ಬಯಲು ಶೌಚ ತಡೆಗೆ ಗೂಲಾಬಿ ಹೂ ವಿತರಿಸಿ ಜಾಗೃತಿ

Team Udayavani, Feb 26, 2017, 12:26 PM IST

ತಿ.ನರಸೀಪುರ: ಗ್ರಾಮ ವಾಸ್ತವ್ಯದ ಮೂಲಕ ಅಧಿಕಾರಿಗಳ ತಂಡವು ಬಯಲು ಶೌಚಾಲಯವನ್ನು ತಡೆಗಟ್ಟಲು ಹಾಗೂ ಶೌಚಾಲಯ ಬಳಕೆ ಕುರಿತು ತಾಲೂಕಿನ ಮೇದನಿ ಗ್ರಾಮದಲ್ಲಿ ಜಾಗೃತಿ ಮೂಡಿಸಿತು.

ಶೌಚಾಲಯ ಜಾಗೃತಿಗಾಗಿ ರಚನೆ ಮಾಡಲಾಗಿದ್ದ 15 ಪಿಡಿಒಗಳ ತಂಡದ ನಿಗ್ರಹ ದಳ ನಸುಕಿನಲ್ಲಿ ಬಯಲು ಬಹಿರ್ದೆಸೆಯ ವಿರುದ್ಧ ಕಾರ್ಯಾಚರಣೆ ನಡೆಸಿತು. ಗ್ರಾಮದ ಸರ್ಕಾರಿ ಪ್ರೌಢಶಾಲೆಯಲ್ಲಿ ವಾಸ್ತವ್ಯವಿದ್ದ ಅಧಿಕಾರಿಗಳ ತಂಡ ಬೆಳಗಾದ ಕೂಡಲೇ ಬಯಲಲ್ಲಿ ಕೂರಲು ಅಣಿಯಾಗುತ್ತಿದ್ದ ಪುರುಷ ಮತ್ತು ಮಹಿಳೆಯರಿಗೆ ಗುಲಾಬಿ ಹೂ ಕೊಟ್ಟು ಸ್ವತ್ಛತೆಯ ಪಾಠ ಮಾಡಿದರು.

ಅಲ್ಲದೆ ಶೌಚಾಲಯವನ್ನು ಕಟ್ಟಿಕೊಂಡು ಬಳಕೆ ಮಾಡುವ ಮೂಲಕ ಆರೋಗ್ಯವಂತ ಬದುಕನ್ನು ನಡೆಸುವಂತೆ ಜಾಗೃತಿ ಮೂಡಿಸಲಾಯಿತು. ಕಾರ್ಯಚರಣೆಗೆ ಸರ್ಕಾರೇತರ ಸಂಸ್ಥೆಗಳು, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಹಾಗೂ ಸಾರ್ವಜನಿಕ ಶಿಕ್ಷಣ ಇಲಾಖೆ ಕೈ ಜೋಡಿಸಿದ್ದವು.

ಈ ನಡುವೆ, ಸ್ವತ್ಛ ಭಾರತ ಅಭಿಯಾನದಡಿ ವೈಯುಕ್ತಿಕ ಶೌಚಾಲಯ ನಿರ್ಮಾಣ ಮತ್ತು ಬಳಕೆ ಬಗ್ಗೆ ಅರಿವು ಮೂಡಿಸಲು ಹಮ್ಮಿಕೊಂಡಿದ್ದ ಅಧಿಕಾರಿಗಳ ಗ್ರಾಮ ವಾಸ್ತವ್ಯ ಕಾರ್ಯಕ್ರಮದಲ್ಲಿ ಜಿಪಂ ಸದಸ್ಯ ಟಿ.ಎಚ್‌. ಮಂಜುನಾಥನ್‌ ಮಾತನಾಡಿ, ಗ್ರಾಮೀಣ ಪ್ರದೇಶದಲ್ಲಿ ಆರೋಗ್ಯಕರ ಸಮಾಜ ನಿರ್ಮಾಣಕ್ಕಾಗಿ ಬಯಲು ಬಹಿರ್ದೆಸೆ ಯನ್ನು ನಿರ್ಬಂಧಿಸುವ ಸಂಕಲ್ಪ ಮಾಡುವುದರೊಂದಿಗೆ ಹಳ್ಳಿಗಾಡಿನ ಜನರು ಶೌಚಾಲಯ ನಿರ್ಮಿಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಮಲ ಮೂತ್ರ ವಿಸರ್ಜನೆಗೆ ಬಯಲು ಪ್ರದೇಶವನ್ನೇ ಶೌಚಾಲಯಕ್ಕಾಗಿ ಆಶ್ರಯಿಸು ವುದರಿಂದ ಪರಿಸರ ಕಲುಷಿತಗೊಂಡು ಅನಾರೋಗ್ಯಕ್ಕೆ ತುತ್ತಾಗಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು. ಶೌಚಾಲಯ ನಿರ್ಮಾಣಕ್ಕೆ ಗ್ರಾಪಂಗಳ ಮೂಲಕ ರಾಜ್ಯ ಹಾಗೂ ಕೇಂದ್ರ ಸರ್ಕಾರ ಫ‌ಲಾನುಭವಿಗಳ ಖಾತೆಗೆ ನೇರವಾಗಿ ಅನುದಾನ ನೀಡುತ್ತಿದೆ. ಶೌಚಾಲಯರಹಿತ ಕುಟುಂಬಗಳು ಅನುದಾನವನ್ನು ಸದ್ಬಳಕೆ ಮಾಡಿಕೊಂಡು ಶೌಚಾಲಯ ಕಟ್ಟಿಸಿಕೊಳ್ಳ ಬೇಕು.

ಈಗಾಗಲೇ ಶೌಚಾಲಯ ನಿರ್ಮಾಣ ಮಾಡಿಕೊಂಡಿರುವವರಿಗೆ ಕೆಲವು ತಾಂತ್ರಿಕ ಕಾರಣಗಳಿಂದಾಗಿ ಹಣ ಬಿಡುಗಡೆಯಾಗಿಲ್ಲ. ಬಾಕಿಯಿರುವ ಹಣ ಬಿಡುಗಡೆಗೆ ಜಿಪಂ ಅಧಿಕಾರಿಗಳು ಕ್ರಮ ಕೈಗೊಳ್ಳಲಿದ್ದಾರೆ. ಎಲ್ಲರೂ ಬಯಲು ಬಹಿರ್ದೆಸೆ ನಿರ್ಬಂಧಿಸುವ ಮೂಲಕ ಸ್ವತ್ಛ ಭಾರತ ಅಭಿಯಾನ‌ ಯಶಸ್ವಿ ಅನುಷ್ಠಾನಕ್ಕೆ ಸಹಕರಿಸಬೇಕೆಂದು ಕೋರಿದರು.

ತಾಪಂ ಸದಸ್ಯ ಕೆ.ಎಸ್‌.ಗಣೇಶ್‌ ಮಾತ ನಾಡಿ, ಹಬ್ಬಗಳು ಬಂತೆಂದರೆ ಸಾಲ ಮಾಡಿ ಯಾದರೂ ಬಾಡೂಟವನ್ನು ಸಿದ್ಧಪಡಿಸಿ, ಅತಿಥಿಗಳನ್ನು ಆಹ್ವಾನಿಸಿ ವ್ಯರ್ಥ ವಾಗಿ ಖರ್ಚು ಮಾಡುತ್ತೇವೆ. ಆದರೆ, ಸರ್ಕಾರ ಸಹಾಯ ಧನವನ್ನು ಕೊಡುತ್ತಿದ್ದರೂ ಶೌಚಾಲಯ ನಿರ್ಮಾಣ ಮಾಡಿಕೊಳ್ಳಲು ಮೀನಮೇಷ ಎಣಿಸುವುದು ಸರಿಯಲ್ಲ. ಆರೋಗ್ಯವಂತ ಸಮಾಜ ನಿರ್ಮಾಣ ಮಾಡಲು ಪ್ರತಿಯೊಬ್ಬರೂ ಕಡ್ಡಾಯವಾಗಿ ಶೌಚಾಲಯಗಳನ್ನು ಬಳಕೆ ಮಾಡಬೇಕೆಂದು ಸಲಹೆೆ ನೀಡಿದರು.

ಜಿಪಂ ಉಪ ಕಾರ್ಯದರ್ಶಿ ಶಿವಕುಮಾರ ಸ್ವಾಮಿ, ಸಹಾಯಕ ಕಾರ್ಯದರ್ಶಿ ಮನೋಜ್‌ಕುಮಾರ್‌, ಸಂಯೋಜಕ ಮಹದೇವ್‌, ತಾಪಂ ಇಒ ಬಿ.ಎಸ್‌.ರಾಜು, ಸಿಡಿಪಿಒ ಬಿ.ಎನ್‌.ಬಸವರಾಜು,  ಡಿ.ಎಸ್‌. ಪ್ರೇಮ್‌ಕುಮಾರ್‌, ಟಿಒಟಿ ನಾಗರಾಜು, ಗ್ರಾಪಂ ಅಧ್ಯಕ್ಷೆ ಪುಟ್ಟತಾಯಮ್ಮ, ಪಿಡಿಒ ಕೆ.ಎಂ.ರವೀಂದ್ರ, ಕಾವೇರಿಪುರ ಮಹೇಶ, ಮಾದೇಶ,  ದೊಡ್ಡಮಾದನಾಯಕ, ಶಿಕ್ಷಕ ಸದಾನಂದ, ಪ್ರಸನ್ನ, ಯರಗನಹಳ್ಳಿ ರಂಗರಾಮು ಇದ್ದರು.