೀತಿಗೆ ತಿರುಗಿದೆ. ನಂತರ ಹೈದರಾಬಾದ್‌ ನಲ್ಲಿ ಇಸ್ಲಾಂ ಧರ್ಮ ಒಪ್ಪಿ ಯುವತಿ, ಶೇಖ್‌ ವಾಹಿದ್ ನನ್ನು ಮದುವೆಯಾಗಿದ್ದಾಳೆ. ಬಲವಂತದ ಮದುವೆ ಅಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.