ಅಧಿಕಾರಿಗಳು ಮೇಲಿಂದ ಬಂದವರೇನು: ರಾಯರಡ್ಡಿ

Team Udayavani, Mar 18, 2018, 6:35 AM IST

ಕೊಪ್ಪಳ: ಐಪಿಎಸ್‌ ಅಧಿಕಾರಿಗಳೇನು ಸರ್ಕಾರಕ್ಕಿಂತ ದೊಡ್ಡವರಾ? ಅವರೇನು ಮೇಲಿಂದ ಬಂದವರಾ? ಮಾಧ್ಯಮಗಳೇ ಅವರನ್ನು ಹೀರೋ ಮಾಡುತ್ತಿವೆ..-ಹೀಗಂದವರು ಉನ್ನತ ಶಿಕ್ಷಣ ಸಚಿವ ಬಸವರಾಜ ರಾಯರಡ್ಡಿ.

ನಗರದಲ್ಲಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಸರ್ಕಾರ ಯಾವುದೇ ಪೊಲೀಸ್‌ ಅಧಿಕಾರಿಯನ್ನು ತಿಂಗಳಲ್ಲ, 9 ದಿನಕ್ಕೇ ವರ್ಗ ಮಾಡಿದರೂ ಅವರು ವರ್ಗಾವಣೆಯಾದ ಸ್ಥಳಕ್ಕೆ ತೆರಳಬೇಕು. ಸರ್ಕಾರ ಆಡಳಿತಾತ್ಮಕ ಹಿತದೃಷ್ಟಿಯಿಂದ ಹಾಗೂ ಅವಶ್ಯವಿರುವ ಕಡೆ ಅವರನ್ನು ವರ್ಗಾವಣೆ ಮಾಡಿರುತ್ತದೆ. ಸರ್ಕಾರಕ್ಕಿಂತ ಅವರೇನು ದೊಡ್ಡವರಲ್ಲ. ವರ್ಗಾವಣೆ ಪ್ರಶ್ನಿಸಿ ಬೇಕಿದ್ದರೆ ಸಿಎಟಿ ಮೊರೆ ಹೋಗಲು ಕಾನೂನಿನಲ್ಲಿ ಅವಕಾಶವಿದೆ ಎಂದರು.

ರಾಜ್ಯದಲ್ಲಿ ಈ ಬಾರಿ ಜಾತಿ ಲೆಕ್ಕಾಚಾರದಲ್ಲಿ ಚುನಾವಣೆ ನಡೆಯಲ್ಲ. ಜಾತಿ ಕಾರ್ಡ್‌ ವಕೌìಟ್‌ ಆಗಲ್ಲ. ಜಾತಿ ಲೆಕ್ಕಾಚಾರದಲ್ಲಿ ಚುನಾವಣೆ ನಡೆಯುತ್ತದೆ ಎಂದು ಎಲ್ಲರೂ ಸುಮ್ಮನೆ ಮಾತನಾಡುತ್ತಿದ್ದಾರೆ. ನನ್ನ ಕ್ಷೇತ್ರದಲ್ಲಂತೂ ಈ ಬಾರಿ ಜಾತಿ ಲೆಕ್ಕಾಚಾರ ನಡೆಯಲ್ಲ. ಯಾವ ವ್ಯಕ್ತಿಯೂ ಜಾತಿ ಹಾಗೂ ಹಣ ಕೇಳಲ್ಲ. ಸುಮ್ಮನೆ ನಮ್ಮಂತಹ ರಾಜಕಾರಣಿಗಳು ಜನರಿಗೆ ಹಣ, ಹೆಂಡ ಕೊಟ್ಟು ಅವರನ್ನು ನಾವೇ ಕೆಡಿಸಿದ್ದೇವೆ ಎಂದರು.