ಯಾರೆ ನೀನು ಭುವನ ಮೋಹಿನಿ!ಯುವತಿಯ ಯಕ್ಷ ವೀಡಿಯೋ ವೈರಲ್

Team Udayavani, May 20, 2019, 12:02 PM IST

ಚೈತ್ರಾ ಶೆಟ್ಟಿ

ಮಲ್ಪೆ: ಮದುವೆಯ ಮುನ್ನಾ ದಿನದ ಮೆಹಂದಿ ಶಾಸ್ತ್ರದಲ್ಲಿ ಬಡಗುತಿಟ್ಟಿನ ‘ಯಾರೆ ನೀನು ಭುವನ ಮೋಹಿನಿ’ ಹಾಡಿಗೆ ಕಡೆಕಾರಿನ ಯುವ ಕಲಾವಿದೆ ಚೈತ್ರಾ ವಿ. ಶೆಟ್ಟಿ ಅವರು ಹೆಜ್ಜೆ ಹಾಕಿರುವ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿ ರಾಜ್ಯಾದ್ಯಂತ ಸುದ್ದಿಯಾಗಿದೆ.

ಬಿಎಸ್ಸಿ ನರ್ಸಿಂಗ್‌ ಪದವೀಧರೆ ಚೈತ್ರಾ ಮೇ 15ರಂದು ಕಟಪಾಡಿ ಸಮೀಪದ ಕುರ್ಕಾಲಿನ ನೂಜಿಮನೆಯಲ್ಲಿ ನಡೆದ ಮೆಹಂದಿ ಕಾರ್ಯಕ್ರಮದಲ್ಲಿ ಸಂಬಂಧಿಕರ ಒತ್ತಾಯಕ್ಕೆ ಮಣಿದು ಯಕ್ಷಗಾನ ಹಾಡಿಗೆ ಹೆಜ್ಜೆ ಹಾಕಿದ್ದರು. ಇದು ವಾಟ್ಸ್‌ಆ್ಯಪ್‌ ಸಹಿತ ಸಾಮಾಜಿಕ ಜಾಲತಾಣಗಳಲ್ಲಿ ಓಡಾಡುತ್ತಿದ್ದು, ಲಕ್ಷಾಂತರ ಮಂದಿ ವೀಕ್ಷಿಸಿ ಮೆಚ್ಚಿದ್ದಾರೆ.

ಚೈತ್ರಾ 7ನೇ ತರಗತಿಯಲ್ಲಿರುವಾಗಲೇ ಯಕ್ಷಗಾನದ ಬಗ್ಗೆ ಆಸಕ್ತಿ ಹೊಂದಿ ರಾಜೀವ ತೋನ್ಸೆ ಅವರಲ್ಲಿ ಹೆಜ್ಜೆಗಾರಿಕೆ ಅಭ್ಯಾಸ ಮಾಡಿದ್ದಾರೆ. ಗಂಗಾಧರ ಜಿ. ಕಡೆಕಾರ್‌ ಅವರ ನೇತೃತ್ವದ ದುರ್ಗಾಂಬಿಕಾ ಮಹಿಳಾ ಯಕ್ಷಗಾನ ತಂಡದಲ್ಲೂ ಪ್ರಮುಖ ವೇಷಧಾರಿ, ಚೆಂಡೆ ವಾದಕಿ ಆಗಿದ್ದಾರೆ.