ಕೃಷಿಗಾಗಿ ನೀರು ಹರಿಸಲು ಕ್ರಮ

Team Udayavani, Jun 25, 2018, 2:14 PM IST

ತಿ.ನರಸೀಪುರ: ಪ್ರಗತಿಯಲ್ಲಿರುವ ಏತ ನೀರಾವರಿ ಯೋಜನೆಗಳನ್ನು ಪರಿಶೀಲಿಸಿ, ಆಧುನೀಕರಣಗೊಂಡ ನಾಲೆಗಳನ್ನು ದುರಸ್ತಿಗೊಳಿಸಲು ಕ್ರಮ ಕೈಗೊಂಡು ಮುಂಗಾರು ಹಂಗಾಮು ಕೃಷಿಗೆ ಅಚ್ಚುಕಟ್ಟು ಪ್ರದೇಶದ ಕೊನೆ ಜಮೀನಿಗೂ  ನೀರು ಹರಿಸಲು ಕಟ್ಟುನಿಟ್ಟಿನ ಕ್ರಮವನ್ನು ತೆಗೆದುಕೊಂಡಿದ್ದೇನೆ ಎಂದು ಶಾಸಕ ಎಂ.ಅಶ್ವಿ‌ನ್‌ಕುಮಾರ್‌ ಹೇಳಿದರು.

ತಾಲೂಕಿನ ಸೋಮನಾಥಪುರ ಗ್ರಾಮದ ರಾಮಸ್ವಾಮಿ ನಾಲೆಯ ಬಳಿ ಭಾನುವಾರ ಕಾವೇರಿ ನೀರಾವರಿ ನಿಗಮದಿಂದ 45 ಲಕ್ಷ ರೂ.ಗಳ ವೆಚ್ಚದ ಉದ್ದಿನಾಲಾ ಆಧುನೀಕರಣ ಕಾಮಗಾರಿಗೆ ಭೂಮಿ ಪೂಜೆ ಸಲ್ಲಿಸಿ ಮಾತನಾಡಿದರು.

ಏಕಕಾಲದಲ್ಲಿ ಸೌಲಭ್ಯ: ಏತ ನೀರಾವರಿ ಯೋಜನೆಗಳನ್ನು ಪೂರ್ಣ ಪ್ರಮಾಣದಲ್ಲಿ ಅನುಷ್ಠಾನಗೊಳಿಸಿ, ನಾಲೆಗಳ ಹೂಳು ತೆಗೆಸಿ ಮತ್ತು ತ್ಯಾಜ್ಯ ಗಿಡಗಂಟಿಗಳನ್ನು ತೆರವುಗೊಳಿಸಿ ಪ್ರಸಕ್ತ ಮುಂಗಾರು ಕೃಷಿಗೆ ಎಲ್ಲಾ ಅಚ್ಚುಕಟ್ಟು ಪ್ರದೇಶಕ್ಕೂ ನೀರಾವರಿ ಸೌಲಭ್ಯವನ್ನು ಏಕ ಕಾಲದಲ್ಲಿ ಕಲ್ಪಿಸಲಾಗುವುದು ಎಂದರು.

ಇತ್ತೀಚಿನ ದಿನಗಳಲ್ಲಿ ಮುಂಗಾರು ಉತ್ತಮವಾಗಿದ್ದು, ಜಲಾಶಯಗಳು ಮತ್ತು ಕೆರೆಕಟ್ಟೆಗಳೆಲ್ಲಾ ತುಂಬಿ ಹರಿಯುತ್ತಿವೆ. ಬಹುತೇಕ ಕಡೆ ರೈತರು ಬೆಳೆದಿರುವ ಕಾರಿಫ್ ಬೆಳೆ ಕಟಾವಿನ ಹಂತದಲ್ಲಿದ್ದು, ಪರಿಸ್ಥಿತಿಯನ್ನು ನೋಡಿಕೊಂಡು ನಾಲೆಗಳಿಗೆ ನೀರು ಹರಿಸಲಾಗುವುದು. ಕ್ಷೇತ್ರದಲ್ಲಿ ಉತ್ತಮ ಕೆಲಸವನ್ನು ಮಾಡಲು ಕಾರ್ಯಾಂಗವೂ ಕೂಡ ಸಂಪೂರ್ಣ ಸಹಕಾರ ನೀಡುತ್ತಿದೆ ಎಂದು ನುಡಿದರು.

ನಂಬಿಕೆ ಉಳಿಸಿಕೊಳ್ಳುವೆ: ಪೂರ್ವಿಕರ ನಂಟಿರುವ ಸೋಮನಾಥಪುರದಲ್ಲಿ ಜಿಪಂ ಸದಸ್ಯನಾಗಿ ಆಯ್ಕೆಗೊಂಡಿದೆ. ಈಗ ಶಾಸಕರಾಗಿ ರೈತಪರ ಅಭಿವೃದ್ಧಿ ಕಾಮಗಾರಿಗೆ ಚಾಲನೆ ನೀಡುತ್ತಿರುವುದು ನಿಜಕ್ಕೂ ಹೆಮ್ಮೆಯ ವಿಚಾರ. ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಮತ್ತು ಜಲಸಂಪನ್ಮೂಲ ಸಚಿವರಿಂದ ಹೆಚ್ಚಿನ ಯೋಜನೆಗಳನ್ನು ತರುವ ಮೂಲಕ ಬಾಕಿ ಉಳಿದ ನೀರಾವರಿ ಕಾಮಗಾರಿಗಳನ್ನು ಪೂರ್ಣಗೊಳಿಸುತ್ತೇನೆ. ಜನರು ನಮ್ಮ ಮೇಲಿಟ್ಟಿರುವ ನಂಬಿಕೆಯನ್ನು ಉಳಿಸಿಕೊಳ್ಳುತ್ತೇನೆ ಎಂದು ಶಾಸಕರು ತಿಳಿಸಿದರು.

ಜೆಡಿಎಸ್‌ ಕ್ಷೇತ್ರಾಧ್ಯಕ್ಷ ಸಿ.ಬಿ.ಹುಂಡಿ ಚಿನ್ನಸ್ವಾಮಿ, ವಕ್ತಾರ ಕಟ್ಟೇಪುರ ಸಿದ್ಧಪ್ಪ, ಜಿ.ಪಂ ಮಾಜಿ ಸದಸ್ಯ ಎಸ್‌.ಆರ್‌.ವರದರಾಜು, ತಾ.ಪಂ ಮಾಜಿ ಅಧ್ಯಕ್ಷ ಕೆ.ಕುಮಾರಸ್ವಾಮಿ, ಗ್ರಾಪಂ ಅಧ್ಯಕ್ಷ ಮಂಜೇಶ್‌ಗೌಡ, ಸದಸ್ಯರಾದ ಸುರೇಶ, ಪ್ರೀತಂ, ಮಾಜಿ ಉಪಾಧ್ಯಕ್ಷ ಕೃಷ್ಣಮೂರ್ತಿ, ಕಾವೇರಿ ನೀರಾವರಿ ನಿಗಮ ಎಇಇ ಮಹದೇವನಾಯಕ,

ಕಿರಿಯ ಇಂಜಿನಿಯರ್‌ ಎಚ್‌.ಎನ್‌.ರವೀಂದ್ರ, ಗುತ್ತಿಗೆದಾರ ಎಂ.ರವಿಕುಮಾರ್‌, ಮುಖಂಡರಾದ ಎಸ್‌.ಜಯಕುಮಾರ್‌, ಎಸ್‌.ರಾಮಾನುಜ, ಎಸ್‌.ವಿ.ದಿನೇಶ್‌ಕುಮಾರ್‌, ಎಸ್‌.ವಿ.ಜಯಪಾಲ ಭರಣಿ, ಎಂ.ಪುಟ್ಟಸ್ವಾಮಿ, ಎಸ್‌.ಮೇಗಡಹಳ್ಳಿ ಮೂರ್ತಿ, ಶ್ರೀನಿವಾಸ್‌, ಜಗದೀಶ್‌, ಎನ್‌.ಮಹದೇವ, ಕುಮಾರ, ದೀಪುದರ್ಶನ್‌, ಕೀರ್ತಿಕುಮಾರ್‌ ಇತರರಿದ್ದರು.

ಶಿಷ್ಟಾಚಾರ ಉಲ್ಲಂಘನೆಗೆ ಆಕ್ರೋಶ: ರಾಮಸ್ವಾಮಿ ನಾಲೆಯ ಸೋಮನಾಥಪುರ ಉದ್ದಿನಾಲಾ ಆಧುನೀಕರಣ ಕಾಮಗಾರಿಗೆ ತಾಪಂ ಅಧ್ಯಕ್ಷ, ಸದಸ್ಯರನ್ನು ಆಹ್ವಾನಿಸದೇ ಶಿಷ್ಟಾಚಾರ ಉಲ್ಲಂಘಿಸಿದ್ದಕ್ಕೆ ಸಾಮಾಜಿಕ ನ್ಯಾಯ ಸ್ಥಾಯಿ ಸಮಿತಿ ಅಧ್ಯಕ್ಷ ರಾಮಲಿಂಗಯ್ಯ ಕಾವೇರಿ ನೀರಾವರಿ ನಿಗಮದ ಅಧಿಕಾರಿಗಳ ವಿರುದ್ಧ ಕಿಡಿಕಾರಿದರು. ರಾಜ್ಯದಲ್ಲಿ ಕಾಂಗ್ರೆಸ್‌ ಜೆಡಿಎಸ್‌ ಮೈತ್ರಿಕೂಟದ ಸರ್ಕಾರ ಅಧಿಕಾರದಲ್ಲಿದೆ.

ಎರಡೂ ಪಕ್ಷಗಳ ನಡುವೆ ಸಮನ್ವಯತೆ ಇರುವಾಗ ಅಧಿಕಾರಿಗಳೇ ತಾತ್ಸಾರವನ್ನು ತಂದಿಡುತ್ತಿದ್ದಾರೆ ಎಂದು ಕಾಮಗಾರಿಗೆ ಚಾಲನೆ ನೀಡುವ ಸಂದರ್ಭದಲ್ಲಿ ಶಾಸಕರೆದುರೇ ಅಧಿಕಾರಿಗಳನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು. ಇದಕ್ಕೆ ಜೆಡಿಎಸ್‌ ಮುಖಂಡರು ಆಕ್ಷೇಪಿಸಿದ್ದರಿಂದ ಕೆಲ ಕಾಲ ಇಬ್ಬರ ನಡುವೆ ವಾಗ್ವಾದ ನಡೆಯಿತು. ಕೊನೆಗೆ ಶಾಸಕ ಎಂ.ಅಶ್ವಿ‌ನ್‌ಕುಮಾರ್‌ ಶಿಷ್ಟಾಚಾರದಂತೆ ಎಲ್ಲರನ್ನೂ ಆಹ್ವಾನಿಸುವಂತೆ ಸೂಚನೆ ನೀಡಿ ಗದ್ದಲಕ್ಕೆ ತೆರೆ ಎಳೆದರು.