ರೈತರ ನೆರವಿಗೆ ಡ್ರೋಣ್‌ ಸಂಶೋಧನೆ

Team Udayavani, Jan 13, 2019, 7:23 AM IST

ಮೈಸೂರು: ರೈತರಿಗಾಗಿ ಮಣ್ಣಿನ ಗುಣಮಟ್ಟ ಅಳೆಯುವ ಹಾಗೂ ಕ್ರಿಮಿಕೀಟಗಳ ಬಾಧೆಯ ಬಗ್ಗೆ ಜಾಗೃತಿ ಮೂಡಿಸುವ ಡ್ರೋಣ್‌ ಸಂಶೋಧನೆಯಲ್ಲಿ ತೊಡಗಿರುವುದಾಗಿ ಡ್ರೋಣ್‌ ಖ್ಯಾತಿಯ ಯುವ ವಿಜ್ಞಾನಿ ಪ್ರತಾಪ್‌ ತಿಳಿಸಿದರು. 

ಕದಂಬ ರಂಗವೇದಿಕೆ ವತಿಯಿಂದ ಶನಿವಾರ ನೀಡಲಾದ ಸನ್ಮಾನ ಸ್ವೀಕರಿಸಿ ಮಾತನಾಡಿದ ಅವರು, ತನ್ನ ಸಂಶೋಧನೆ ಮತ್ತು ಸಾಧನೆಗೆ ಮಾಜಿ ರಾಷ್ಟ್ರಪತಿ ಎ.ಪಿ.ಜೆ.ಅಬ್ದುಲ್‌ ಕಲಾಂ ಅವರು ಪ್ರೇರಣಾದಾಯಕರು, ಮುಂಬರುವ ದಿನಗಳಲ್ಲಿ ಇನ್ನೂ ಹೆಚ್ಚಿನ ಸಂಶೋಧನೆಗಳನ್ನು ಕೈಗೊಂಡು ದೇಶ ಸೇವೆ ಮಾಡುವುದಾಗಿ ಹೇಳಿದರು.

ಸೂಕ್ತ ಮಾರ್ಗದರ್ಶನವಿಲ್ಲದೇ ಸಂಶೋಧನೆ ನಡೆಸುವುದು ಕಷ್ಟ. ಅದಕ್ಕೆ ಕೌಶಲ್ಯದ ಅಗತ್ಯತೆಯೂ ಇದೆ. ಇದಕ್ಕಾಗಿ ಕೌಶಲ್ಯವುಳ್ಳವರು ಹಾಗೂ ಸಂಶೋಧನೆ ಬಗ್ಗೆ ಆಸಕ್ತಿಯುಳ್ಳವರು ತಮ್ಮೊಂದಿಗೆ ಕೈಜೋಡಿಸಬಹುದಾಗಿದೆ ಎಂದು ಹೇಳಿದರು. 

ಕನ್ನಡ ಮಾಧ್ಯಮದಲ್ಲಿ ಅಭ್ಯಾಸ ಮಾಡಿರುವ ಗ್ರಾಮೀಣ ಪ್ರತಿಭೆಗಳಿಗೆ ತಮ್ಮೊಂದಿಗೆ ಸಂಶೋಧನೆಯಲ್ಲಿ ತೊಡಗಲು ಆದ್ಯತೆ ನೀಡುವುದಾಗಿ ಹೇಳಿದರು. ಹಸಿವು ಮತ್ತು ಬಡತನ ಜೀವನದಲ್ಲಿ ಎಲ್ಲವನ್ನೂ ಕಲಿಸಲಿದ್ದು, ಮುಂದೊಂದು ದಿನ ಅದೇ ನಮ್ಮ ಬೆಳವಣಿಗೆಗೆ ಪ್ರೇರಕ ಶಕ್ತಿಯಾಗಲಿದೆ ಎಂದರು.

ಪ್ರತಾಪ್‌ ಅವರನ್ನು ಸನ್ಮಾನಿಸಿದ ಸಾಹಿತಿ ಪ್ರೊ.ಕಾಳೇಗೌಡ ನಾಗವಾರ ಮಾತನಾಡಿ, ಮಂಡ್ಯ ಜಿಲ್ಲೆಯ ಕುಗ್ರಾಮದಲ್ಲಿ ರೈತಾಪಿ ಕುಟುಂಬದಲ್ಲಿ ಜನಿಸಿದ ಪ್ರತಾಪ್‌, ಆರ್ಥಿಕ ಅಭದ್ರತೆಯ ನಡುವೆಯೂ ವಿಶ್ವಮಟ್ಟದ ಹೆಮ್ಮೆಯ ಪ್ರತಿಭೆಯಾಗಿ ಬೆಳೆದಿದ್ದು, ಮುಂದಿನ ಅವರ ಸಂಶೋಧನೆಗೆ ಸರ್ಕಾರ ಮತ್ತು ಸಂಘಸಂಸ್ಥೆಗಳು ಬೆಂಬಲವಾಗಿ ನಿಲ್ಲಬೇಕಿದೆ ಎಂದು ಹೇಳಿದರು. 

ಕಾರ್ಯಕ್ರಮದಲ್ಲಿ ಕದಂಬ ರಂಗವೇದಿಕೆ ಅಧ್ಯಕ್ಷ ರಾಜಶೇಖರ ಕದಂ, ರೋಟರಿ ಮೈಸೂರು ಉತ್ತರ ಅಧ್ಯಕ್ಷ ಎಂ.ಕೆ.ನಂಜಯ್ಯ, ಜಿಲ್ಲಾ ಕಸಾಪ ಮಾಜಿ ಅಧ್ಯಕ್ಷ ಮಡ್ಡೀಕೆರೆ ಗೋಪಾಲ್‌, ಎಂ.ಚಂದ್ರಶೇಖರ್‌ ಇತರರು ಹಾಜರಿದ್ದರು.