Mandya: ಬಹುಮಾನ ಗೆದ್ದ ಹಳ್ಳಿಕಾರ್‌ ತಳಿಯ ಎತ್ತು ದಾಖಲೆಯ 13 ಲಕ್ಷ ರೂ.ಗೆ ಮಾರಾಟ!

Team Udayavani, Nov 28, 2024, 6:40 PM IST

ಮಂಡ್ಯ: ರೇಸ್‌ನಲ್ಲಿ ಬೈಕ್‌ ಸೇರಿ 26 ಬಹುಮಾನ ಗೆದ್ದಿರುವ ಎ1 ಟೈಗರ್‌ ಎಂಬ ಹಳ್ಳಿಕಾರ್‌ ಎತ್ತು ದಾಖಲೆಯ ಬರೋಬ್ಬರಿ 13.05 ಲಕ್ಷ ರೂ.ಗೆ ಮಾರಾಟವಾಗಿದೆ. ನಗರದ ತಾವರಗೆರೆ ನಿವಾಸಿ ಕಾಂತರಾಜು ಅವರು ಸಾಕಿದ ಹಳ್ಳಿಕಾರ್‌ ತಳಿಯ ಎ1 ಟೈಗರ್‌ ಎಂದೇ ಪ್ರಖ್ಯಾತಿ ಪಡೆದಿತ್ತು. ಇದುವರೆಗೂ ಎತ್ತು 1 ಬೈಕ್‌ ಸೇರಿ ಸುಮಾರು 26 ಬಹುಮಾನ ಪಡೆದಿದೆ.

ಬಹುಮಾನ: ರಾಜ್ಯದ ವಿವಿಧೆಡೆ ನಡೆದ ಓಟದ ಸ್ಪರ್ಧೆಗಳಲ್ಲಿ 9 ಬಾರಿ ಪ್ರಥಮ, 9 ಬಾರಿ ದ್ವಿತೀಯ, 4 ಬಾರಿ ತೃತೀಯ, 3 ಬಾರಿ 4ನೇ ಸ್ಥಾನ ಪಡೆದಿತ್ತು. ತಮಿಳುನಾಡಿನಲ್ಲೂ ನಡೆದ 300 ಮೀಟರ್‌ ಓಟದ ಸ್ಪರ್ಧೆಯಲ್ಲಿ 3ನೇ ಬಹುಮಾನ ಪಡೆದಿತ್ತು. ನಂತರ ಮತ್ತೆ ನಡೆದ 300 ಮೀಟರ್‌ ಓಟದ ಸ್ಪರ್ಧೆಯಲ್ಲಿ 4ನೇ ಬಹುಮಾನ ಪಡೆದಿದೆ.

ದುಃಖ: ಎತ್ತಿನ ಓಟ ಕಂಡು ಇಷ್ಟಪಟ್ಟ ತಮಿ ಳುನಾಡು ಮೂಲದ ಎಸ್‌.ವಿ.ರಾಜನ್‌ ಮಂಡ್ಯಕ್ಕೆ ಆಗಮಿಸಿ ಸುಮಾರು 13.05 ಲಕ್ಷ ರೂ.ಭಾರೀ ಮೊತ್ತ ನೀಡಿ ಖರೀದಿಸಿದರು. ಕಾಂತರಾಜು ಅವರು ಎತ್ತು ಮಾರುವಾಗ ಬಹಳ ದುಃಖದಿಂದಲೇ ಮಾರಾಟ ಮಾಡಿ ದರು. ನಂತರ ಖರೀದಿಸಿದ ರಾಜನ್‌ರನ್ನು ಅಭಿನಂದಿಸ ಲಾಯಿತು. ಈ ಸಂದರ್ಭದಲ್ಲಿ ತಾವರೆ ಗೆರೆಯ ಮಂಜು ಲಾರ, ಚಿಕ್ಕಾಡೆ ಮಾಯಿ, ವರುಣ್‌, ಪ್ರಮೋದ್‌, ಗೌತು, ಶಂಭು, ಸಂಜು ಮತ್ತಿತರರಿದ್ದರು.

ನಾನು ಮಹಾರಾಷ್ಟ್ರದಿಂದ 2 ಹಲ್ಲು ಹೊಂದಿದ ಚಿಕ್ಕ ಮರಿಯಲ್ಲಿಯೇ ಖರೀದಿಸಿ ತಂದಿದ್ದೆ. ಚೆನ್ನಾಗಿ ಆರೈಕೆ ಮಾಡಿ ರಾಜ್ಯದ ವಿವಿಧೆಡೆ ನಡೆಯುತ್ತಿದ್ದ ಓಟದ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಸುಮಾರು 26 ಬಹುಮಾನ ಗೆದ್ದಿದೆ. ಇದರಲ್ಲಿ ಒಂದು ಬೈಕ್‌ ಅನ್ನು ಗೆದ್ದಿದೆ. ತಮಿಳುನಾಡಿನಲ್ಲಿ ನಡೆದ ಓಟದ ಸ್ಪರ್ಧೆಯಲ್ಲಿ ರಾಜನ್‌ ಎಂಬವರು ಇಷ್ಟಪಟ್ಟು ಎತ್ತನ್ನು ಖರೀದಿಸಿದ್ದಾರೆ. ●ಕಾಂತರಾಜು, ಎ1 ಟೈಗರ್‌ ಎತ್ತಿನ ಮಾಲಿಕ, ಮಂಡ್ಯ

ತಮಿಳುನಾಡಿನಲ್ಲಿ ನಡೆದ ಓಟದ ಸ್ಪರ್ಧೆಯಲ್ಲಿ 3ನೇ ಬಹುಮಾನ ಪಡೆದಿತ್ತು. ನಂತರ ನಡೆದ ಸ್ಪರ್ಧೆಯಲ್ಲೂ 4ನೇ ಸ್ಥಾನ ಪಡೆಯಿತು. ಇದನ್ನು ನೋಡಿದಾಗ ನನಗೆ ತುಂಬಾ ಇಷ್ಟವಾಯಿತು. ಅದಕ್ಕಾಗಿಯೇ ಖರೀದಿಸಿದೆ. ●ಎಸ್‌.ವಿ.ರಾಜನ್‌, ಖರೀದಿದಾರ, ತಮಿಳುನಾಡು