ಶಿಥಿಲ ಗೋಡೆಗಳ ಪಕ್ಕವೇ ಚಿಣ್ಣರಿಗೆ ಆಟ-ಪಾಠ!

ಇದ್ದೂ ಇಲ್ಲದಂತಾಗಿರುವ ಶೌಚಾಲಯ; ಪಾಲಕರ ಆರೋಪ

Team Udayavani, Aug 21, 2019, 11:35 AM IST

ಮರಿಯಮ್ಮನಹಳ್ಳಿ: ಬೀಳುವ ಹಂತದಲ್ಲಿರುವ ಅಂಗನವಾಡಿ ಕಟ್ಟಡ ಪಕ್ಕದ ಗೋಡೆ.

ಮರಿಯಮ್ಮನಹಳ್ಳಿ: ಪಟ್ಟಣದ 4ನೇ ವಾರ್ಡ್‌ ಸರಕಾರಿ ಆಸ್ಪತ್ರೆ ಆವರಣದಲ್ಲಿರುವ ಅಂಗನವಾಡಿ ಕೇಂದ್ರ-7ರ ಪಕ್ಕದಲ್ಲಿ ಎರಡು ಹಳೆಯ ಕಟ್ಟಡಗಳು ಇದ್ದು ಮಕ್ಕಳು ಶಾಲೆಯ ಹೊರ ಆವರಣದಲ್ಲಿ ಆಟವಾಡಲು ಬಿಡಲು ಭಯದ ವಾತಾವರಣವಿದೆ.

ಈ ಎರಡೂ ಕಟ್ಟಡಗಳ ಪೈಕಿ ಒಂದು ಕಟ್ಟಡ ಪಟ್ಟಣ ಪಂಚಾಯತಿಗೆ ಸಂಬಂಧಿಸಿದರೆ ಮತ್ತೂಂದು ಕಟ್ಟಡ ಸರಕಾರಿ ಆಸ್ಪತ್ರೆಗೆ ಸಂಬಂಧಪಡುತ್ತದೆ. ಕಳೆದ ವರ್ಷ ಮಳೆಗೆ ಎರಡೂ ಕಟ್ಟಗಳ ಮೇಲ್ಚಾವಣಿಗಳು ಕುಸಿದು ಬಿದ್ದಿವೆ. ಈಗ ಗೋಡೆಗಳೂ ಸಹ ಬೀಳುವ ಹಂತದಲ್ಲಿವೆ. ಕಲ್ಲಿನ ಗೋಡೆಗಳು ಆಗಿರುವುದರಿಂದ ಮಕ್ಕಳು ಶಾಲೆಯ ಹೊರಭಾಗದಲ್ಲಿ ಆಟವಾಡಲು ಬಿಡಲು ಕಾರ್ಯಕರ್ತೆಯರು ಅಂಜುತ್ತಿದ್ದಾರೆ. ಯಾವ ವೇಳೆಯಲ್ಲಾದರೂ ಈ ಗೋಡೆಗಳು ಕುಸಿದು ಬೀಳುವ ಹಂತದಲ್ಲಿರುವುದರಿಂದ ಪೋಷಕರೂ ತಮ್ಮ ಮಕ್ಕಳ ಬಗ್ಗೆ ಆತಂಕಕ್ಕೊಳಗಾಗಿದ್ದಾರೆ.

ಈ ಕಟ್ಟಡಗಳನ್ನು ಸಂಪೂರ್ಣವಾಗಿ ಕೆಡವಲು ಪಪಂವರೆಗೆ ಹೇಳಿದರೂ ಇದುವರೆಗೂ ಯಾವುದೇ ಕ್ರಮಕ್ಕೆ ಮುಂದಾಗದೇ ನಿರ್ಲಕ್ಷ್ಯ ವಹಿಸಿದ್ದಾರೆ ಎಂದು ವಾಡಿನ ನಾಗರಿಕರು ದೂರಿದ್ದಾರೆ.

ಒಮ್ಮೆ ಶಾಸಕರ ಗಮನಕ್ಕೂ ತಂದರೂ ಏನೂ ಪ್ರಯೋಜನವಾಗಿಲ್ಲ ಎಂದೂ ಖೇದವ್ಯಕ್ತಪಡಿಸಿದ್ದಾರೆ. ಈ ಎರಡೂ ಕಟ್ಟಡಗಳನ್ನು ನೆಲಸಮ ಮಾಡಿದರೇ ಮಾತ್ರ ಈ ಶಾಲೆಯ ಮಕ್ಕಳು ನಿರಾತಂಕವಾಗಿ ಇಲ್ಲಿ ಓಡಾಡಬಹುದು ಎನ್ನುತ್ತಾರೆ ವಾರ್ಡಿನ ನಿವಾಸಿಗಳು.

ಪಟ್ಟಣದಲ್ಲಿ ಅಂಗನವಾಡಿ ಕೇಂದ್ರಗಳ ಕಟ್ಟಡಗಳ ಸುರಕ್ಷತೆ ವಿಚಾರದಲ್ಲಿ ರಾಜಕಾರಣಿಗಳು, ಅಧಿಕಾರಿಗಳು ನಿರ್ಲಕ್ಷಿಸುತ್ತಿದ್ದಾರೆ. ಮಕ್ಕಳ ಕಲಿಕೆಗೆ ಆಟೋಟಕ್ಕೆ ಸೂಕ್ತ ಸ್ಥಳದ ಕೊರತೆ ಬಹತೇಕ ಕೇಂದ್ರಗಳಲ್ಲಿ ಇದೆ. ಮಕ್ಕಳಿಗೆ ಕುಡಿಯುವ ನೀರಿನ ಶುದ್ಧೀಕರಣ ಯಂತ್ರಗಳೂ ಸಮರ್ಪಕವಾಗಿ ಕಾರ್ಯನಿರ್ವಹಿಸುತ್ತಿಲ್ಲ. ಸಮಗ್ರ ಶಿಶು ಅಭಿವೃದ್ಧಿ ಯೋಜನೆಗಳೆಲ್ಲವೂ ಹುಸಿಯಾಗುತ್ತಿವೆ ಎಂದು ಜಾಗೃತ ನಾಗರಿಕರು ಆರೋಪಿಸುತ್ತಿದ್ದಾರಲ್ಲದೇ ಮುಂದಾಗಬಹುದಾದ ಅಪಾಯಗಳನ್ನು ತಪ್ಪಿಸಲು ಅಧಿಕಾರಿಗಳು ಜನಪ್ರತಿನಿಧಿಗಳು ಮುಂದಾಗಬೇಕು ಎಂದು ಆಗ್ರಹಿಸಿದ್ದಾರೆ.

ಶೌಚಾಲಯ ಕೊರತೆ: ಅಂಗನವಾಡಿ ಕೇಂದ್ರಕ್ಕೆ ಶೌಚಾಲಯ ನಿರ್ಮಿಸಲಾಗಿತ್ತಾದರೂ ಅದರ ನಿರ್ವಹಣೆ ಮಾಡದೇ ಹಾಳುಬಿದ್ದಿದೆ. ಮಕ್ಕಳು ಅಂಗನವಾಡಿ ಕೇಂದ್ರದ ಆಸುಪಾಸಿನಲ್ಲೆ ಬಹಿರ್ದೆಸೆ ಮಾಡುವುದರಿಂದ, ನೊಣಗಳ ಹಾವಳಿ ಹೆಚ್ಚಾಗಿ ಮಕ್ಕಳ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತಿದೆ ಎಂದು ಕೆಲ ಪೋಷಕರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ನಿರುಪಯುಕ್ತ ಶುದ್ಧೀಕರಣ ಯಂತ್ರ:
ಎಲ್ಲಾ ಅಂಗನವಾಡಿ ಕೇಂದ್ರಗಳಿಗೆ ಮಕ್ಕಳಿಗೆ ಕುಡಿಯಲು ಶುದ್ಧ ನೀರು ಕೊಡುವ ಉದ್ದೇಶದಿಂದ ನೀರು ಶುದ್ಧೀಕರಣದ ಯಂತ್ರಗಳನ್ನು ಅಳವಡಿಸಲಾಗಿತ್ತಾದರೂ ಅವುಗಳ ಬಳಕೆ ಸಮರ್ಪಕವಾಗುತ್ತಿಲ್ಲ. ಪಪಂನವರು ಸಮರ್ಪಕವಾಗಿ ನೀರು ಬಿಡದೇ ಇರುವುದರಿಂದ, ಶುದ್ಧೀಕರಣ ಯಂತ್ರಗಳು ಪದೇ ಪದೇ ರಿಪೇರಿಗೆ ಅವುಗಳು ಹಾಳಾಗಿ ಹೋಗಿವೆ. ಹೀಗಾಗಿ ಮಕ್ಕಳು ತಮ್ಮ ಮನೆಗಳಿಂದ ಬಾಟಲಿಯಲ್ಲಿ ನೀರು ತರುವಂತಹ ಸ್ಥಿತಿ ತಲುಪಿದೆ.