ಹುಣಸೂರು : ತೋಟದ ಪಂಪ್ ಹೌಸ್ ನಲ್ಲಿತ್ತು ಮೂರು ಚಿರತೆ ಮರಿಗಳು

Team Udayavani, Jul 17, 2022, 9:10 PM IST

ಹುಣಸೂರು : ತಾಲೂಕಿನ ಹನಗೋಡು ಹೋಬಳಿಯ ಕೂಡ್ಲೂರು ಗ್ರಾಮದ ತೋಟದ ಪಂಪ್‌ಹೌಸ್‌ನಲ್ಲಿ ಮೂರು ಚಿರತೆ ಮರಿಗಳು ಪತ್ತೆಯಾಗಿವೆ.

ಗ್ರಾಮದ ಮಾರ್ತಮ್ಮರ ಪುತ್ರ ಸಂತೋಷ್‌ಕುಮಾರ್ ಶನಿವಾರ ಸಂಜೆ ತೊರೆ ಪಕ್ಕದಲ್ಲಿರುವ ತಮ್ಮ ತೋಟದಲ್ಲಿ ಸುತ್ತಾಡಿಕೊಂಡು ಪಂಪ್‌ಹೌಸ್ ಬಳಿ ಬಂದಾಗ ಯಾವುದೋ ಮರಿಗಳ ಚೀರಾಟ ಕೇಳಿ ದೂರದಿಂದ ಗಮನಿಸಿದಾಗ ಚಿರತೆ ಮರಿಗಳಿರುವುದು ಪತ್ತೆಯಾಗಿವೆ.

ತಕ್ಷಣವೇ ಸಂತೋಷ್‌ ಕುಮಾರ್ ಅರಣ್ಯಇಲಾಖೆಗೆ ಮಾಹಿತಿ ನೀಡಿದ್ದು, ಸ್ಥಳಕ್ಕೆ ಡಿ.ಆರ್.ಎಫ್.ಓ. ಮಲ್ಲಿಕಾರ್ಜುನ್ ಮತ್ತು ಸಿಬ್ಬಂದಿಗಳು ಭೇಟಿ ನೀಡಿ ಚಿರತೆ ಮರಿಗಳೆಂದು ಖಚಿತಪಡಿಸಿದರು. ಈಗಾಗಲೇ ತಾಯಿ ಚಿರತೆಯು ಜನರನ್ನು ನೋಡಿ ಗಾಬರಿಗೊಂಡಿರಬಹುದು. ಒಂದು ವೇಳೆ ತಾಯಿ ಚಿರತೆ ತನ್ನ ಮರಿಗಳೊಂದಿಗೆ ಬೇರೆ ಕಡೆಗೆ ಸ್ಥಳಾಂತರವಾಗದಿದ್ದಲ್ಲಿ ಬೋನಿಟ್ಟು ತಾಯಿ ಚಿರತೆಯನ್ನು ಸೆರೆ ಹಿಡಿದು ಸಂರಕ್ಷಿಸಿ ಮರಿಗಳೊಂದಿಗೆ ಅರಣ್ಯಕ್ಕೆ ಬಿಡಲಾಗುವುದು. ಜನರು ಹಾಗೂ ತೋಟದವರು ಪಂಪ್ ಹೌಸ್ ಬಳಿ ಧಾವಿಸಬಾರದೆಂದು ಮನವಿ ಮಾಡಿದ್ದಾರೆ.