ಹಳೇ ವೈಷಮ್ಯ: ತಡರಾತ್ರಿ ಜೋಡಿ ಕೊಲೆ

Team Udayavani, Feb 9, 2021, 1:56 PM IST

ಮೈಸೂರು: ಹಳೇ ವೈಷಮ್ಯದ ಹಿನ್ನೆಲೆಯಲ್ಲಿ ಇಬ್ಬರನ್ನು ಬರ್ಬರವಾಗಿ ಹತ್ಯೆ ಮಾಡಿರುವ ಘಟನೆ ಭಾನುವಾರ ತಡರಾತ್ರಿ ಮೈಸೂರಿನ ಎಲೆತೋಟದ ಬಳಿ ಸಂಭವಿಸಿದೆ.

ಗೌರಿಶಂಕರನಗರದ ಕಿರಣ್‌(29) ಹಾಗೂ ಕಿಶನ್‌ (30) ಕೊಲೆಯಾದವರು. ಘಟನೆಯಲ್ಲಿ ಮಧು ಎಂಬಾತ ತೀವ್ರವಾಗಿ ಗಾಯಗೊಂಡು ಕೆ.ಆರ್‌.ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ.  ಗೌರಿಶಂಕರ ನಗರ  ಬಡಾವಣೆಯಲ್ಲಿನ ನಿವೇಶನ ವಿಚಾರ ಕುರಿತಂತೆ ಕಿರಣ್‌, ಸ್ವಾಮಿ ಹಾಗೂ ಶಿವು ಎಂಬುವವರ ನಡುವೆ ಕೆಲ ತಿಂಗಳ ಹಿಂದೆ ತಿಕ್ಕಾಟ ನಡೆದಿತ್ತು.

ಈ ವಿಚಾರದಲ್ಲಿ ಮಾತುಕತೆ ನಡೆಸುವ ಸಲುವಾಗಿ ಶಿವು ಎಂಬಾತ ಕಿರಣ್‌ನನ್ನು ಮಾತುಕತೆಗೆ ಆಹ್ವಾನಿಸಿದ್ದಾನೆ. ಮಾತುಕತೆ ಮೂಲಕ ಸಮಸ್ಯೆ  ಬಗೆಹರಿಸಿಕೊಳ್ಳುವ ಸಲುವಾಗಿ ಕಿರಣ್‌, ತನ್ನ ಸ್ನೇಹಿತ ಕಿಶನ್‌ ಮತ್ತು ಮಧು ಅವರೊಂದಿಗೆ ಎಲೆತೋಟದ ಬಳಿಗೆ ತಡರಾತ್ರಿ ತೆರಳಿದ್ದಾರೆ.

ಈ ವೇಳೆ ಎರಡು ಗುಂಪುಗಳ ನಡುವೆ ಮಾತಿಗೆ ಮಾತು ಬೆಳೆದು ಪರಿಸ್ಥಿತಿ ಕೈಮೀರಿದೆ.  ಈ ವೇಳೆ ಶಿವು ಹಾಗೂ ಆತನ ಬೆಂಬಲಿಗರು ಮಾರಕಾಸ್ತ್ರಗಳಿಂದ ಕಿರಣ್‌ ಹಾಗೂ ಕಿಶನ್‌ ಅವರನ್ನು ಮನಬಂದಂತೆ ಥಳಿಸಿದ್ದಾರೆ. ಇದರಿಂದಾಗಿ ಕಿರಣ್‌ ಹಾಗೂ ಕಿಶನ್‌ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಈ ವೇಳೆ ಗಲಾಟೆ ಬಿಡಿಸಲು ಮುಂದಾದ ಮಧು ಎಂಬಾತನಿಗೆ ತೀವ್ರತರವಾದ ಗಾಯವಾಗಿದೆ. ಘಟನೆ ಸಂಬಂಧ ಇಬ್ಬರನ್ನು ಬಂಧಿಸಲಾಗಿದ್ದು, ಮತ್ತಿಬ್ಬರು ತಲೆಮರೆಸಿಕೊಂಡಿದ್ದಾರೆ.

ಇದನ್ನೂ ಓದಿ :ಕೊರೊನಾ ಲಸಿಕೆ ಪಡೆದ ಜಿಲ್ಲಾಧಿಕಾರಿ

ಆರೋಪಿಗಳ ಬಂಧನಕ್ಕಾಗಿ ಪ್ರತ್ಯೇಕ ತಂಡ ರಚನೆ ಮಾಡಲಾಗಿದೆ. ಸ್ಥಳಕ್ಕೆ ಡಿಸಿಪಿ ಡಾ. ಪ್ರಕಾಶ್‌ ಗೌಡ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಕುರಿತು ಕೆ.ಆರ್‌. ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.