ಜೆಡಿಎಸ್‌ ಕಾರ್ಯಕರ್ತರ ಕಡೆಗಣನೆ

Team Udayavani, Oct 28, 2020, 2:44 PM IST

ನಾಗಮಂಗಲ: ತಾಲೂಕಿನಲ್ಲಿ ಮೂಲ ಜೆಡಿಎಸ್‌ ಕಾರ್ಯಕರ್ತರೂ ಸೇರಿದಂತೆ ಮುಖಂಡರನ್ನು ಶಾಸಕ ಸುರೇಶ ಗೌಡ ಅವರು ಕಡೆಗಣಿಸುತ್ತಿದ್ದಾರೆ ಎಂದು ಮಾಜಿಸಂಸದ ಎಲ್‌.ಆರ್‌.ಶಿವರಾಮೇಗೌಡ ಆರೋಪಿಸಿದರು.

ಪಟ್ಟಣದ ತಮ್ಮ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿ, ಶಾಸಕ ಸುರೇಶ ಗೌಡರು ಚುನಾ ವಣೆ ನಂತರದಲ್ಲಿ ತಮ್ಮ ನಡವಳಿಕೆಯನ್ನು ಬದಲಿಸಿ ಕೊಂಡಿದ್ದು, ಚುನಾವಣೆಯಲ್ಲಿ ದುಡಿದ ಮುಖಂ ಡರು, ಜೆಡಿಎಸ್‌ ಮೂಲ ಕಾರ್ಯಕರ್ತರನ್ನು ಸಂಪೂರ್ಣವಾಗಿ ಕಡೆಗಣಿಸಿದ್ದಾರೆ. ಈ ಬಗ್ಗೆ ಹೈಕ ಮಾಂಡ್‌ ಗಮನಕ್ಕೆ ತಂದರು ಅವರು ಮೌನವಾಗಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಮುಖಂಡರನ್ನು ವಿಶ್ವಾಸಕ್ಕೆ ತೆಗೆದುಕೊಂಡಿಲ್ಲ: ಕಳೆದ ವಿಧಾನಸಭಾ ಚುನಾವಣೆ ವೇಳೆ ಮಾಜಿ ಸಿಎಂ ಎಚ್‌ .ಡಿ.ಕುಮಾರಸ್ವಾಮಿ ನೇತೃತ್ವದಲ್ಲಿ ಎಲ್ಲರೂ ಒಗ್ಗಟ್ಟಾಗಿ ದುಡಿದ ಪರಿಣಾಮವೇ ಜಿಲ್ಲೆ ಯಲ್ಲಿ ಏಳು ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಲು ಸಾಧ್ಯ ವಾಯಿತು. ನಾಗಮಂಗಲದಲ್ಲಿ ಅಪ್ಪಾಜಿಗೌಡ, ಶ್ರೀಕಂಠೇಗೌಡ, ಜವರೇಗೌಡ ಸೇರಿದಂತೆ ಅನೇಕ ಜೆಡಿ ಎಸ್‌ ಮುಖಂಡರ ಒಗ್ಗಟ್ಟು ಮತ್ತು ಪರಿಶ್ರಮ ದಿಂದ 50 ಸಾವಿರ ಮತಗಳ ಅಂತರದಲ್ಲಿ ಸುರೇಶ್‌ ಗೌಡರನ್ನು ಗೆಲ್ಲಿಸಿದರು. ಆದರೆ, ಗೆದ್ದ ನಂತರ ಕ್ಷೇತ್ರದ ಶಾಸಕರು ಮೂಲ ಜೆಡಿಎಸ್‌ ಕಾರ್ಯಕರ್ತರು ಸೇರಿದಂತೆ ಚುನಾವಣೆಗಾಗಿ ದುಡಿದ ಮುಖಂಡರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳುತ್ತಿಲ್ಲ ಎಂದು ತಿಳಿಸಿದರು.

ಜೆಡಿಎಸ್‌ ಅಧ್ಯಕ್ಷ ಇಲ್ಲ: ನಾಗಮಂಗಲ ತಾಲೂಕಿನ ಜೆಡಿಎಸ್‌ ಪಕ್ಷದ ಅಧ್ಯಕ್ಷ ಜವರೇಗೌಡ ರಾಜೀನಾಮೆ ನೀಡಿ, ಎರಡು ವರ್ಷ ಕಳೆದರೂ, ಇನ್ನು ಅಧ್ಯಕ್ಷರ ನೇಮಕವಾಗಿಲ್ಲ. ಇತ್ತೀಚೆಗೆ ನಡೆದ ಟಿಎಪಿಸಿಎಂ ಎಸ್‌ ಮತ್ತು ಪಿಎಲ್‌ಡಿ ಬ್ಯಾಂಕ್‌ ಚುನಾವಣೆಯಲ್ಲಿ ನನ್ನನ್ನು ಸೇರಿದಂತೆ ಎಂಎಲ್‌ಸಿ ಅಪ್ಪಾಜಿಗೌಡರನ್ನು ವಿಶ್ವಾಸಕ್ಕೆ ಶಾಸಕ ಸುರೇಶ್‌ಗೌಡ ತೆಗೆದುಕೊಳ್ಳಲಿಲ್ಲ. ಪರಿಣಾಮ ಇವೆರಡೂ ಚುನಾವಣೆಯಲ್ಲಿ ಜೆಡಿಎಸ್‌ ಅಭ್ಯರ್ಥಿಗಳು ಸಂಪೂರ್ಣ ನೆಲಕಚ್ಚುವಂತಾಯಿತು. ಸಂಪರ್ಕ ಸೇತುವಾಗಬೇಕಿದ್ದ ಅಧ್ಯಕ್ಷರೇ ಕ್ಷೇತ್ರದಲ್ಲಿ ಇಲ್ಲದಿರುವುದು ಈ ಹಿನ್ನೆಡೆಗೆ ಕಾರಣ ಎಂದು ಹೇಳಿದರು.

ಗಮನಕ್ಕೆ ತಂದರೂ ಪ್ರಯೋಜನವಿಲ್ಲ: ಶಾಸಕ ಸುರೇಶ್‌ ಗೌಡರ ನಡೆಯನ್ನು ಪಕ್ಷದ ವರಿಷ್ಠರ ಗಮನಕ್ಕೆ ತಂದರೂ ಪ್ರಯೋಜನವಾಗಿಲ್ಲ. ಚುನಾವಣೆ ಗೆಲ್ಲುವಾಗ ನಮ್ಮೆಲ್ಲರನ್ನು ವಿಶ್ವಾಸಕ್ಕೆ ತೆಗೆದು ಕೊಂಡು ಒಗ್ಗೂಡಿಸಿದಂತೆ ಈಗಲೂ ತಾಲೂಕಿನಲ್ಲಿರುವ ಮುಖಂಡರ ನಡುವಿನ ಗೊಂದಲ ಸರಿ ಪಡಿಸ ಬೇಕು. ಶಾಸಕರನ್ನು ಕರೆದು ಎಲ್ಲರನ್ನು ಒಟ್ಟಿಗೆ ತೆಗೆದುಕೊಂಡು ಹೋಗುವಂತೆ ಸೂಚಿಸ  ಬೇಕು. ವರಿಷ್ಠರು ಶಾಸಕರ ನಡುವಳಿಕೆ ಸರಿಪಡಿಸುವುದನ್ನು ಬಿಟ್ಟು ಮೌನಕ್ಕೆ ಶರಣಾಗಿರುವುದು ಸರಿಯಲ್ಲ ಎಂದರು.

ರಾಜ್ಯ ಪಡಿತರ ವಿತರಕರ ಸಂಘದ ರಾಜ್ಯಾಧ್ಯಕ್ಷ ಹಾಗೂ ಜೆಡಿಎಸ್‌ ಪ್ರಧಾನ ಕಾರ್ಯದರ್ಶಿ ಟಿ.ಕೃಷ್ಣಪ್ಪ, ಷೇಖ್‌ ಅಹಮದ್‌, ತಾಲೂಕು ಜೆಡಿಎಸ್‌ ಪ್ರಚಾರ ಸಮಿತಿ ಅಧ್ಯಕ್ಷ ಟಿ.ಕೆ.ರಾಮೇ ಗೌಡ, ಪಪಂ ಮಾಜಿ ಸದಸ್ಯ ಲಾರಿ ಚನ್ನಪ್ಪ ಹಾಜರಿದ್ದರು.