ಮಗನ ಗೆಲುವಿಗಾಗಿ ಸಿಎಂ ಕುತಂತ್ರ: ಸುಮಲತಾ

Team Udayavani, Apr 13, 2019, 5:33 PM IST

ಕೆ.ಆರ್‌.ಪೇಟೆ: ಒಂದು ರಾಜ್ಯದ ಮುಖ್ಯಮಂತ್ರಿಗಳಾಗಿರುವ ಕುಮಾರಸ್ವಾಮಿಯವರು ರಾಜ್ಯದ ಅಭಿವೃದ್ಧಿ ಅಥವಾ ಇತರೆ

ಕ್ಷೇತ್ರಗಳ ಚುನಾವಣಾ ಕೆಲಸ ಮಾಡುವುದನ್ನು ಬಿಟ್ಟು ಮಂಡ್ಯ ಜಿಲ್ಲೆಯಲ್ಲಿ ಮಗನ ಗೆಲುವಿಗಾಗಿ ಕುತಂತ್ರ ನಡೆಸುತ್ತಿದ್ದಾರೆ ಎಂದು ಪಕ್ಷೇತರ ಅಭ್ಯರ್ಥಿ ಸುಮಲತಾ ತಿಳಿಸಿದರು.

ತಾಲೂಕಿನ ಸಿಂಧುಘಟ್ಟ ಗ್ರಾಮದಲ್ಲಿ ಚುನಾವಣಾ ಪ್ರಚಾರ ನಡೆಸಿ ಮಾತನಾಡಿ, ಒಬ್ಬ ಹೆಣ್ಣು ಮಗಳಾದ ನನ್ನನ್ನು ಸೋಲಿಸಿ ತಮ್ಮ ಮಗನನ್ನು ಗೆಲಿಸಿಕೊಳ್ಳುವ ಏಕೈಕ ಉದ್ದೇಶದಿಂದ ಮುಖ್ಯಮಂತ್ರಿಗಳು ರಾಜ್ಯದ ಎಲ್ಲಾ ಕೆಲಸಗಳನ್ನು ಬಿಟ್ಟು ಮಂಡ್ಯ ಜಿಲ್ಲೆಯಲ್ಲಿಯೆ ವಾಸ್ತವ್ಯ ಹೂಡಿ ಕುತಂತ್ರ ಹೆಣೆಯುತ್ತಿದ್ದಾರೆ. ಆದರೆ ಜನರು ಅವರಿಗೆ ತಕ್ಕಪಾಠ ಕಲಿಸಲು ಈಗಾಗಲೆ ನಿಶ್ಚಯ ಮಾಡಿದ್ದು, ಯಾರು ಏನೆ ಕುತಂತ್ರ ಮಾಡಿದರೂ ಪ್ರಯೋಜನವಾಗುವುದಿಲ್ಲ ಎಂದು ಹೇಳಿದರು.

ಸಾವಿರ ರೂ.ಗಳಿಂದ ಮನೆ ಕಟ್ಟಲಾಗದು: ಚುನಾವಣೆಯ ಹಿಂದಿನ ದಿನ ಜಿಲ್ಲೆಯಲ್ಲಿ ಹಣದ ಹೊಳೆಯನ್ನೆ ಹರಿಸಲು ಜೆಡಿಎಸ್‌ ಪಕ್ಷದವರು ಸಕಲ ಸಿದ್ಧತೆ ಮಾಡಿಕೊಂಡಿದ್ದಾರೆಂಬ ಮಾಹಿತಿ ಬಂದಿದೆ.

ಆದರೆ ಅವರು ನೀಡುವ 500 ಅಥವಾ 1000 ರೂ.ಗಳಿಂದ ಮತದಾರರು ಮಗಳ ಮದುವೆ ಮಾಡಲು ಸಾಧ್ಯವಾ ಅಥವಾ ಮನೆ ಕಟ್ಟಿಕೊಳ್ಳಲು ಆಗುತ್ತಾ, ಮತ್ತೆ ಏಕೆ ಚಿಲ್ಲರೆ ಕಾಸಿಗೆ ನಿಮ್ಮ ಸ್ವಾಭಿಮಾನ ಬಿಡಬೇಕು ಎಂದು ಸಾರ್ವಜನಿಕರನ್ನು ಪ್ರಶ್ನಿಸಿದ ಅವರು, ತಮ್ಮ ಅಮೂಲ್ಯ ಮತವನ್ನು ಮಾರಾಟ ಮಾಡಿ ಕೊಳ್ಳಬೇಡಿ. ಅವರು ನಿಮಗೆ 500 ರೂ. ಕೊಟ್ಟು ಚುನಾವಣೆಯಲ್ಲಿ ಗೆದ್ದರೆ ಐದು ಸಾವಿರ ಸಂಪಾದನೆ ಮಾಡಲು ಭ್ರಷ್ಟಾಚಾರ ಮಾಡುತ್ತಾರೆ. ಆಗ ನಿಮ್ಮದೆ ತೆರಿಗೆ ಹಣ ಕಳ್ಳರ ಪಾಲಾಗುತ್ತದೆ. ಆದ್ದರಿಂದ ಹಣ ಪಡೆದು ಮತ ನೀಡುವ ಬದಲು ಅಭಿವೃದ್ಧಿಯನ್ನು ಮನಸ್ಸಿನಲ್ಲಿಟ್ಟುಕೊಂಡು ಸ್ವಾಭಿಮಾನದಿಂದ ಮತ ಚಲಾವಣೆ ಮಾಡಬೇಕು ಎಂದು ಮನವಿ ಮಾಡಿದರು.

ಯೋಧರ ಅಪಮಾನ ಕ್ಷಮಿಸಲಾಗದು: ನಮ್ಮ ದೇಶ ಹಾಗೂ ನಮ್ಮನ್ನು ರಕ್ಷಣೆ ಮಾಡಲು ತಮ್ಮ ಕುಟುಂಬಗಳನ್ನು ಬಿಟ್ಟು ಮಳೆ, ಗಾಳಿ, ಚಳಿ ಮತ್ತು ಸುಡು ಬಿಸಿಲಿನಲ್ಲಿ ನಮ್ಮ ದೇಶವನ್ನು ಕಾಯುತ್ತಿರುವ ವೀರ ಯೋಧರನ್ನು ಎರಡು ಹೊತ್ತಿನ ಊಟಕ್ಕೆ ಗತಿ ಇಲ್ಲದವರು ಸೈನ್ಯಕ್ಕೆ ಸೇರುತ್ತಾರೆ ಎಂದು ಹೇಳುವ ಮೂಲಕ ಯೋಧರಿಗೆ ಮುಖ್ಯಮಂತ್ರಿಗಳು ಅಪಮಾನ ಮಾಡಿದ್ದಾರೆ. ಇಂತಹವರಿಂದ ನಾವು ಯಾವ ನ್ಯಾಯಪರ ಕೆಲಸಗಳನ್ನು ಪಡೆದುಕೊಳ್ಳಲು ಸಾಧ್ಯ ಎಂದು ಕುಟುಕಿದರು.

8 ಸಾವಿರ ದೇಣಿಗೆ: ಚುನಾವಣಾ ಪ್ರಚಾರ ವೇಳೆ ಪಕ್ಷೇತರ ಅಭ್ಯರ್ಥಿ ಸುಮಲತಾ ಅವರಿಗೆ ಚುನಾವಣಾ ವೆಚ್ಚಕ್ಕಾಗಿ ಸಿಂಧುಘಟ್ಟ ಗ್ರಾಮಸ್ಥರು 8 ಸಾವಿರ ರೂ. ಹಣ ಸಂಗ್ರಹಿಸಿ ದೇಣಿಗೆ ನೀಡಿದರು.

ನಿಮ್ಮೊಂದಿಗೆ ನಾವಿದ್ದೇವೆ: ತಾಲೂಕಿನ ಮೈನಹಳ್ಳಿಯಲ್ಲಿ ಸುಮಲತಾ ಚುನಾವಣಾ ಪ್ರಚಾರ ಮಾಡುತ್ತಿದ್ದ ಸಮಯದಲ್ಲಿ ಮಾತನಾಡಿದ ಸಚಿವ ರೇವಣ್ಣ ಸುಮಲತಾ ಬಗ್ಗೆ ಮಾತನಾಡಿದ್ದಕ್ಕ ಪ್ರತಿಕ್ರಿಯಿಸಿರುವ ಲಕ್ಷ್ಮಮ್ಮ, ನಾನು ಗಂಡನನ್ನು ಕಳೆದುಕೊಂಡು ಗಂಡನಿಲ್ಲದ ನೋವನ್ನು ಅನುಭವಿಸುತ್ತಿರುವೆ. ನೀವೂ ಸಹ ನನ್ನಂತೆ ನೋವು ಅನುಭವಿಸುತ್ತಿರುವವರು. ನಿಮ್ಮೊಂದಿಗೆ ನಾವೆಲ್ಲಾ ಮಹಿಳೆಯರು ಇರುತ್ತೇವೆ. ಧೈರ್ಯದಿಂದ ಇರಿ. ಗೆಲುವು ನಿಮ್ಮದೇ ಎಂದು ಸುಮಲತಾ ಅವರಿಗೆ ಸಾಂತ್ವನ ಹೇಳಿ, ರೇವಣ್ಣ ರಾಜ್ಯದ ಮಹಿಳೆಯರಲ್ಲಿ ಕ್ಷಮೆ ಕೇಳಬೇಕು ಎಂದು ಒತ್ತಾಯಿಸಿದರು.

ಈ ಸಂದರ್ಭದಲ್ಲಿ ರಾಜ್ಯ ರೈತ ಸಂಘದ ಮುಖಂಡರಾದ ರಾಜೇಗೌಡ, ಜಯರಾಮ್‌, ತಾಲೂಕು ಅಧ್ಯಕ್ಷ ಮರುವನಹಳ್ಳಿಶಂಕರ್‌, ಅಂಗಡಿನಾಗರಾಜ್‌, ಮನ್‌ಮುಲ್‌ ನಿರ್ದಶಕ ಅಂಬರೀಶ್‌, ಬಿಜೆಪಿ ಮುಖಂಡ ದಿನೇಶ್‌, ವಿನಯ್‌ಕುಮಾರ್‌, ಸಿಂಧುಘಟ್ಟ ಕುಮಾರ್‌ ಸೇರಿದಂತೆ ನೂರಾರು ಕಾರ್ಯಕರ್ತರು ಹಾಜರಿದ್ದರು.