ಕೆಆರ್‌ಐಡಿಎಲ್‌ಗೆ ಅನುದಾನ ನೀಡಿದರೂ ಕೆಲಸ ಮಾಡಲ್ಲ… ಎರಡು ತಿಂಗಳೊಳಗೆ ಕಾಮಗಾರಿ ಮುಗಿಸುವಂತೆ ಸೂಚನೆ

Team Udayavani, Dec 29, 2022, 8:22 PM IST

ಹುಣಸೂರು.: ಕಳೆದ ಹತ್ತು ವರ್ಷಗಳಿಂದ ತಾಲೂಕಿನ 32 ಗ್ರಾಮಗಳಲ್ಲಿ ಅಂಬೇಡ್ಕರ್ ಹಾಗೂ ನಾಲ್ಕು ಕಡೆ ಜಗಜೀವನರಾಂ ಭವನ ಸೇರಿದಂತೆ 50 ಕ್ಕೂ ಹೆಚ್ಚು ಕಾಮಗಾರಿಗಳು ಇನ್ನೂ ನೆನೆಗುದಿಗೆ ಬಿದ್ದಿರುವ ಬಗ್ಗೆ ಕೆ.ಆರ್.ಐ.ಡಿ.ಎಲ್ ಸಂಸ್ಥೆ ವಿರುದ್ದ ಬೇಸರ ವ್ಯಕ್ತಪಡಿಸಿ, ಇನ್ನೆರಡು ತಿಂಗಳಲ್ಲಿ ಕೈಗೆತ್ತಿಕೊಂಡಿರುವ ಎಲ್ಲಾ ಕಾಮಗಾರಿ ಮುಗಿಸುವಂತೆ ಇಂಜಿನಿಯರ್‌ಗಳಿಗೆ ತಾ.ಪಂ.ಆಡಳಿತಾಧಿಕಾರಿ ನಂದಾ ಸೂಚಿಸಿದರು.

ನಗರದ ತಾ.ಪಂ. ಸಭಾಂಗಣದಲ್ಲಿ ನಡೆದ ಸಾಮಾನ್ಯ ಸಭೆಯಲ್ಲಿ ಮಾತನಾಡಿದ ಅವರು ಕೆಆರ್‌ಐಡಿಎಲ್ ಸಾಕಷ್ಟು ಕಾಮಗಾರಿಗಳನ್ನುವಹಿಸಿ, ಮೊದಲೇ ಅನುದಾನವನ್ನೂ ಬಿಡುಗಡೆ ಮಾಡಿದ್ದರೂ ವಿನಾಕಾರಣ ತಡ ಮಾಡುತ್ತಿದ್ದೀರಾ, ಹೀಗಾದರೆ ಹೇಗೆಂಬ ಆಡಳಿತಾಧಿಕಾರಿ ನಂದಾರ ಅಸಮಾಧಾನಕ್ಕೆ ಕೆಲ ಕಡೆ ನಿವೇಶನದ ವಿವಾದವಿದೆ. ಕೆಲವುಕಡೆಗಳಲ್ಲಿ ಕೆಲಸ ಬದಲಾವಣೆಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಹುಣಸೂರಿನ ಜಗಜೀವನರಾಂ ಭವನ ಪೂರ್ಣಗೊಳ್ಳಲು ಇನ್ನೂ 17 ಲಕ್ಷ ಬಾಕಿ ಬರಬೇಕಿದ್ದು, ನಗರಸಭೆಯಿಂದ 10 ಲಕ್ಷ ಅನುದಾನ ನಿರೀಕ್ಷಿಸಲಾಗಿದೆ. 15 ಹಾಡಿಗಳಲ್ಲಿ ಅಂಗನವಾಡಿಕಟ್ಟಡ, 11 ಮಾದರಿ ಗ್ರಾಮ ಯೋಜನೆ ಹಾಗೂ ಮುಖ್ಯಮಂತ್ರಿಗಳ ಗ್ರಾಮವಿಕಾಸ ಯೋಜನೆಯ 10 ಗ್ರಾಮಗಳಲ್ಲಿ ವಿವಿಧ ಕಾಮಗಾರಿಗಳು ಪ್ರಗತಿಯಲ್ಲಿದೆ, ಚಿಕ್ಕಹುಣಸೂರಚಿಕ್ಕಹುಣಸೂರು ಕೆರೆ ಅಭಿವೃದ್ದಿಗೆ ಇನ್ನೂ 25 ಲಕ್ಷರೂ ಅನುದಾನ ಬರಬೇಕಿದ್ದು, ಅನುದಾನ ಬಂದ ನಂತರ ಪೂರ್ಣಗೊಳಿಸಿ ಸಾರ್ವಜನಿಕ ಸೇವೆಗೆ ಸಮರ್ಪಿಸಲಾಗುವುದೆಂದು ಸಹಾಯಕ ಇಂಜಿನಿಯರ್ ವಿಜಯ್ ತಿಳಿಸಿದರು.

ನಿಯಂತ್ರಣದಲ್ಲಿ ಚರ್ಮಗಂಟು ರೋಗ:
ತಾಲೂಕಿನಲ್ಲಿ 74,510 ಜಾನುವಾರುಗಳಿದ್ದು, 55 ರಾಸುಗಳಿಗೆ ಚರ್ಮಗಂಟುರೋಗ ಕಂಡುಬಂದಿದ್ದು, ಯಾವುದೇ ಸಾವು ಸಂಭವಿಸಿಲ್ಲ. ಲಸಿಕೆ ಕೊರತೆ ಕಂಡು ಬಂದ ವೇಳೆ ಖರೀದಿಸಿ ಹಾಗೂ ಡೇರಿ ಕಡೆಯಿಂದ ಲಸಿಕೆ ನೀಡಲಾಗಿದೆ. ಈಗಾಗಲೆ 60,510 ರಾಸುಗಳಿಗೆ ಲಸಿಕೆ ಹಾಕಲಾಗಿದೆ. ಕಾಲುಬಾಯಿ ಜ್ವರ 73 ಸಾವಿರ ರಾಸುಗಳಿಗೆ ಲಸಿಕೆ ಹಾಕಲಾಗಿದೆ ಎಂದು ಸಹಾಯಕ ನಿರ್ದೇಶಕ ಡಾ.ಚನ್ನಬಸಪ್ಪ ತಿಳಿಸಿದರು.

ಬಾಲ್ಯ ವಿವಾಹ ತಡೆಗೆ ಸಹಕಾರ ಸಿಗುತ್ತಿಲ್ಲ:
ಬಾಲ್ಯ ವಿವಾಹ ಒಂದು ಪಿಡುಗಾಗಿದ್ದು, ತಾಲೂಕಿನಲ್ಲಿ ಸಾಕಷ್ಟು ಪ್ರಕರಣಗಳು ಬೆಳಕಿಗೆ ಬರುತ್ತಿದ್ದು, ಅಂಗನವಾಡಿ ಕಾರ್ಯಕರ್ತೆ ಬಾಲ್ಯ ವಿವಾಹದ ಬಗ್ಗೆ ಮಾಹಿತಿ ನೀಡಿದ್ದಾರೆಂಬ ಕಾರಣಕ್ಕೆ ಮರಳಯ್ಯನಕೊಪ್ಪಲಿನಲ್ಲಿ ಅಂಗನವಾಡಿಗೆ ಮಕ್ಕಳನ್ನೇ ಕಳುಹಿಸುತ್ತಿಲ್ಲ, ಹಲವೆಡೆ ಕಾರ್ಯಕರ್ತೆಯರನ್ನೇ ಟಾರ್ಗೆಟ್ ಮಾಡಲಾಗುತ್ತಿದೆ, ತುಂಬಾ ಥ್ರಟನಿಂಗ್ ಇದೆ ಇದಕ್ಕಾಗಿ ಎಲ್ಲಾ ಇಲಾಖೆಗಳ ಮುಖ್ಯಸ್ಥರಿದ್ದರೂ ಯಾರೂ ಮುಂದೆ ಬರುತ್ತಿಲ್ಲ, ನಮ್ಮ ಇಲಾಖೆಯಲ್ಲಿರೋದು ಬರೀ ಮಹಿಳೆಯರೇ ನಾವು ಮದ್ಯರಾತ್ರಿಯಲ್ಲಿ ಹೇಗೆ ಹಳ್ಳಿಗೆ ಹೋಗೋದು ಸಾರ್ ಎಲ್ಲರೂ ಸಹಕಾರ ನೀಡಬೇಕೆಂದು ಮನವಿ ಮಾಡಿದರು. 2017- 18 ರಿಂದ 8 ಅಂಗನವಾಡಿಗಳ ಕಟ್ಟಡ ಕಾಮಗಾರಿ ಅರೆಬರೆಯಾಗಿದೆ. ಹೆಗ್ಗಂದೂರು ಕೇಂದ್ರಕ್ಕೆ ಮೂಲಭೂತ ಸೌಕರ್ಯ ಕಲ್ಪಿಸಿಕೊಡುವಂತೆ ಕೋರಿದರು.

ಎಲ್ಲರೂ ಸಹಕಾರ ನೀಡಬೇಕು, ಇಓ ಮನು:
ಕ್ರಮತೆಗೆದುಕೊಳ್ಳಲು ಎಲ್ಲ ಇಲಾಖೆಗಳ ಸಹಕಾರ ಅಗತ್ಯ, ಪ್ರತಿ ಗ್ರಾ.ಪಂ.ನಲ್ಲೂ ಬಾಲವಿಕಾಸ ಸಮಿತಿ ಇದ್ದು, ಇವರ ಸಹಕಾರ ಪಡೆದುಕೊಳ್ಳಿ, ಜೊತೆಗೆ ಇತರೆ ಇಲಾಖಾಧಿಕಾರಿಗಳು ಸಹಕಾರ ನೀಡುವಂತೆ ಸೂಚಿಸಲಾಗುವುದೆಂದು ಇಓ.ಮನು.ಬಿ.ಕೆ. ಭರವಸೆ ಇತ್ತರು.

ವಿಮೆ ಇಲ್ಲದ ವಾಹನಗಳ ಮೇಲೇಕೆ ಕ್ರಮವಿಲ್ಲ: ಮಾಹಿತಿ ಇಲ್ಲವೆಂದ ಎಆರ್‌ಟಿಓ:
ತಾಲೂಕಿನಲ್ಲಿ ಸುಮಾರು 700 ಟ್ರಾಕ್ಟರ್‌ಗಳಿಗೆ ವಿಮೆ ಇಲ್ಲವೆಂಬ ಆತಂಕಕಾರಿ ಮಾಹಿತಿ ಬಂದಿದೆ. ಈಬಗ್ಗೆ ಸಾರಿಗೆ ಇಲಾಖೆ ಯಾವಕ್ರಮವಹಿಸಿದೆ ಎಂಬ ಇಓ ಮನು.ಬಿ.ಕೆ.ರವರ ಪ್ರಶ್ನೆಗೆ ವಿಮೆ ಇಲ್ಲದಿರುವುದು ಗಮನಕ್ಕೆ ಬಂದಿದೆ ಆದರೆ ನಿಖರ ಮಾಹಿತಿ ಇಲ್ಲವೆಂದು ಎ.ಆರ್.ಟಿ.ಓ.ಹೇಮಾವತಿಯವರ ಉತ್ತರಕ್ಕೆ ವಾರದೊಳಗೆ ಕ್ರಮವಾಗಿರುವ ಹಾಗೂ ವಿಮೆ ಇಲ್ಲದ ಟ್ರಾಕ್ಟರ್‌ಗಳ ಬಗ್ಗೆ ಲಿಖಿತ ಮಾಹಿತಿ ನೀಡಬೇಕೆಂದು ಇ.ಓ.ಸೂಚಿಸಿದರು.

ಕೊರೊನಾ ಎಚ್ಚರಿಕೆ ಇರಲಿ:
ರೇಷ್ಮೆ ಬೆಳೆ ಬಗ್ಗೆ ವ್ಯಾಪಕ ಪ್ರಚಾರ ನೀಡಿ, ಕ್ಷೇತ್ರೋತ್ಸವಕ್ಕೆ ಹೆಚ್ಚಿನ ರೈತರನ್ನು ಸೇರಿಸಿ, ಅರಣ್ಯ ಇಲಾಖೆ ನಿಗದಿತ ಅವಧಿಯೊಳಗೆ ಕೆಲಸ ಮುಗಿಸುವಂತೆ ಸೂಚಿಸಿದರು. ವಿವಿಧ ಇಲಾಖೆಗಳ ಪರಿಶೀಲನೆ ನಡೆಸಿ, ಕೊರೊನಾ ದಿಂದಾಗಿ ಜನವರಿ-ಫೆಬ್ರವರಿಯಲ್ಲಿ ಸರಕಾರ ಮತ್ತಷ್ಟು ಕಠಿಣ ನಿರ್ದಾರಗಳನ್ನು ಕೈಗೊಳ್ಳಬಹುದಾಗಿದ್ದು, ಆದಷ್ಟು ಶೀಘ್ರ ಕಾಮಗಾರಿಗಳನ್ನು ಮುಗಿಸಬೇಕೆಂದು ಅಧಿಕಾರಿಗಳಿಗೆ ಆಡಳಿತಾಧಿಕಾರಿ ಸೂಚಿಸಿದರು. ತಾ.ಪಂ.ಇಓ ಮನು, ತಾಲೂಕು ಯೋಜನಾಧಿಕಾರಿ ಎಂ.ಎಸ್.ರಾಜೇಶ್ ಇದ್ದರು.