ಸಂಗಾಪೂರ ಕೆರೆಯಲ್ಲಿ ವ್ಯಕ್ತಿ ಅನುಮಾನಾಸ್ಪದ ಸಾವು: ಕೋವಿಡ್ ಪರೀಕ್ಷೆಗೆ  ಸಿದ್ದತೆ

Team Udayavani, Jul 18, 2020, 11:22 AM IST

ಗಂಗಾವತಿ: ಇಲ್ಲಿನ ಸಂಗಾಪೂರ ಕೆರೆಯಲ್ಲಿ ಸುಮಾರು 43 ವರ್ಷದ ವ್ಯಕ್ತಿ ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದು, ಕೋವಿಡ್ ಭೀತಿಯಲ್ಲಿ ಗ್ರಾಮಸ್ಥರು ಭಯಭೀತಗೊಂಡಿದ್ದಾರೆ.

ಸಂಗಾಪೂರ ಕೆರೆಯ ಹೂಳು ಎತ್ತುವ ಕಾರ್ಯ ಭರದಿಂದ ನಡೆಯುತ್ತಿದೆ. ಕಳೆದ ನಾಲ್ಕು ದಿನಗಳ ಹಿಂದೆ ಇಲ್ಲಿ ಈ ಅಪರಿಚಿತ ವ್ಯಕ್ತಿಯನ್ನು ಯಾರೋ ಬಿಟ್ಟು ಹೋಗಿದ್ದರು. ಆತ ನಡೆದಾಡಲು ಅಶಕ್ತನಾಗಿದ್ದ, ಮೈಮೇಲೆ ಬಟ್ಟೆಗಳಿರಲಿಲ್ಲ, ಕೆರೆ ಹೂಳು ಎತ್ತುವ ರೈತರು ವಿಷಯವನ್ನು ಸಂಗಾಪೂರ ಗ್ರಾ.ಪಂ ಪಿಡಿಒ ಅವರ ಗಮನಕ್ಕೆ ತಂದ ತಕ್ಷಣ ಅಪರಿಚಿತ ವ್ಯಕ್ತಿಗೆ ಬಟ್ಟೆ ತೊಡಿಸಲಾಗಿತ್ತು.

ಶನಿವಾರ ಬೆಳಗಿನ ಜಾವ ಆ ಅಪರಿಚಿತ ವ್ಯಕ್ತಿ ಕೆರೆಯಲ್ಲಿ ಮೃತನಾಗಿ ಪತ್ತೆಯಾಗಿದ್ದಾನೆ.

ಕೋವಿಡ್ ಪರೀಕ್ಷೆ: ಸಂಗಾಪೂರ ಕೆರೆಯಲ್ಲಿ ಅಪರಿಚಿತ ವ್ಯಕ್ತಿ ಸಾವನ್ನಪ್ಪಿದ್ದು ಮೃತ ವ್ಯಕ್ತಿಯ ಶವವನ್ನು ಕೋವಿಡ್ ಪರೀಕ್ಷೆಗೆ ಒಳಪಡಿಸಲು ಜಿಲ್ಲಾಧಿಕಾರಿಗಳ ಗಮನಕ್ಕೆ ತಂದಿದ್ದು, ಮೃತ ವ್ಯಕ್ತಿಯ ಸ್ವಾಬ್ ಪಡೆದು ಬಳಿಕ ಅಂತ್ಯ ಸಂಸ್ಕಾರಕ್ಕೆ ಸಿದ್ದತೆ ಮಾಡಿಕೊಳ್ಳಲಾಗುತ್ತಿದೆ ಎಂದು ತಹಸೀಲ್ದಾರ್ ಎಲ್.ಡಿ. ಚಂದ್ರಕಾಂತ ಉದಯವಾಣಿ ತಿಳಿಸಿದ್ದಾರೆ.