ಹೆದ್ದಾರಿ ಸೊಬಗು ಹೆಚ್ಚಿಸಿದ ಗುಲ್ಮೊಹರ್‌ ಹೂವಿನ ಮರಗಳು

Team Udayavani, Jun 3, 2019, 12:50 PM IST

ಮಳವಳ್ಳಿ: ಕೆಂಪು ಹೂವನ್ನು ಒಳಗೊಂಡಿರುವ ಗುಲ್ಮೊಹರ್‌ ಮರಗಳು ನೋಡಲು ಅತ್ಯಾಕರ್ಷ ಣೀಯ. ಇವುಗಳು ಇರುವೆಡೆ ಸೊಬಗು ತುಂಬಿರುತ್ತದೆ. ಅಂತೆಯೇ ಹಲಗೂರು-ಮಳವಳ್ಳಿಗೆ ಹೋಗುವ ಹೆದ್ದಾರಿಯ ಎಡ ಮತ್ತು ಬಲಭಾಗ ಗಳಲ್ಲಿ ಗುಲ್ ಮೊಹರ್‌ ಮರಗಳಲ್ಲಿ ನಳನಳಿಸುತ್ತಿರುವ ಕೆಂಪು ಹೂವು ರಸ್ತೆ ಎಲ್ಲರ ಕಣ್ಮನ ಸೆಳೆಯುತ್ತಿದೆ.

ಮದ್ದೂರು ಸರ್ಕಲ್ ಬಳಿ ಇರುವ ಗೌರಿಶಂಕರ ಕಲ್ಯಾಣ ಮಂಟಪದ ಸಮೀಪವಿರುವ ರಸ್ತೆ ಅಕ್ಕ-ಪಕ್ಕದ ಗುಲ್ಮೊಹರ್‌ ಮರಗಳಲ್ಲಿ ಕೆಂಪು ಹೂವುಗಳು ವಸಂತಕಾಲದಲ್ಲಿ ಹೆಚ್ಚು ಹೂವು ಬಿಟ್ಟಿರುವುದರಿಂದ ರಸ್ತೆಯಲ್ಲಿ ಸಂಚರಿಸುವ ವಾಹನ ಚಾಲಕರಿಗೆ, ಪರಿಸರ ಪ್ರೇಮಿಗಳಿಗೆ ಉತ್ತಮ ಗಾಳಿ, ಹೂವಿನ ಸುವಾಸನೆಯೊಂದಿಗೆ ವಿಶೇಷ ಅನುಭವ ನೀಡುತ್ತಿದೆ.ಈ ಹೂವುಗಳನ್ನು ಗೃಹ ಪ್ರವೇಶ, ಮದುವೆ ಸೇರಿದಂತೆ ಶುಭ- ಸಮಾರಂಭಗಳಿಗೆ ಹೆಚ್ಚು ಬಳಕೆ ಮಾಡಲಾಗುತ್ತದೆ. ಸಮಾರಂಭ ಗಳಿಗೆ ಬರುವ ಗಣ್ಯರಿಗೆ ಕೆಂಪುಬಣ್ಣದ ಹೂವು ಹಾಗೂ ಎಲೆಗಳಿಂದ ಕೂಡಿದ ಕೊಂಬೆಗಳನ್ನು ತಂದು ಅಲಂಕರಿಸಿ ಸ್ವಾಗತಿಸಲಾಗುತ್ತದೆ. ಈ ಹೂವು ಗಳನ್ನು ಗ್ರಾಮಾಂತರ ಪ್ರದೇಶದಲ್ಲಿ ನಡೆಯುವ ಶುಭ ಕಾರ್ಯಗಳಲ್ಲಿ ಈಗಲೂ ಹೆಚ್ಚು ಬಳಸಲಾಗುತ್ತಿದೆ.

ಹಲಗೂರು ಸಮೀಪ ಬೈಪಾಸ್‌ ರಸ್ತೆಯಲ್ಲಿ ಈ ಮರಗಳು ರಸ್ತೆ ಅಗಲೀಕರಣ ನೆಪದಲ್ಲಿ ಕೊಡಲಿ ಪೆಟ್ಟಿಗೆ ಸಿಗದೆ ಪಾರಾಗಿವೆ. ಅಂತೆಯೇ ರಸ್ತೆಗೂ ವಿಶೇಷ ಸೊಬಗನ್ನು ತಂದುಕೊಟ್ಟು ಪ್ರಯಾಣಿಕರಿಗೂ ಆನಂದ ಉಂಟು ಮಾಡುತ್ತಿವೆ.