ದಲಿತ-ರೈತ ಸಂಘಟನೆಗಳು ಒಂದಾಗಲಿ  

Team Udayavani, Mar 2, 2018, 12:31 PM IST

ಮೈಸೂರು: ರೈತ ನಾಯಕ ಕೆ.ಎಸ್‌.ಪುಟ್ಟಣ್ಣಯ್ಯ ಅವರ ಆಶಯದಂತೆ ದಲಿತ ಹಾಗೂ ರೈತ ಸಂಘಟನೆಗಳು ಒಂದಾಗಿ ಸಾಗಬೇಕಿದೆ ಎಂದು ಹಿರಿಯ ಸಮಾಜವಾದಿ ಪ.ಮಲ್ಲೇಶ್‌ ಅಭಿಪ್ರಾಯಪಟ್ಟರು.

 ರಾಜ್ಯ ರೈತ ಸಂಘ ಮತ್ತು ಹಸಿರು ಸೇನೆ, ದಲಿತ ಸಂಘಟನೆಗಳು ಇನ್ನಿತರ ಸಂಘ-ಸಂಸ್ಥೆಗಳ ಸಹಯೋಗದಲ್ಲಿ ಗುರುವಾರ ನಗರದ ಪುರಭವನದಲ್ಲಿ ಆಯೋಜಿಸಿದ್ದ ರೈತ ಮುಖಂಡ ಕೆ.ಎಸ್‌.ಪುಟ್ಟಣ್ಣಯ್ಯ ಅವರ ನುಡಿನಮನದಲ್ಲಿ ಮಾತನಾಡಿದರು.

ಸಂಘಟನೆಗಳು ಒಂದಾಗಲಿ: ಜಾತೀಯತೆ ಎಂಬುದು ಮೀತಿ ಮೀರಿರುವ ಈ ಸಂದರ್ಭದಲ್ಲಿ ಕೋಮುವಾದ ಎಲ್ಲರ ಮನೆ ಬಾಗಿಲಿಗೆ ಬಂದಿದೆ. ಇಂತಹ ಸಂದರ್ಭದಲ್ಲಿ ಕೋಮುವಾದ ಹೋಗಲಾಡಿಸಲು ಕೆ.ಎಸ್‌.ಪುಟ್ಟಣ್ಣಯ್ಯ ಅವರ ಅವಶ್ಯಕತೆ ಇತ್ತು. ಇದೀಗ ಕೋಮುವಾದದ ವಿರುದ್ಧ ನಾವೆಲ್ಲರೂ ಒಂದಾಗಿ ಸಂಘಟಿತರಾಗಿ ಹೋರಾಡಬೇಕಿದೆ.

ಈ ಹಿಂದೆ ರೈತಸಂಘ ಮತ್ತು ದಸಂಸ ಸದಸ್ಯರು ಒಂದಾಗಿ ಕೆಲಸ ಮಾಡಲು ಪುಟ್ಟಣ್ಣಯ್ಯ ತಯಾರಾಗಿದ್ದರು. ಆದರೆ, ಇಂದಿಗೂ ಈ ಎರಡು ಸಂಘಟನೆಗಳು ಒಂದಾಗಿ ಸಾಗಲಿಲ್ಲ, ಆದರೆ ಪುಟ್ಟಣ್ಣಯ್ಯ ಅವರ ನಿರೀಕ್ಷೆಯಂತೆ 2 ಸಂಘಟನೆಗಳು ಈಗಲಾದರೂ ಒಂದಾಗಿ ಮುನ್ನಡೆಯಬೇಕಿದೆ ಎಂದು ಹೇಳಿದರು.

ರೈತ ಸಂಘದ ಕಾರ್ಯಾಧ್ಯಕ್ಷೆ ಚುಕ್ಕಿ ನಂಜುಂಡಸ್ವಾಮಿ, ರೈತ ಸಂಘದ ಮೆದುಳು ಪೊ›.ನಂಜುಂಡಸ್ವಾಮಿ, ಹೃದಯ ಸುಂದರೇಶನ್‌ ಆಗಿದ್ದು, ಇವರೆಡರ ಸಮ್ಮಿಲನವಾಗಿ ಪುಟ್ಟಣ್ಣಯ್ಯ ಇದ್ದರು. ಹೀಗಾಗಿ ಪುಟ್ಟಣ್ಣಯ್ಯ ಅನುಭವದಿಂದ ಹುಟ್ಟಿದ ಬುದ್ಧಿಜೀವಿಯಾಗಿದ್ದು, ಯಾವುದೇ ಭಿನ್ನಾಭಿಪ್ರಾಯ, ಮನಸ್ಸುಗಳು ಹೊಡೆದರೂ, ಪುಟ್ಟಣ್ಣಯ್ಯ ರೈತ ಚಳವಳಿಯಲ್ಲಿ ಗಟ್ಟಿಯಾಗಿ ನಿಂತಿದ್ದರು ಎಂದರು.

ರಾಜ್ಯ ರೈತ ಸಂಘದ ಪ್ರಧಾನ ಕಾರ್ಯದರ್ಶಿ ಬಡಗಲಪುರ ನಾಗೇಂದ್ರ, ವಿಶಾಲ ದೃಷ್ಟಿಕೋನ ಹೊಂದಿದ್ದ ಪುಟ್ಟಣ್ಣಯ್ಯ, ದುಡಿಯುವ ವರ್ಗಗಳ ಜನರ ಮೇಲೆ ಪ್ರಭಾವ ಬೀರಿದ್ದರು. ಪುಟ್ಟಣ್ಣಯ್ಯ ಅವರ ಅಗಲಿಕೆಗೆ ನಾಡು ಕಂಬನಿ ಮಿಡಿದಿದ್ದು, ಸಾಗರೋಪಾದಿಯಲ್ಲಿ ಆಗಮಿಸಿದ ಜನರು ಅಂತಿಮ ನಮನ ಸಲ್ಲಿಸಿದರು ಎಂದು ಹೇಳಿದರು. 

ವಿಧಾನಸಭಾ ಮಾಜಿ ಅಧ್ಯಕ್ಷ ಕೃಷ್ಣ ಮಾತನಾಡಿ, ಪುಟ್ಟಣ್ಣಯ್ಯ ಅವರು ಪ್ರಬುದ್ಧ ಹೋರಾಟಗಾರರಾಗಿದ್ದು, ತಮ್ಮ ಮಾತಿನ ಮೂಲಕ ಜನರ ಹೃದಯ ಮುಟ್ಟುತ್ತಿದ್ದರು. ಹೀಗಾಗಿ ಈ ಕಷ್ಟವನ್ನು  ಪರಿಹರಿಸುವುದು ತಮ್ಮ ಕರ್ತವ್ಯವೆಂದು ನಂಬಿ ಬದುಕಿದ್ದರು. ಹೀಗಾಗಿ ಎಲ್ಲಾ ಸಂಘಟನೆಗಳು ಬಲಿಷ್ಠವಾಗಲು ಬದ್ಧತೆಯಿಂದ ಕೆಲಸ ಮಾಡುವ ಮೂಲಕ ಎಲ್ಲರೂ ಒಂದಾಗಿ ಜನಪರ ವಿಚಾರಗಳೊಂದಿಗೆ ಮುನ್ನೆಡೆಯಬೇಕು.

ಮೈಸೂರು ವಿವಿ ದೈಹಿಕ ಶಿಕ್ಷಣ ಅಧ್ಯಯನ ವಿಭಾಗದ ವಿಶ್ರಾಂತ ನಿರ್ದೇಶಕ ಡಾ.ಸಿ.ಕೃಷ್ಣ, ಪೊ›.ಕೆ.ಎಸ್‌.ಭಗವಾನ್‌, ಹರವು ದೇವೇಗೌಡ, ರಂಗಾಯಣದ ಮಾಜಿ ನಿರ್ದೇಶಕ ಎಚ್‌.ಜನಾರ್ಧನ್‌, ಎಸ್‌ಯುಸಿಐ(ಸಿ) ರಾಜ್ಯ ಸಮಿತಿ ಸದಸ್ಯ ಎಂ.ಶಶಿಧರ, ರೈತ ಸಂಘದ ಎಂ.ಎಸ್‌.ಅಶ್ವತ್ಥನಾರಾಯಣರಾಜೇ ಅರಸ್‌, ಆಲಗೂಡು ಶಿವಕುಮಾರ್‌, ಶಂಭುಲಿಂಗಸ್ವಾಮಿ,

ನಂಜುಂಡಸ್ವಾಮಿ, ಸ್ವರಾಜ್‌ ಇಂಡಿಯಾದ ಎಚ್‌.ಎ.ನಂಜುಂಡಸ್ವಾಮಿ, ಸಿಪಿಎಂ ಜಿಲ್ಲಾ ಕಾರ್ಯದರ್ಶಿ ಬಸವರಾಜು, ಸಿಪಿಐ ಜಿಲ್ಲಾ ಕಾರ್ಯದರ್ಶಿ ಶೇಷಾದ್ರಿ, ಪೊ›.ಶಬೀರ್‌ ಮುಸ್ತಾಫ‌, ಒಡನಾಡಿ ಸ್ಟಾನ್ಲಿ, ಸರಗೂರು ನಟರಾಜ್‌, ರೈತ ಸಂಘದ ಜಿಲ್ಲಾಧ್ಯಕ್ಷ ಹೊಸೂರು ಕುಮಾರ್‌, ಹೊಸಕೋಟೆ ಬಸವರಾಜು, ಡಿ.ಹೊಸಳ್ಳಿ ಶಿವು ಮತ್ತಿತರರಿದ್ದರು.