ದಸರಾ ಜಂಬೂ ಸವಾರಿಗೆ ಆನೆಗಳ ಆರೋಗ್ಯ ತಪಾಸಣೆ

Team Udayavani, Aug 7, 2019, 3:00 AM IST

ಸಂತೆಮರಹಳ್ಳಿ: ವಿಶ್ವ ವಿಖ್ಯಾತ ಮೈಸೂರು ದಸರಾ ಮಹೋತ್ಸವ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಜಂಬೂಸವಾರಿ ಪ್ರಮುಖ ಆಕರ್ಷಣೆಯ ಕೇಂದ್ರ ಬಿಂದುವಾಗಿರುವ ಗಜಪಡೆಯನ್ನು ಸಿದ್ಧಪಡಿಸಲು ನಿಟ್ಟಿನಲ್ಲಿ ಅರಣ್ಯ ಇಲಾಖೆಯು ಬಿಆರ್‌ಟಿ ಹುಲಿ ಯೋಜನೆಯ ವ್ಯಾಪ್ತಿಯಲ್ಲಿನ ಕೆ.ಗುಡಿ ಅರಣ್ಯ ಪ್ರದೇಶದ ಶಿಬಿರದಲ್ಲಿರುವ ಗಜೇಂದ್ರ ಹಾಗೂ ದುರ್ಗಾಪರಮೇಶ್ವರಿ ಆನೆಗಳ ಆರೋಗ್ಯದ ಸ್ಥಿತಿಗತಿಯನ್ನು ಪರಿಶೀಲಿಸಲಾಯಿತು.

ಡಿಸಿಎಫ್ ಅಲೆಕ್ಸಾಂಡರ್‌ ಹಾಗೂ ಪಶುವೈದ್ಯ ಡಾ.ನಾಗರಾಜು ಆನೆಗಳ ಶಿಬಿರಕ್ಕೆ ಭೇಟಿ ನೀಡಿ ತಪಾಸಣೆ ನಡೆಸಿದರು. ಆನೆಗಳಲ್ಲಿ ಆರೋಗ್ಯದಲ್ಲಿ ಏರುಪೇರು, ಶಕ್ತಿಯುತವಾಗಿದೆಯೇ, ಹಣ್ಣಾನೆಗಳು ಗರ್ಭ ಧರಿಸಿವೆಯಾ, ಚಿಕ್ಕ ಮರಿಗಳಿವೆಯಾ ಎಂದು ಪರಿಶೀಲನೆ ನಡೆಸಲಾಗುವುದು.

ನಂತರ ಕೆಲವು ದಿನಗಲ್ಲಿ ಆನೆಗಳ ಉತ್ತಮ ಸ್ಥಿತಿಯಲ್ಲಿರುವ ಆನೆಗಳ ಪಟ್ಟಿಯನ್ನು ಬೆಂಗಳೂರಿನ ಅರಣ್ಯ ಭವನದ ಹಿರಿಯ ಅಧಿಕಾರಿಗಳ ಅನುಮತಿಗೆ ಕಳುಹಿಸಲಾಗುತ್ತದೆ. ನಂತರ ಆಯ್ಕೆಯಾದ ಆನೆಗಳನ್ನು ಅಂತಿಮ ಪಟ್ಟಿ ಸಿದ್ಧಮಾಡಲಾಗುತ್ತದೆ. ನಮ್ಮ ಶಿಬಿರದಲ್ಲಿರುವ ದುರ್ಗಾಪರಮೇಶ್ವರಿ ಆನೆಯು ದಸರಾ ಜಂಬೂ ಸವಾರಿಗೆ ಆಯ್ಕೆಯಾಗುವ ಸಾಧ್ಯತೆ ಇದೆ ಎಂದು ಕೆ.ಗುಡಿ ಆರ್‌.ಎಫ್. ಅಭಿಲಾಷ್‌ ತಿಳಿಸಿದರು.

ಆಯ್ಕೆಯಾದ ಆನೆಗಳಿಗೆ ತರಬೇತಿ: ವಿಶ್ವವಿಖ್ಯಾತ ಮೈಸೂರು ದಸರಾದಲ್ಲಿ ಜಂಬೂ ಸವಾರಿಗೆ ಆಯ್ಕೆಯಾದ ಆನೆಗಳನ್ನು ಸಿದ್ಧಗೊಳಿಸುವ ಮೊದಲು 50 ರಿಂದ 60 ದಿನಗಳು ತರಬೇತಿ ನೀಡಲಾಗುತ್ತಿದೆ. ಆಹಾರ, ಚಿಕಿತ್ಸೆ, ಪಟಾಕಿ, ಸಿಡಿಮದ್ದು ಸೇರಿದಂತೆ ಅನೇಕ ತರಬೇತಿಗಳನ್ನು ನೀಡಿ ಸಜ್ಜುಗೊಳಿಸುತ್ತಾರೆ.