ಜಲಸಂಜೀವಿನಿ ಪ್ರಶಸಿಗೆ ಭಾಜನವಾದ ಮೋದೂರು ಗ್ರಾಪಂ

Team Udayavani, Apr 10, 2023, 3:16 PM IST

ಹುಣಸೂರು: ಜಲ ಕ್ರಾಂತಿ ನಡೆಸಿರುವ ಹುಣಸೂರು ತಾಲೂಕಿನ ಮೋದೂರು ಗ್ರಾಮ ಪಂಚಾಯ್ತಿಯು ಜಲ ಸಂಜೀವಿನಿ ಪ್ರಶಸ್ತಿ ಪಡೆದಿರುವ ಜಿಲ್ಲೆಯ ಏಕೈಕ ಗ್ರಾಮ ಪಂಚಾಯ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಮೈಸೂರು ಜಿಲ್ಲೆಯ ಹುಣಸೂರು ತಾಲೂಕಿನ ಗಾವಡಗೆರೆ ಹೋಬಳಿಯ ಅತೀ ಚಿಕ್ಕ ಗ್ರಾಮ ಪಂಚಾಯ್ತಿ ಯಾದ ಮೋದೂರು ಗ್ರಾಪಂನಲ್ಲಿ ಕೇವಲ ಎಂಟು ಸದಸ್ಯರನ್ನು ಹೊಂದಿದ್ದು, ಗ್ರಾಪಂಗೆ ಮೋದೂರು, ಮೋದೂರು ಪಿ.ಕೊಪ್ಪಲು, ಮೋದೂ ರು ಎಂ.ಕೊಪ್ಪಲು ಹಾಗೂ ಸಣ್ಣೇನಹಳ್ಳಿ ಗ್ರಾಮಗಳು ಸೇರಿವೆ. ನರೇಗಾ ಯೋಜನೆಯಡಿ ಜಲಸಂರಕ್ಷಣೆ, ಎರೆಹುಳು ಗೊಬ್ಬರದ ತೊಟ್ಟಿ ನಿರ್ಮಾಣ ಸೇರಿದಂತೆ ಪರಿಸರ ಪೂರಕವಾದ ಕಾರ್ಯಕ್ರಮಗಳಿಗೆ ಆದ್ಯತೆ ನೀಡಿರುವುದು ಗಮನಾರ್ಹ. ಬೆಂಗಳೂರಿನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಗ್ರಾಮೀಣಾಭಿವೃದ್ಧಿ ಇಲಾಖೆಯ ನಿರ್ದೇಶಕಿ ಶಿಲ್ಪನಾಗ್‌ ಅವರಿಂದ ಪಿಡಿಒ ಪ್ರಕಾಶ್‌ ಪಂಚಾಯ್ತಿ ಪರವಾಗಿ ಪ್ರಶಸ್ತಿ ಸ್ವೀಕರಿಸಿದರು.

ಕೇಂದ್ರ ಸರಕಾರದ ಅಮೃತಸರೋವರ ಕಾರ್ಯಕ್ರಮದನ್ವಯ ನೀರಿನ ಸದ್ಬಳಕೆ, ಸಂಗ್ರಹಣೆ, ನಿರ್ವಹಣಿ ಒಳಗೊಂಡು ನೀರಿನ ಸಂರಕ್ಷಣಿ ಕುರಿತ ಕಾರ್ಯಕ್ರಮಗಳ ನಿಖರ ಮಾಹಿತಿ ಯನ್ನು ಆನ್‌ಲೈನ್‌ ಮೂಲಕ ಇಲಾಖೆಗೆ ಕೆಎಂಎಲ್‌ ಫೈಲ್‌ ಮೂಲಕ ಸಕಾಲದಲ್ಲಿ ಸಲ್ಲಿಸಿದ್ದು, ಇದುವೆ ಪ್ರಶಸ್ತಿಗೆ ಪೂರಕವಾಗಿದೆ.

ಮುಚ್ಚಿಹೋಗಿದ್ದ ಅಕ್ಕ-ತಂಗಿಯರ ಕೊಳದಲ್ಲಿ ಜಲ ಮರು ಹೂರಣ: ಮೋದೂರಿನಲ್ಲಿ 30ವರ್ಷಗಳಿಂದ ಮುಚ್ಚಿ ಹೋಗಿದ್ದ ಪುರಾತನವಾದ ಅಕ್ಕ-ತಂಗಿಯರ ಕೊಳ ಸಂಪೂರ್ಣ ಮುಚ್ಚಿ ಹೋಗಿ,ಒತ್ತುವರಿಯೂ ಆಗಿತ್ತು. ಗ್ರಾಮಸ್ಥರ ಮನವೊಲಿಸಿ ಒತ್ತುವರಿ ತೆರವುಗೊಳಿಸಿ ಅಕ್ಕ-ತಂಗಿಯರ ಕೊಳವನ್ನು ನರೇಗಾ ಯೋಜನೆಯಡಿ 10 ಲಕ್ಷ ವೆಚ್ಚದಡಿ ಸಂಪೂರ್ಣ ಅಭಿವೃದ್ಧಿಗೊಳಿಸಿ ಜೀರ್ಣೋದ್ಧಾರಗೊಳಿಸಿ ಸುಂದರ ಕೊಳವನ್ನಾಗಿಸಲಾಗಿದ್ದು. ಜಾನುವಾರುಗಳಿಗೂ ಆಶ್ರಯದಾತವಾಗಿದೆ. ಅಕ್ಕ-ಪಕ್ಕದ ಬೋರ್‌ವೆಲ್‌ ಗಳಲ್ಲಿ ನೀರು ಸಮೃದ್ಧವಾಗಿದೆ. ಮೋದೂರಿನ ಚನ್ನಯ್ಯನಕೆರೆ, ಮೋದೂರು ಪಿ.ಕೊಪ್ಪಲಿನ ಮೊಕ್ಕಟ್ಟೆಕೆ ರೆಯೂ ಅಭಿವೃದ್ಧಿಗೊಂಡಿದೆ. ಕೆರೆಯಿಂದ 2ಕಿ.ಮೀ. ಉದ್ದದ 10 ಲಕ್ಷ ರೂ. ವೆಚ್ಚದಲ್ಲಿ ಕಾಲುವೆ ನಿರ್ಮಿಸ ಲಾಗಿದ್ದು, 2022-23ನೇ ಸಾಲಿನಲ್ಲಿ ನರೇಗಾ ಯೋಜನೆಯಡಿ ಜಲ ಸಂರಕ್ಷಣೆಗಾಗಿ 80.80 ಲಕ್ಷ ವೆಚ್ಚ ಮಾಡಿದೆ.

ತಾಲೂಕಲ್ಲೇ ಹೆಚ್ಚು ಎರೆಹುಳು ತೊಟ್ಟಿ ನಿರ್ಮಾಣದ ಹೆಗ್ಗಳಿಕೆ: ಈ ಗ್ರಾಪಂ 13.25 ಲಕ್ಷ ವೆಚ್ಚ ದಡಿ 50 ಎರೆಹುಳು ತೊಟ್ಟಿ ನಿರ್ಮಿಸುವ ಮೂಲಕ ತಾಲೂಕಿಗೆ ಮೊದಲ ಸ್ಥಾನದಲ್ಲಿದೆ. 20 ಬಚ್ಚಲುಗುಂಡಿ, 17 ದನದಕೊಟ್ಟಿಗೆ ನಿರ್ಮಿಸಿದೆ. ಮೋದೂರಿನ ಸರಕಾರಿ ಹಿರಿಯ ಪ್ರಾಥ ಮಿಕ ಶಾಲೆಯಲ್ಲಿ ಹೈಟೆಕ್‌ ಶೌಚಗೃಹ ನಿರ್ಮಿಸಿಕೊಟ್ಟಿದೆ.

ತಾಲೂಕಿನ ಮೊದಲ ಮಹಿಳಾ ಚಾಲಕಿ ಪದ್ಮಾ : ಕಸ ಸಂಗ್ರಹಣೆಯ ವಾಹನಕ್ಕೆ ತಾಲೂಕಿನಲ್ಲೇ ಮೊದಲೆಂಬಂತೆ ಸಣ್ಣೇನಹಳ್ಳಿ ಗ್ರಾಮದ ಪದ್ಮಾ ಚಾಲಕಿಯಾಗಿ ಕಾರ್ಯನಿರ್ವಹಿಸುತ್ತಿರುವುದು ಹಾಗೂ ಜಲಜೀವನ್‌ ಮಿಷನ್‌ ಯೋಜನೆಯಡಿ ಸಣ್ಣೇನಹಳ್ಳಿ ಗ್ರಾಮದ ಪ್ರತಿಮನೆಗೂ ನಲ್ಲಿಗೆ ಮೀಟರ್‌ ಅಳವಡಿಕೆಯಲ್ಲೂ ಮೊದಲ ಸ್ಥಾನದಲ್ಲಿರುವುದು ಸಣ್ಣ ಗ್ರಾಪಂ ಆಗಿದ್ದರೂ ಜಲಸಂಜೀವಿನಿ ಕೀರ್ತಿಗೆ ಭಾಜನವಾಗಿದೆ.

ಜಲ ಸಂರಕ್ಷಣೆ ಸೇರಿದಂತೆ ಎಲ್ಲಾ ಯೋಜನೆಗಳಲ್ಲೂ ಸಕ್ರಿಯವಾಗಿ ತೊಡಗಿಸಿಕೊಂಡ ಪರಿಣಾಮ ಪಂಚಾಯ್ತಿಗೆ ಪ್ರಶಸ್ತಿ ಗಿಟ್ಟಿಸಿದ್ದು, ಜನಪ್ರತಿನಿಧಿಗಳ ಸಹಕಾರ, ಅಧಿಕಾರಿಗಳ ಬದ್ಧತೆಯ ಕಾರ್ಯದಿಂದ ಅಭಿವೃದ್ಧಿ ಸಾಧ್ಯವೆಂಬುದನ್ನು ಮೋದೂರು ಗ್ರಾಮ ಪಂಚಾಯ್ತಿ ಸಾಧಿಸಿ ತೋರಿಸಿದೆ. ●ಮನು ಬಿ.ಕೆ., ತಾಪಂ ಇಒ

ಗ್ರಾಮ ಪಂಚಾಯ್ತಿ ಅಧ್ಯಕ್ಷರು, ಪ್ರತಿನಿಧಿಗಳು,ಗ್ರಾಮಸ್ಥರ ಸಹಕಾರ, ಜಿಪಂ ತಾಪಂ ಸೇರಿದಂತೆ ಎಲ್ಲಾ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಜಲಕ್ರಾಂತಿ, ಪರಿಸರ ಪೂರಕ ಕಾರ್ಯ ಕ್ರಮಗಳನ್ನು ಯಶಸ್ವಿಯಾಗಿಸಿರುವ ಹೆಮ್ಮೆ ಇದೆ. ಇದು ಪ್ರಶಸ್ತಿಗೆ ಪೂರಕವಾಗಿದೆ. ● ಕೆ.ಪ್ರಕಾಶ್‌, ಪಿಡಿಒ

-ಸಂಪತ್‌ ಕುಮಾರ್‌ ಹುಣಸೂರು