ಪ್ರಧಾನಿ ಭೇಟಿ ಯಶಸ್ಸಿಗೆ ದೃಷ್ಟಿ ತೆಗೆದ ಬಿಜೆಪಿ ಕಾರ್ಯಕರ್ತರು

Team Udayavani, Feb 4, 2018, 6:25 AM IST

ಮೈಸೂರು: ಬಿಜೆಪಿ ಪರಿವರ್ತನಾ ರ್ಯಾಲಿಯ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಲು ಭಾನುವಾರ ಬೆಂಗಳೂರಿಗೆ ಆಗಮಿಸುತ್ತಿರುವ ಪ್ರಧಾನಿ ನರೇಂದ್ರ ಮೋದಿ ಅವರ ಭೇಟಿ ಯಶಸ್ವಿಯಾಗಲಿ ಹಾಗೂ ಅವರ ಮೇಲೆ ಕೆಟ್ಟ ದೃಷ್ಟಿ ಬೀಳದಿರಲಿ ಎಂದು ಪ್ರಾರ್ಥಿಸಿ ಬಿಜೆಪಿ ಹಾಗೂ ಯುವಭಾರತ್‌ ಸಂಘಟನೆ ಸದಸ್ಯರು ಶನಿವಾರ ದೃಷ್ಟಿ ತೆಗೆದು ವಿಶೇಷ ಪೂಜೆ ಸಲ್ಲಿಸಿದರು.

ನಗರದ ಅಗ್ರಹಾರದ 101 ಗಣಪತಿ ದೇವಸ್ಥಾನದ ಎದುರು ಜಮಾಯಿಸಿದ ಯುವಭಾರತ್‌ ಸಂಘಟನೆ ಹಾಗೂ ಬಿಜೆಪಿ ಕಾರ್ಯಕರ್ತರು ಮೋದಿ ಅವರ ಭಾವಚಿತ್ರಕ್ಕೆ ದೃಷ್ಟಿ ತೆಗೆದು, ಬೂದು ಕುಂಬಳಕಾಯಿ ಒಡೆದರು. ಕಾಂಗ್ರೆಸ್‌ ಹಾಗೂ
ವಾಟಾಳ್‌ ನಾಗರಾಜ್‌ ಹೆಸರಿನಲ್ಲಿ ಕುಂಬಳಕಾಯಿ ಒಡೆದ ಕಾರ್ಯಕರ್ತರು, ಮೋದಿ ಅವರ ಆಗಮನಕ್ಕೆ ಬಂದ್‌ ನೆಪದಲ್ಲಿ ಆಗುತ್ತಿದ್ದ ಷಡ್ಯಂತ್ರ, ಕೆಟ್ಟ ದೃಷ್ಟಿ, ತೊಂದರೆ ನ್ಯಾಯಾಲಯದ ತೀರ್ಪಿನಿಂದ ನಿವಾರಣೆಯಾಗಿದೆ ಎಂದು ಹರ್ಷವ್ಯಕ್ತಪಡಿಸಿದರು.