ಹನುಮಸಾಗರ ಗ್ರಂಥಾಲಯಕ್ಕೆ ಪುಸ್ತಕಗಳ ಕೊರತೆ

Team Udayavani, Oct 23, 2019, 10:38 AM IST

ಹನುಮಸಾಗರ: ಕೊಪ್ಪಳ ಜಿಲ್ಲೆಯಲ್ಲಿಯೇ ಅತಿ ದೊಡ್ಡ ಗ್ರಾಮ ಪಂಚಾಯ್ತಿ ಎಂಬ ಹೆಗ್ಗಳಿಕೆ ಹನುಮಸಾಗರ ಗ್ರಾಮಕ್ಕಿದೆ. ಆದರೆ ಇಲ್ಲಿನ ಆಶ್ರಯ ಕಾಲೋನಿಯಲ್ಲಿರುವ ಗ್ರಂಥಾಲಯ ಪುಸ್ತಕಗಳಿಲ್ಲದೇ ದೇವರಿಲ್ಲದ ಗುಡಿಯಂತಾಗಿದೆ. ಪುಸ್ತಕಗಳ ಕೊರತೆಯೇ ಇಲ್ಲಿನ ಗ್ರಂಥಾಲಯ ಪ್ರಮುಖ ಸಮಸ್ಯೆ ಆಗಿದೆ. ಈ ಸಮಸ್ಯೆಗೆ ಪೂರಕ ಎಂಬಂತೆ ಇನ್ನು ಕೆಲ ಸಮಸ್ಯೆಗಳು ಗ್ರಂಥಾಲಯಕ್ಕಿವೆ.

ಸೂಕ್ತವಾದ ಕಟ್ಟಡ ಕೊರತೆ ಇಲ್ಲದೇ ಸೋರುವ ಕಟ್ಟಡದಲ್ಲಿ ಗ್ರಂಥಾಲಯ ಕಾರ್ಯ ನಡೆಯುತ್ತಿದೆ. ಮಳೆ ಬಂದರೆ ಇಲ್ಲಿನ ಸ್ಥಿತಿ ದೇವರಿಗೆಯೇ ಪ್ರೀತಿ ಎಂಬಂತಾಗಿದೆ. ಹತ್ತು ಹಲವು ಸಮಸ್ಯೆಗಳಿಂದ ಅನಾರೋಗ್ಯ ಈಡಾಗಿರುವ ಗ್ರಂಥಾಲಯಕ್ಕೆ ಸೂಕ್ತ ಚಿಕಿತ್ಸೆ ನೀಡಬೇಕು ಎಂಬ ಒತ್ತಾಯ ಕೇಳಿ ಬಂದಿದೆ.

ಇಂಟರ್‌ನೆಟ್‌ ತಂತ್ರಜ್ಞಾನ ಯುಗದಲ್ಲಿ ಗ್ರಂಥಾಲಯ ತೆರಳುವವರು ಕಡಿಮೆಯೇ ಎನ್ನಬಹುದು. ಹಾಗಂತ ಗ್ರಾಮದಲ್ಲಿ ಓದುಗಗರ ಸಂಖ್ಯೆಗೆ ಕಡಿಕೆ ಏನಿಲ್ಲ. ತಮಗಿಷ್ಟವಾದ ಪುಸ್ತಕಗಳು ದೊರೆಯದೇ ಇರುವುದರಿಂದ ಓದುಗರರು ಗ್ರಂಥಾಲಯದತ್ತ ಮುಖ ಮಾಡುತ್ತಿಲ್ಲ ಎಂಬ ಮಾತುಗಳು ಕೇಳಿ ಬಂದಿವೆ. ಗ್ರಂಥಾಲಯದಲ್ಲಿ ಕೇವಲ ಬೆರಳೆಣಿಕೆಯಷ್ಟು ಪುಸ್ತಕಗಳು ಇವೆ. ಆ ಪುಸ್ತಕಗಳು ಸಹ ಗೆದ್ದಲು ಹತ್ತಿ ಹಾಳಾಗುತ್ತಿವೆ. ಮಳೆ ಬಂದರೇ ಸದಾ ಸೋರುವುದರಿಂದ ಪುಸ್ತಕಗಳು ಹಾಳಾಗುವ ಸ್ಥಿತಿ ತಲುಪಿವೆ. ಗ್ರಂಥಾಲಯ ನಿರ್ವಹಣೆಗೆ ಅನುದಾನ ಕೊರತೆ ಕಾಡುತ್ತಿದೆ. ಸರ್ಕಾರಿ ಜಯಂತಿಗಳ ಆಚರಣೆಗೆ ಸಿಬ್ಬಂದಿ ಸ್ವಂತ ಖರ್ಚಿನಲ್ಲಿ ಆಚರಿಸಬೇಕಾದ ಅನಿವಾರ್ಯತೆ ಉಂಟಾಗಿದೆ.

ಲಭ್ಯವಿರುವ ಕೆಲವು ಪುಸ್ತಕಗಳನ್ನು ಸುರಕ್ಷಿತವಾಗಿ ತೆಗೆದು ಇರಿಸಲಾಗಿದೆ. ಓದುಗರು ಬಂದು ತಮಗೇ ಬೇಕಾದ ಪುಸ್ತಕ ಕೇಳಿದರೆ ಮಾತ್ರ ಕೊಡಲಾಗುವುದು ಮತ್ತು ಗ್ರಂಥಾಲಯ ಸೋರುವ ಬಗ್ಗೆ ಈಗಾಲೇ ಗ್ರಾಪಂ ಅವರಿಗೆ ಮನವಿ ಸಲ್ಲಿಸಲಾಗಿದೆ. ಇಲ್ಲಿಯವರೆಗೆ ದುರಸ್ತಿ ಕಾರ್ಯ ಆಗಿಲ್ಲ ಎಂದು ಗ್ರಂಥಾಲಯ ಮೇಲ್ವಿಚಾರಕಿ ಅಸಾಯಕತೆ ವ್ಯಕ್ತಪಡಿಸಿದರು.

ಪದವಿ ಮುಗಿಸಿ ಕೆಲಸವಿಲ್ಲದೇ ಉದ್ಯೋಗ ಹೊಂದುವ ಸಲುವಾಗಿ ಗ್ರಂಥಾಲಯದ ಕಡೇ ಮುಖ ಮಾಡಿದರೇ ಗ್ರಂಥಾಲಯದಲ್ಲಿ ಯಾವುದೇ ವಿಧವಾದ ಸ್ಪರ್ಧಾತ್ಮಕ ಪರೀಕ್ಷೆಗೆ ಸಿದ್ಧಗೊಳ್ಳಲು ಬೇಕಾದ ಅವಶ್ಯ ವಾರ ಪತ್ರಿಕೆ, ಮಾಸಪತ್ರಿಕೆ ಸಾಮಾನ್ಯ ಜ್ಞಾನದ ಪುಸ್ತಕಗಳು ಸಿಗುತ್ತಿಲ್ಲ ಎಂದು ಓದುಗಗರು ಬೇಸರ ವ್ಯಕ್ತಪಡಿಸಿದ್ದಾರೆ.

ಯುವಕರು ಹಣ ಖರ್ಚು ಮಾಡಿ ಉದ್ಯೋಗ ಮಾಹಿತಿ ಇರುವ ಪತ್ರಿಕೆ ಮತ್ತು ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಬೇಕಾಗುವ ಪುಸ್ತಕ ಓದಲು ಪಟ್ಟಣ ಹಾಗೂ ನಗರ ಪ್ರದೇಶಗಳತ್ತ ಮುಖ ಮಾಡಿರುವುದು ಸಹ ಗ್ರಂಥಾಲಯದ ಓದುಗರ ಸಂಖ್ಯೆ ಇಳಿಮುಖವಾಗಲು ಪ್ರಮುಖ ಕಾರಣ ಎಂಬುದು ಓದುಗರರ ಅಭಿಪ್ರಾಯ. ಪುಸ್ತಕಗಳಿಂದ ತುಂಬಿರಬೇಕಾದ ಗ್ರಂಥಾಲಯದಲ್ಲಿ ಪುಸ್ತಕಗಳೇ ಇಲ್ಲ. ಹೀಗಾಗಿ ಅಲ್ಲಿಗೆ ಹೋದರೆ ಏನು ಪ್ರಯೋಜನ ಸಿಗಲ್ಲ. ಬಡ ವಿದ್ಯಾರ್ಥಿಗಳು, ಹಿರಿಯ ಓದುಗರರಿಗೆ ಅನುಕೂಲವಾಗಬೇಕಿದ್ದ ಗ್ರಂಥಾಲಯದಲ್ಲಿ ಪುಸ್ತಕಗಳು ಕೊರತೆ ಇರುವುದು ನಿಜಕ್ಕೂ ಬೇಸರ ತರಿಸಿದೆ. ಸಂಬಂಧಿಸಿದವರು ತಕ್ಷಣ ಇಲ್ಲಿನ ಸಮಸ್ಯೆಗೆ ಸ್ಪಂದಿಸಬೇಕು ಎಂಬುದು ಓದುಗಗರು ಆಗ್ರಹ.

ಜಿಲ್ಲೆಯ ಕೆಲವು ಗ್ರಂಥಾಲಯಗಳಿಗೆ ಮಾತ್ರ ಝೆರಾಕ್ಸ್‌ ಯಂತ್ರಗಳು ಸರಬರಾಜು ಆಗಿವೆ. ಅದರಲ್ಲಿ ಹನುಮಸಾಗರವೂ ಒಂದು. ಝೆರಾಕ್ಸ್‌ ಯಂತ್ರ ಹಾಗೂ ಬ್ಯಾಟರಿ ಸೌಲಭ್ಯ ಹೊಂದಿದ್ದರೂ ಇವರೆಗೆ ಝೆರಾಕ್ಸ್‌ ಯಂತ್ರ ಕಾರ್ಯ ನಿರ್ವಹಿಸಿಲ್ಲ. ಹೀಗಾಗಿ ಅದನ್ನು ಬಳಕೆ ಮಾಡದೇ ಹಾಗೇ ಇಡಲಾಗಿದೆ ಎಂದು ಓದುಗರರು ಬೇಸರ ವ್ಯಕ್ತಪಡಿಸಿದ್ದಾರೆ.

ಸರಕಾರದಿಂದ ಅ ಧಿಕೃತವಾಗಿ ಗ್ರಂಥಾಲಯಗಳನ್ನು ಗ್ರಾಪಂ ಅಧಿಧೀನಕ್ಕೆ ನೀಡುವ ಪ್ರಕ್ರಿಯೆ ಬಹುತೇಕ ಪೂರ್ಣಗೊಂಡಿದೆ. ಆದ್ದರಿಂದ ಗ್ರಂಥಾಲಯಕ್ಕೆ ಅವಶ್ಯವಿರುವ ಪುಸ್ತಕಗಳನ್ನು ಮತ್ತು ಗ್ರಂಥಾಲಯ ಕಟ್ಟಡ ದುರಸ್ತಿ ಹಾಗೂ ಇನ್ನಿತರೇ ವ್ಯವಸ್ಥೆಯನ್ನು ಗ್ರಾಪಂ ನೋಡಿಕೊಳ್ಳುತ್ತದೆ.  –ನರಸಿಂಹಮೂರ್ತಿ, ಜಿಲ್ಲಾ ಗ್ರಂಥಾಲಯಗಳ ಮೇಲ್ವಿಚಾರಕರು.

-ವಸಂತಕುಮಾರ ವಿ. ಸಿನ್ನೂರ