ಮೈಸೂರು ಯುವತಿ ಕೇಸ್ ಗೆ ಟ್ವಿಸ್ಟ್: ಇದು ಅತ್ಯಾಚಾರ ಯತ್ನವಲ್ಲ, ಪ್ರೇಮಪುರಾಣ…!

Team Udayavani, Sep 6, 2021, 11:31 AM IST

ಮೈಸೂರು: ನಗರದಲ್ಲಿ ಹಾಸ್ಟೆಲ್ ನಲ್ಲಿ ಇತ್ತೀಚೆಗೆ ನಡೆದಿದೆ ಎಂದು ವರದಿಯಾಗಿದ್ದ ಅತ್ಯಾಚಾರ ಯತ್ನ, ಹಲ್ಲೆ ಪ್ರಕರಣಕ್ಕೆ ಮೆಗಾ ಟ್ವಿಸ್ಟ್ ಸಿಕ್ಕಿದೆ. ಇದು ಅತ್ಯಾಚಾರ ಯತ್ನವಲ್ಲ, ಪ್ರೇಮಪುರಾಣ ಎಂದು ತಿಳಿದು ಬಂದಿದೆ.

ನಾಯ್ಡು ನಗರದ ಪ್ರಮುಖ ರಸ್ತೆಯಲ್ಲಿರುವ ಸ್ಟಡಿ ಹೌಸ್ ನಲ್ಲಿದ್ದ ಯುವತಿಯು ತನ್ನ ಮೇಲೆ ಅತ್ಯಾಚಾರ ಯತ್ನವಾಗಿದೆ ಎಂದು ದೂರು ನೀಡಿದ್ದಳು. ತಾನು ಒಂಟಿಯಾಗಿದ್ದ ವೇಳೆ ಸ್ಟಡಿ ಹೌಸ್ ಒಳಪ್ರವೇಶಿಸಿರುವ ವ್ಯಕ್ತಿಯೋರ್ವ ಅತ್ಯಾಚಾರ ಯತ್ನ ನಡೆಸಿ, ಹಲ್ಲೆ ಮಾಡಿ ಪರಾರಿಯಾಗಿದ್ದ ಎಂದು ಆಸ್ಪತ್ರೆಗೆ ದಾಖಲಾಗಿದ್ದಳು.

ತನಿಖೆ ಕೈಗೆತ್ತಿಕೊಂಡಿದ್ದ ಪೊಲೀಸರು ವಿಚಾರಿಸಿದಾಗ ಬೇರೆಯೇ ವಿಚಾರ ಹೊರಬಂದಿತ್ತು. ಅಸಲಿಗೆ ಅಲ್ಲಿ ಅತ್ಯಾಚಾರ ಯತ್ನವೇ ನಡೆದಿರಲಿಲ್ಲ. 28 ವರ್ಷದ ಸಂತ್ರಸ್ತೆಗೂ 21 ವರ್ಷದ ಆರೋಪಿಗೂ ಮೊದಲಿನಿಂದಲೂ ಪರಿಚಯವಿತ್ತು. ಅಷ್ಟೇ ಅಲ್ಲದೆ ಆರೋಪಿಯನ್ನು ಹಾಸ್ಟೆಲ್‌ಗೆ ಬರಲು ಹೇಳಿದ್ದೇ ಸಂತ್ರಸ್ತೆ ಎಂದು ತಿಳಿದು ಬಂದಿತ್ತು.

ಇದನ್ನೂ ಓದಿ:ಮೈಸೂರು ಪಾಲಿಕೆ ವಾರ್ಡ್-36 ಉಪಚುನಾವಣೆ: ಕಾಂಗ್ರೆಸ್ ನ ರಜನಿ ಅಣ್ಣಯ್ಯ ಗೆಲುವು

ಸ್ಟಡಿ ಹೌಸ್ ನಲ್ಲಿ ಸಹಪಾಠಿಗಳು ಯಾರೂ ಇಲ್ಲದ ವೇಳೆ ಇವರು ಒಂದಾಗಿದ್ದರು. ಆದರೆ ದಿಢೀರನೇ ಸಹಪಾಠಿಗಳು ಮರಳಿದಾಗ ಯುವಕ ಪರಾರಿಯಾಗಿದ್ದ. ನಾನು ಅತ್ಯಾಚಾರ ಯತ್ನವೆಂದು ಪೊಲೀಸ್ ದೂರು ನೀಡುತ್ತೇನೆ. ನೀನು ತಪ್ಪಿಸಿಕೋ ಎಂದು ಯುವತಿ ಯುವಕನಿಗೆ ಹೇಳಿದ್ದಳು.

ತಮ್ಮ ಈ ಪ್ರೇಮ ಸಂಬಂಧದ ಬಗ್ಗೆ ಹಿರಿಯರಿಗೆ ಗೊತ್ತಾದರೆ ತೊಂದರೆಯಾಗುತ್ತದೆ ಎಂದು ಅತ್ಯಾಚಾರ ಯತ್ನ, ಹಲ್ಲೆ ಕತೆ ಹೆಣೆದ ಯುವತಿ ಪೊಲೀಸರಿಗೆ ದೂರು ನೀಡಿದ್ದಳು ಎಂದು ವಿಚಾರಣೆಯಲ್ಲಿ ತಿಳಿದು ಬಂದಿದೆ.