ಕಳಲೆ ಕೇಶವಮೂರ್ತಿಗೆ ನಂಜುಂಡ ಪ್ರಸಾದ

Team Udayavani, Apr 14, 2017, 12:55 PM IST

ಮೈಸೂರು: ತೀವ್ರ ಕುತೂಹಲ ಕೆರಳಿಸಿದ್ದ ನಂಜನ ಗೂಡು ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ಕಳಲೆ ಎನ್‌. ಕೇಶವಮೂರ್ತಿ 21,334 ಮತಗಳ ಅಂತರದ ಭರ್ಜರಿ ಗೆಲುವು ದಾಖಲಿಸಿದ್ದಾರೆ.

ಕಾಂಗ್ರೆಸ್‌ ಅಭ್ಯರ್ಥಿ ಕಳಲೆ ಎನ್‌.ಕೇಶವಮೂರ್ತಿ 86212 ಮತಗಳನ್ನು ಪಡೆದು ಜಯಭೇರಿ ಬಾರಿಸಿದರೆ, ಬಿಜೆಪಿ ಅಭ್ಯರ್ಥಿ ಮಾಜಿ ಸಚಿವ ವಿ.ಶ್ರೀನಿವಾಸಪ್ರಸಾದ್‌ 64878 ಮತಗಳನ್ನು ಪಡೆದು ಹೀನಾಯ ಸೋಲು ಕಂಡಿದ್ದಾರೆ.

ನಂಜನಗೂಡು ತಾಲೂಕಿನ ದೇವೀರಮ್ಮನಹಳ್ಳಿ ಗೇಟ್‌ಯ ಜೆಎಸ್‌ಎಸ್‌ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಗುರುವಾರ ಬೆಳಗ್ಗೆ 8 ಗಂಟೆಗೆ ಆರಂಭವಾದ ಮತ ಎಣಿಕೆ ಕಾರ್ಯ 17 ಸುತ್ತುಗಳಲ್ಲಿ ಮಧ್ಯಾಹ್ನ 1 ಗಂಟೆವರೆಗೆ ನಡೆದು ಅಂತಿಮವಾಗಿ ಫ‌ಲಿತಾಂಶ ಪ್ರಕಟಿಸಲಾಯಿತು.

ಮೊದಲ ಸುತ್ತಿನಿಂದ ಭಾರಿ ಅಂತರ ಕಾಯ್ದು ಕೊಳ್ಳುತ್ತಾ ಬಂದಿದ್ದ ಕಳಲೆ ಕೇಶವಮೂರ್ತಿ ಸತತ 17 ಸುತ್ತುಗಳಲ್ಲೂ ಹಿಂತಿರುಗಿನೋಡಲೇ ಇಲ್ಲ. ಪ್ರತಿ ಸುತ್ತಿನಲ್ಲೂ ಅಂತರ ಹೆಚ್ಚಿಸಿಕೊಳ್ಳುತ್ತಲೇ ಹೋದರು. 6, 7 ಹಾಗೂ 8ನೇ ಸುತ್ತಿನಲ್ಲಿ ವಿ.ಶ್ರೀನಿವಾಸಪ್ರಸಾದ್‌ 3574 ಮತಗಳನ್ನು ಪಡೆದರೆ, ಕಾಂಗ್ರೆಸ್‌ ಅಭ್ಯರ್ಥಿ ಕಳಲೆ ಕೇಶವಮೂರ್ತಿ 5675 ಮತಗಳನ್ನು ಪಡೆಯುವ ಮೂಲಕ 2101 ಮತಗಳ ಮುನ್ನಡೆ ಕಾಯ್ದುಕೊಂಡರು.

ಎರಡನೇ ಸುತ್ತಿನಲ್ಲಿ ಎನ್‌.ಕೇಶವಮೂರ್ತಿ 11524 ಮತ, ಪ್ರಸಾದ್‌ 6812 ಮತಗಳು, 3ನೇ ಸುತ್ತಿನಲ್ಲಿ ಎನ್‌.ಕೇಶವಮೂರ್ತಿ 18477 ಮತ, ಪ್ರಸಾದ್‌ 9244 ಮತ ಪಡೆದರು. 4ನೇ ಸುತ್ತಿನಲ್ಲಿ ಎನ್‌.ಕೇಶವಮೂರ್ತಿ 23595 ಮತ, ಪ್ರಸಾದ್‌ 12603 ಮತ, 5ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 30061 ಮತ, ಬಿಜೆಪಿ 17134 ಮತ, 6ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 35936 ಮತ, ಬಿಜೆಪಿ 20351 ಮತ, 7ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 41196 ಮತ, ಬಿಜೆಪಿ 25300 ಮತ, 8ನೇ ಸುತ್ತಿನಲ್ಲಿ 44671 ಮತ, ಬಿಜೆಪಿ 28962 ಮತಗಳನ್ನು ಪಡೆದರು.

9ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 49634 ಮತ, ಬಿಜೆಪಿ 32218 ಮತ, 10ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 53988 ಮತ, ಬಿಜೆಪಿ 37343 ಮತ, 11ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 58261 ಮತ, ಬಿಜೆಪಿ 41945 ಮತ, 12ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 63486, ಬಿಜೆಪಿ 45926 ಮತ, 13ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 67922, ಬಿಜೆಪಿ 49615 ಮತ, 14ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 72568, ಬಿಜೆಪಿ 54399 ಮತ,

15ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 77372, ಬಿಜೆಪಿ 58144 ಮತ, 16ನೇ ಸುತ್ತಿನಲ್ಲಿ ಕಾಂಗ್ರೆಸ್‌ 81795, ಬಿಜೆಪಿ 62184 ಮತ, ಅಂತಿಮ ಸುತ್ತಿನಲ್ಲಿ ಬಿಜೆಪಿಯ 64878 ಮತಗಳನ್ನು ಪಡೆದು ಸೋಲನ್ನಪ್ಪಿದರೆ, ಕಾಂಗ್ರೆಸ್‌ ಅಭ್ಯರ್ಥಿ ಕಳಲೆ ಎನ್‌.ಕೇಶವಮೂರ್ತಿ 86212 ಮತಗಳನ್ನು ಪಡೆಯುವುದರೊಂದಿಗೆ ಗೆಲುವಿನ ನಗೆ ಬೀರಿದರು.

ಇನ್ನು ಉಪ ಚುನಾವಣೆಯ ಸ್ಪರ್ಧಾ ಕಣದಲ್ಲಿ ಉಳಿದಿದ್ದ 9 ಮಂದಿ ಪಕ್ಷೇತರ ಅಭ್ಯರ್ಥಿಗಳ ಪೈಕಿ ಯಾರೊಬ್ಬರೂ ಮತಗಳಿಕೆಯಲ್ಲಿ ಮೂರಂಕಿ ದಾಟಲಿಲ್ಲ. ಆದರೆ, ಕ್ಷೇತ್ರದ 1665 ಮತದಾರರು ನೋಟಾ ಒತ್ತಿದ್ದಾರೆ. ಮಾಜಿ ಸಚಿವ ವಿ.ಶ್ರೀನಿವಾಸಪ್ರಸಾದ್‌ ರಾಜೀನಾಮೆ ಯಿಂದ ತೆರವಾಗಿದ್ದ ಕ್ಷೇತ್ರಕ್ಕೆ ಏ.9ರಂದು ನಡೆದಿದ್ದ ಉಪ ಚುನಾವಣೆಯಲ್ಲಿ ಕ್ಷೇತ್ರದ 201818 ಮಂದಿ ಮತದಾರರ ಪೈಕಿ 156315 ಮಂದಿ ಮತದಾರರು ಹಕ್ಕು ಚಲಾಯಿಸಿದ್ದರು.

ಬೆಳಗ್ಗೆ 7.30ಕ್ಕೆ ಮತ ಎಣಿಕೆ ಕೇಂದ್ರಕ್ಕೆ ತಮ್ಮ ಮತ ಎಣಿಕೆ ಏಜೆಂಟರೊಂದಿಗೆ ಆಗಮಿಸಿದ ಕಳಲೆ ಕೇಶವಮೂರ್ತಿ ಮತ ಎಣಿಕೆ ಪೂರ್ಣಗೊಳ್ಳುವವರಿಗೆ ಹಾಜರಿದ್ದು, ಚುನಾವಣಾಧಿಕಾರಿಗಳಿಂದ ಗೆಲುವಿನ ಪ್ರಮಾಣ ಪತ್ರ ಪಡೆದ ನಂತರ ಮತ ಎಣಿಕೆ ಕೇಂದ್ರದಿಂದ ಹೊರಬಂದ ಅವರನ್ನು ಪಕ್ಷದ ಮುಖಂಡರು, ಕಾರ್ಯಕರ್ತರು ಹಾರ ಹಾಕಿ, ಹೆಗಲಮೇಲೆ ಹೊತ್ತು ಜೈಕಾರ ಕೂಗಿ ಸಂಭ್ರಮಿಸಿದರು.