ಕರುನಾಡ ಮಣ್ಣಲ್ಲಿ ಮಣ್ಣಾದ ಹಸಿರಯೋಗಿ​​​​​​​

Team Udayavani, Feb 23, 2018, 6:10 AM IST

ಪಾಂಡವಪುರ: ಅಗಲಿದ ರೈತ ಚೇತನ ಕೆ.ಎಸ್‌.ಪುಟ್ಟಣ್ಣಯ್ಯ ಅವರ ಪಾರ್ಥಿವ ಶರೀರದ ಅಂತ್ಯಕ್ರಿಯೆ ಗುರುವಾರ ಸಕಲ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿತು.

ರಾಜ್ಯದ ವಿವಿಧ ಜಿಲ್ಲೆಗಳಿಂದ ಆಗಮಿಸಿದ ಅಸಂಖ್ಯಾ ಅಭಿಮಾನಿಗಳು ತಂದ ಹಿಡಿಮಣ್ಣು ಹಸಿರಯೋಗಿಯ ಉಡಿಸೇರಿತು. ಇದರೊಂದಿಗೆ ಪುಟ್ಟಣ್ಣಯ್ಯ ಇಡೀ ಕರುನಾಡ ಮಣ್ಣಲ್ಲಿ ಮಣ್ಣಾದರು.

ಮಂಡ್ಯ ಜಿಲ್ಲೆ ಪಾಂಡವಪುರ ತಾಲೂಕಿನ ಕ್ಯಾತನಹಳ್ಳಿ ಗ್ರಾಮದ ಪುಟ್ಟಣ್ಣಯ್ಯನವರ ತೋಟದಲ್ಲೇ ಅಂತ್ಯಕ್ರಿಯೆಗೆ ವ್ಯವಸ್ಥೆ ಮಾಡಲಾಗಿತ್ತು. ರಾಜ್ಯದ ವಿವಿಧ ಮೂಲೆಗಳಿಂದ ಬಂದಿದ್ದ ಲಕ್ಷಾಂತರ ಮಂದಿ ರೈತ ಸಂಘದ ಕಾರ್ಯಕರ್ತರು, ಅಭಿಮಾನಿಗಳು ಅಂತಿಮ ದರ್ಶನ ಪಡೆದು ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಂಡರು.

ಬೆಳಗ್ಗೆ 6 ಗಂಟೆಗೆ ಮೈಸೂರಿನ ಜೆಎಸ್‌ಎಸ್‌ ಆಸ್ಪತ್ರೆಯಲ್ಲಿ ಇಡಲಾಗಿದ್ದ ಪಾರ್ಥಿವ ಶರೀರವನ್ನು ಪಾಂಡವಪುರಕ್ಕೆ ತರಲಾಯಿತು. ಹಸಿರು ಬಾವುಟಗಳೊಂದಿಗೆ ರೈತಸಂಘದ ನೂರಾರು ಕಾರ್ಯಕರ್ತರು ಬೈಕ್‌ಗಳ ಮೂಲಕ ಪಟ್ಟಣದ
ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಸಿದರು. ಬಳಿಕ ಕ್ಯಾತನಹಳ್ಳಿಯ ಸರ್‌.ಎಂ.ವಿಶ್ವೇಶ್ವರಯ್ಯ ಕ್ರೀಡಾಂಗಣದಲ್ಲಿ ಪಾರ್ಥಿವ ಶರೀರವನ್ನು ಬೆಳಗ್ಗೆ 8 ಗಂಟೆಯಿಂದ ಮಧ್ಯಾಹ್ನ 12 ಗಂಟೆಯವರೆಗೆ ಇರಿಸಿ, ಸಾರ್ವಜನಿಕ ದರ್ಶನಕ್ಕೆ ಅವಕಾಶ ಮಾಡಿಕೊಡಲಾಯಿತು.

ನಂತರ, ಮಧ್ಯಾಹ್ನ 12.26ಕ್ಕೆ ಪುಟ್ಟಣ್ಣಯ್ಯನವರ ತೋಟಕ್ಕೆ ಪಾರ್ಥಿವ ಶರೀರವನ್ನು ತರಲಾಯಿತು. ಇದೇ ವೇಳೆ, ಪುಟ್ಟಣ್ಣಯ್ಯ ಪುತ್ರಿಯರಾದ ಸ್ಮಿತಾ ಹಾಗೂ ಅಕ್ಷತಾ ಪಾರ್ಥಿವ ಶರೀರವನ್ನು ನೋಡುತ್ತಿದ್ದಂತೆ ಪ್ರಜ್ಞೆ ತಪ್ಪಿ ಬಿದ್ದರು. ಕೂಡಲೇ ಅವರಿಗೆ ಚಿಕಿತ್ಸೆ ಕೊಡಿಸಲಾಯಿತು. ಬಳಿಕ, ಕುಟುಂಬ ವರ್ಗದವರು ಪೂಜಾ ವಿಧಿ-ವಿಧಾನಗಳನ್ನು ಪೂರೈಸಿದರು. ಈ ವೇಳೆ, “ಓ ನನ್ನ ಚೇತನ ಆಗು ನೀ ಅನಿಕೇತನ’ ಕುವೆಂಪು ಅವರ ಹೋರಾಟ ಗೀತೆ ಹಾಡಲಾಯಿತು.

ಬಳಿಕ, ಪೊಲೀಸರು ಮೂರು ಸುತ್ತು ಗಾಳಿಯಲ್ಲಿ ಗುಂಡು ಹಾರಿಸಿ, ಪೊಲೀಸ್‌ ವಾದ್ಯವೃಂದದವರು ರಾಷ್ಟ್ರಗೀತೆಯನ್ನು ನುಡಿಸುವ ಮೂಲಕ ಸರ್ಕಾರಿ ಗೌರವ ಸಲ್ಲಿಸಿದರು. ಹಿಂದೂ, ಮುಸ್ಲಿಂ ಹಾಗೂ ಕ್ರಿಶ್ಚಿಯನ್‌ ಧರ್ಮಗುರುಗಳು ಪ್ರಾರ್ಥನೆ
ಸಲ್ಲಿಸಿದರು. ಬಳಿಕ ಪುಟ್ಟಣ್ಣಯ್ಯನವರ ಪಾರ್ಥಿವ ಶರೀರದ ಅಂತ್ಯಕ್ರಿಯೆ ಪೂರ್ಣಗೊಳಿಸಲಾಯಿತು.

ಉಕ್ಕಿದ ಜಲ: ಈ ಮಧ್ಯೆ, ಅಂತ್ಯಸಂಸ್ಕಾರಕ್ಕೆ ತೆಗೆಯಲಾದ ಗುಂಡಿಯಲ್ಲಿ ಜಲ ಉಕ್ಕಿ ಅಚ್ಚರಿ ಉಂಟು ಮಾಡಿತು. ರೈತನಾಯಕನನ್ನು ಮಡಿಲಿಗೆ ತುಂಬಿಕೊಳ್ಳಲು ಗಂಗೆಯೇ ಮೇಲೆದ್ದು ಬಂದಿರಬೇಕೆಂದು ನೆರೆದಿದ್ದ ಜನ
ಮಾತನಾಡಿಕೊಂಡರು.

ನೇಣಿಗೇರಿದ ಅಭಿಮಾನಿ 
ಪುಟ್ಟಣ್ಣಯ್ಯನವರ ಸಾವಿನ ದುಃಖ ಸಹಿಸಲಾಗದೆ ಅಭಿಮಾನಿ, ಕ್ಯಾತನಹಳ್ಳಿಯ ಚಂದು (27) ಆತ್ಮಹತ್ಯೆಗೆ
ಶರಣಾಗಿದ್ದಾರೆ. “ಪುಟ್ಟಣ್ಣಯ್ಯ ನನ್ನನ್ನು ಕರೆಯುತ್ತಿದ್ದಾರೆ. ನಾನು ಹೋಗುತ್ತಿದ್ದೇನೆ. ಪುಟ್ಟಣ್ಣಯ್ಯನವರನ್ನು ಬಿಟ್ಟು
ನಾನು ಒಂದು ಕ್ಷಣವೂ ಇರಲಾರೆ’ಎಂದು ಡೆತ್‌ನೋಟ್‌ ಬರೆದಿಟ್ಟು ನೇಣಿಗೆ ಶರಣಾಗಿದ್ದಾನೆ. ಚಂದು ಅಂತ್ಯಸಂಸ್ಕಾರವನ್ನೂ ಪುಟ್ಟಣ್ಣಯ್ಯ ನವರ ಅಂತ್ಯಸಂಸ್ಕಾರ ನಡೆದ ಸ್ಥಳದ ಸಮೀಪವೇ ಮಾಡಲಾಯಿತು.