Twin Brothers ಅಜಯ್- ವಿಜಯ್; 12 ವರ್ಷದವರು ತಲಾ 78 ಕೆ.ಜಿ. ಭಾರ ಎತ್ತಿದರು!

Team Udayavani, Sep 2, 2023, 10:37 PM IST

ಕುಷ್ಟಗಿ:ಕುಷ್ಟಗಿಯ 12 ವರ್ಷ ಅವಳಿ ಪೋರರು, ರಾಯಚೂರು ಜಿಲ್ಲೆ ಮಸರಕಲ್ಲ ಮರಸಲಿಂಗೇಶ್ವರ ಜಾತ್ರಾ ಮಹೋತ್ಸವದಲ್ಲಿ 78 ಕೆ.ಜಿ. ಭಾರ ಎತ್ತುವ ಮೂಲಕ ವೇಟ್ ಲಿಪ್ಟಿಂಗ್ ಭರವಸೆ ಕ್ರೀಡಾಪಟುಗಳಾಗಿ ಮಿಂಚಿದ್ದಾರೆ.

ಯುವಕರು 50 ಕೆ.ಜಿ. ಭಾರ ಹೊರಲು ತಿಣಕಾಡುವ ಇಂದಿನ ದಿನಮಾನಗಳಲ್ಲಿ ಅವಳಿ ಸಹೋದರರು, ತಮ್ಮ ವಯಸ್ಸಿಗೂ ಮೀರಿ ಸಾಮರ್ಥ್ಯ ಪ್ರದರ್ಶಿಸಿ, ಅಚ್ಚರಿಗೊಳಿಸಿದ್ದಾರೆ. ಕುಷ್ಟಗಿಯ ನಿವಾಸಿ ಮರಸಣ್ಣ ತಾಳದ್ ಅವರ ಅವಳಿ ಪುತ್ರರಾದ ಅಜಯ್-ವಿಜಯ್ ಅವರು, ಕಳೆದ ವರ್ಷ ಮರಸಲಿಂಗೇಶ್ವರ ಜಾತ್ರೆಯಲ್ಲಿ ತಮ್ಮ 11ನೇ ವಯಸ್ಸಿನಲ್ಲಿ 50 ಕೆ.ಜಿ. ಧಾನ್ಯದ ಚೀಲ ಎತ್ತಿ ಗಮನ ಸೆಳೆದಿದ್ದರು.

ಶನಿವಾರ ಇದೇ ಜಾತ್ರಾ ಮಹೋತ್ಸವದಲ್ಲಿ 78 ಕೆ.ಜಿ. ಭಾರದ ಕಲ್ಲುಗಳನ್ನು ಎತ್ತಿದರು. ಅವಳಿ ಸಹೋದರರು, ಶ್ರೀರಾಮನಗರದಲ್ಲಿ 7ನೇ ತರಗತಿಯಲ್ಲಿ ಓದುತ್ತಿದ್ದು, ಭವಿಷ್ಯದ ವೇಟ್ ಲಿಫ್ಟಿಂಗ್ ನಲ್ಲಿ ಭರವಸೆ ಮೂಡಿಸಿದ್ದಾರೆ.