ಪಾರ್ಕ್‌ನಲ್ಲಿ ಮಹಿಳೆಗೆ ಹೆರಿಗೆ ಮಾಡಿಸಿದ ಶಿಕ್ಷಕಿ!

Team Udayavani, Mar 10, 2021, 3:25 PM IST

ಮೈಸೂರು: ಉದ್ಯಾನವೊಂದರಲ್ಲಿ ತುಂಬು ಗರ್ಭಿಣಿಯೊಬ್ಬಳು ಹೆರಿಗೆ ನೋವಿನಿಂದ ನರಳುವುದನ್ನು ಕಂಡ ದೈಹಿಕ ಶಿಕ್ಷಣಶಿಕ್ಷಕಿಯೋರ್ವರು ಆಕೆಗೆ ಸುರಕ್ಷಿತವಾಗಿ ಹೆರಿಗೆ ಮಾಡಿಸುವ ಮೂಲಕ ಮಾನವೀಯತೆ ಮೆರೆದ ಘಟನೆ ಮೈಸೂರಲ್ಲಿ ನಡೆದಿದೆ.

ಕೊಡಗು ಜಿಲ್ಲೆ ವಿರಾಜಪೇಟೆ ತಾಲೂಕಿನ ಕೊಣಂಗೇರಿ ನಿವಾಸಿ ಮಲ್ಲಿಗೆ ಎಂಬಾಕೆ ತನ್ನ ಎರಡು ಮಕ್ಕಳೊಂದಿಗೆ ಮೈಸೂರಿಗೆ ಆಗಮಿಸಿದಾಗ ಹೆರಿಗೆ ನೋವು ಕಾಣಿಸಿಕೊಂಡಿದೆ. ತಕ್ಷಣ ತನ್ನ ಎರಡು ಪುಟ್ಟ ಮಕ್ಕಳೊಂದಿಗೆ ಉದ್ಯಾನಕ್ಕೆ ಬಂದ ಕುಳಿತ ಆಕೆ ನೋವಿನಿಂದ ಒದ್ದಾಡುವುದನ್ನು ಕಂಡು ಜನರು ಗುಂಪಾಗಿದ್ದಾರೆ. ಇತ್ತ ತಾಯಿಯ ಹೆರಿಗೆ ನೋವನ್ನು ಅರಿಯದ ಪುಟ್ಟ ಮಕ್ಕಳಿಬ್ಬರುತಾಯಿಯೊಂದಿಗೆ ಅಳಲಾರಂಭಿಸಿವೆ. ಇದೇವೇಳೆಗೆ ಕರ್ತವ್ಯಕ್ಕೆ ತೆರಳುತ್ತಿದ್ದ ದೈಹಿಕ ಶಿಕ್ಷಣ ಶಿಕ್ಷಕಿಯೋರ್ವರು ಜನರು ಗುಂಪುಗೂಡಿರುವುದನ್ನು ಕಂಡು ಸ್ಥಳಕ್ಕೆ ತೆರಳಿದ್ದಾರೆ. ತಕ್ಷಣ ಆ್ಯಂಬುಲೆನ್ಸ್‌ಗೆ ಕರೆ ಮಾಡಿದರೂ, ಆಕೆಗೆಹೆರಿಗೆ ನೋವು ಮತ್ತಷ್ಟು ಹೆಚ್ಚಾದ ಪರಿಣಾಮ ಸ್ಥಳದಲ್ಲೇ ವೈದ್ಯರ ಸಲಹೆಯಂತೆ ಸುಸೂತ್ರವಾಗಿ ಹೆರಿಗೆ ಮಾಡಿಸಿದ್ದಾರೆ.

ಮಾನವೀಯತೆ ಮೆರೆದ ಜನ: ನಗರದ ಪೀಪಲ್ಸ್‌ ಉದ್ಯಾನದಲ್ಲಿ ಹೆರಿಗೆ ನೋವಿನಿಂದ ನರಳುತ್ತಿದ್ದ ಗರ್ಭಿಣಿಯ ಸ್ಥಿತಿಯಲ್ಲಿರುವುದನ್ನುಕಂಡ ನಂಜನಗೂಡು ತಾಲೂಕು ನವಿಲೂರು ಗ್ರಾಮದ ಸರ್ಕಾರಿ ಶಾಲೆ ದೈಹಿಕ ಶಿಕ್ಷಣ ಶಿಕ್ಷಕಿ ಶೋಭಾಕುಮಾರಿ ಕೂಡಲೇ ಆ್ಯಂಬುಲೆನ್ಸ್‌ಗೆಕರೆ ಮಾಡಿದ್ದಾರೆ. ಆದರೆ ಮಹಿಳೆಗೆ ಹೆರಿಗೆನೋವು ಮತ್ತಷ್ಟು ಹೆಚ್ಚಾದ ಹಿನ್ನೆಲೆ ವೈದ್ಯರಸಲಹೆಯಂತೆ ಶಿಕ್ಷಕಿ ಶೋಭಾ ಹೆರಿಗೆಗೆಸುಸೂತ್ರವಾಗಿ ಮಾಡಿಸಿದ್ದಾರೆ. ಈಸಂದರ್ಭದಲ್ಲಿ ಅಸಹಾಯಕರಂತಿದ್ದ ಅಕ್ಕಪಕ್ಕದ ಟೀ ಅಂಗಡಿ ಮಾಲೀಕರು ಟಾರ್ಪಲ್, ಬಟ್ಟೆಗಳನ್ನ ನೀಡಿ ಹೆರಿಗೆಗೆ ಸಹಕಾರ ನೀಡಿದ್ದಾರೆ. ಅಂತಿಮವಾಗಿ ಪಾರ್ಕ್‌ನಲ್ಲೆ ಮಹಿಳೆ ಹೆಣ್ಣು ಮಗುವಿಗೆ ಹೆರಿಗೆ ಮಾಡಿಸುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ.

ಬುಡಕಟ್ಟು ಜನಾಂಗದ ಸೇರಿದ ಮಲ್ಲಿಗೆಯನ್ನು ವಿವಾಹವಾಗಿದ್ದಾತ ಎರಡು ಮಕ್ಕಳ ಜೊತೆಗೆ ಮತ್ತೂಂದು ಮಗುವಿಗೂ ಗರ್ಭವತಿ ಮಾಡಿ ಕೈಕೊಟ್ಟು ಬೀದಿಪಾಲು ಮಾಡಿದ್ದಾನೆ. ಪರಿಣಾಮ ತನ್ನೆರೆಡು ಮಕ್ಕಳನ್ನ ಸಾಕುವ ಸಲುವಾಗಿ ಮೈಸೂರಿಗೆ ಬಂದಿದ್ದಆಕೆ ಹೊಟೇಲ್‌ವೊಂದರಲ್ಲಿ ಕೆಲಸಮಾಡುತ್ತಿದ್ದಳು. ಕಳೆದರೆಡು ದಿನಗಳ ಹಿಂದೆ ತಂದೆ ಮನೆಗೆ ತೆರಳಿದ್ದ ಆಕೆ ಮಂಗಳವಾರಮೈಸೂರಿಗೆ ಸಾರಿಗೆ ಬಸ್‌ನಲ್ಲಿ ಆಗಮಿಸಿದ್ದಾಳೆ.ಬಸ್‌ ನಿಲ್ದಾಣಕ್ಕೆ ಆಗಮಿಸಿದಾಗ ಹೆರಿಗೆ ನೋವು ಕಾಣಿಸಿಕೊಂಡ ಹಿನ್ನೆಲೆ ಪಕ್ಕದ ಪೀಪಲ್ಸ್‌ ಪಾರ್ಕ್‌ಗೆ ತೆರಳಿದ್ದಾಳೆ.

ಒಟ್ಟಾರೆ ಅಸಹಾಯಕ ಸ್ಥಿತಿಯಲ್ಲಿದ್ದ ಮಹಿಳೆಗೆ ನೆರವಾಗುವುದಲ್ಲದೇ, ಆಕೆಗೆ ಸುಸೂತ್ರವಾಗಿ ಹೆರಿಗೆ ಮಾಡಿಸಿ ನಗರದ ಕೆ.ಆರ್‌. ಚಲುವಾಂಭ ಆಸ್ಪತ್ರೆಗೆ ದಾಖಲಿಸಿರುವ ಸ್ಥಳೀಯರ ಕೆಲಸಕ್ಕೆ ಸಾಮಾಜಿಕ ಜಾಲತಾಣ ಸೇರಿದಂತೆ ಎಲ್ಲೆಡೆ ಮೆಚ್ಚುಗೆ ಬಂದಿದೆ.

ಇದೇ ಮೊದಲ ಬಾರಿಗೆ ಹೆರಿಗೆ ಮಾಡಿಸಿದ್ದು: ಶಿಕ್ಷಕಿ :

ನಾನು ಹೆರಿಗೆ ಮಾಡಿಸಿದ್ದು ಇದೇ ಮೊದಲು. ಆರಂಭದಲ್ಲಿ ಭಯವಾಗಿತ್ತು. ವೈದ್ಯರು ನನಗೆ ಧೈರ್ಯ ತುಂಬಿದರು. ಇಂದು ಶಾಲೆಗೆತಡವಾಗಿ ಹೋಗಿರುವುದಕ್ಕೆ ಯಾವುದೇಬೇಸರವಿಲ್ಲ. ಎರಡು ಜೀವಗಳನ್ನು ಉಳಿಸಿದ್ದಕ್ಕೆ ಸಂತಸವಾಗುತ್ತಿದೆ ಎಂದು ದೈಹಿಕ ಶಿಕ್ಷಣ ಶಿಕ್ಷಕಿ ಶೋಭಾ ಕುಮಾರಿ ಮೆಚ್ಚುಗೆವ್ಯಕ್ತಪಡಿಸಿದ್ದಾರೆ. ಇವರು ನಂಜನಗೂಡು ತಾಲೂಕು ನವಿಲೂರು ಗ್ರಾಮದ ಸರ್ಕಾರಿ ಶಾಲೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ತುರ್ತು ಸಂದರ್ಭದಲ್ಲಿ ಸರಿಯಾಗಿ ಹೆರಿಗೆ ಮಾಡಿಸಿದ್ದರಿಂದ ತಾಯಿ ಮಗು ಸುರಕ್ಷಿತವಾಗಿದ್ದಾರೆ.ಹೆರಿಗೆ ಬಳಿಕ ಮಹಿಳೆ ನಿತ್ರಾಣಗೊಂಡಿದ್ದು, ಚಿಕಿತ್ಸೆ ನೀಡಲಾಗುತ್ತಿದೆ. ಮಹಿಳೆಯ ಮತ್ತಿಬ್ಬರು ಮಕ್ಕಳಿಗೆ ಆಹಾರ ನೀಡಿದ್ದು, ತಾಯಿಯೊಂದಿಗಿದ್ದಾರೆ. ತಾಯಿ ಕಾರ್ಡ್‌ನಲ್ಲಿದ್ದ ಮಹಿಳೆಯ ಸಹೋದರನ ಮೊಬೈಲ್‌ ನಂಬರ್‌ಗೆ ಕಡೆ ಮಾಡಿ ಹೆರಿಗೆಯ ಮಾಹಿತಿ ನೀಡಲಾಗಿದೆ. – ಡಾ.ಪ್ರಮೀಳಾ, ಚೆಲುವಾಂಬ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕಿ