ಬೆಳೆದ ಬಾಳೆ ಗಿಡವನ್ನು ಕಡಿದು ಹಾಕಿದ ಕೇಡಿಗೇಡಿಗಳು; ಮನನೊಂದ ರೈತ ಆತ್ಮಹತ್ಯೆಗೆ ಯತ್ನ

Team Udayavani, Mar 15, 2022, 11:58 AM IST

ನಂಜನಗೂಡು : ಬೆಳೆದ ಬಾಳೆ ಬೆಳೆಯನ್ನು ಕಿಡಿಗೇಡಿಗಳು ಕಡಿದು ಹಾಕಿದ್ದರಿಂದ ಮನನೊಂದ ರೈತನೊಬ್ಬ ಆತ್ಮಹತ್ಯೆಗೆ ಯತ್ನಿಸಿರುವ ಘಟನೆ ನಂಜನಗೂಡಿನ ಹಾಡ್ಯ ಗ್ರಾಮದಲ್ಲಿ ನಡೆದಿದೆ.

ತಾಲೂಕಿನ ನಾಗೇಶ್ (32) ಆತ್ಮಹತ್ಯೆಗೆ ಯತ್ನಿಸಿರುವ ರೈತ.

ರೈತ ನಾಗೇಶ್ ಸಾಲ ಸೋಲ ಮಾಡಿ ಸಾಲ ಸೋಲ ಮಾಡಿ ಒಂದು ಎಕ್ರೆ ಜಮೀನಿನಲ್ಲಿ ಬಾಳೆ ಬೆಳೆ ಬೆಳೆದಿದ್ದ. ಇನ್ನೇನು ಫಸಲು ಕೈಗೆ  ಬಂತು ಎನ್ನುವ ಖುಷಿಯಲ್ಲಿ ಸೋಮವಾರ ಜಮೀನಿಗೆ ಬಂದು ನೋಡಿದಾಗ, ಬಾಳೆ ಬೆಳೆಯನ್ನು ಯಾರೋ ಕೇಡಿಗೇಡಿಗಳು ಕಡಿದು ಹಾಕಿದ್ದಾರೆ.

ಇದರಿಂದ ಮನನೊಂದ ರೈತ  ಕ್ರಿಮಿನಾಶ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾರೆ. ತಕ್ಷಣ ನಾಗೇಶ್ ರನ್ನು ನಂಜನಗೂಡಿನ ಸರ್ಕಾರಿ ಆಸ್ಪತ್ರೆಗೆ ಚಿಕಿತ್ಸೆಗೆ ದಾಖಲು ಮಾಡಿ ಹೆಚ್ಚಿನ ಚಿಕಿತ್ಸೆಗೆ  ಮೈಸೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸಾವು ಬದುಕಿನ ನಡುವೆ ನಾಗೇಶ್ ಹೋರಾಟ ನಡೆಸುತ್ತಿದ್ದಾರೆ.

ರಾಜಕೀಯ ದ್ವೇಷಕ್ಕೆ ಕಟಾವಿಗೆ ಬಂದಿದ್ದ ಗೊನೆ ಬಿಟ್ಟಿರುವ ಬಾಳೆಗಿಡಗಳನ್ನು ನಾಶ ಪಡಿಸಲಾಗಿದೆ  ಎಂಬುದು ಕುಟುಂಬದವರ ಗಂಭೀರ ಆರೋಪವಾಗಿದೆ .

ಈ ಕುರಿತು  ನಂಜನಗೂಡು ತಾಲ್ಲೂಕಿನ ಹುಲ್ಲಹಳ್ಳಿ  ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.