ಚಿರತೆ ದಾಳಿಗೆ 2 ಕರು, ನಾಯಿ ಬಲಿ

Team Udayavani, Dec 12, 2017, 12:53 PM IST

ಪಿರಿಯಾಪಟ್ಟಣ: ತಾಲೂಕಿನ ಕಿರಂಗೂರು ಗ್ರಾಮದಲ್ಲಿ ಚಿರತೆ ದಾಳಿಗೆ ಮೂರು ಕರು ಮತ್ತು ಒಂದು ನಾಯಿ ಬಲಿಯಾಗಿದೆ. ತಾಲೂಕಿನ ಕಿರಂಗೂರು ಗ್ರಾಮದಲ್ಲಿ ಭಾನುವಾರು ತಡರಾತ್ರಿ ಚಿರತೆ ಕೆ.ಸಿ.ಪ್ರಕಾಶ್‌ ಎಂಬುವವರ ಕೊಟ್ಟಿಗೆಗೆ ಆಗಮಿಸಿ ಕಟ್ಟಿಹಾಕಲಾಗಿದ್ದ 2 ಕರುಗಳ ಮೇಲೆ ದಾಳಿ ನಡೆಸಿದೆ. ಈ ವೇಳೆ 2 ಕರುಗಳು ಸ್ಥಳದಲ್ಲೇ ಸಾವನಪ್ಪಿವೆ.

ಅಲ್ಲದೆ ಮಲ್ಲಯ್ಯ ಎಂಬುವವರ ಮನೆಯ ಡಾಬರ್‌ ನಾಯಿಯನ್ನು ಕೊಂದು ಎಳೆದೊಯ್ದಿದೆ. ಚಾಲಕ ಗಣೇಶ್‌ ಎಂಬುವವರ ಕಾಫಿತೋಟದ ಕಡೆಯಿಂದ  ಚಿರತೆ ದಾಳಿ ಮಾಡಿದೆ ಎನ್ನಲಾಗಿದೆ. ಇದೇ ಗ್ರಾಮದಲ್ಲಿ ಶನಿವಾರ ರಾತ್ರಿ ಮಲ್ಲೇಶ್‌ ಎಂಬುವವರ ಕರು ದಾಳಿಗೆ ಒಳಗಾಗಿ ಸಾವನಪ್ಪಿತ್ತು.

ಚಿರತೆ ದಾಳಿಯಿಂದ ಗ್ರಾಮದಲ್ಲಿ ಭಯದ ವಾತಾವರಣ ಮನೆಮಾಡಿದೆ. ಇದಲ್ಲದೆ ಕಂಪಲಾಪುರ ನರ್ಸರಿ ಬಳಿಯೂ ತಡರಾತ್ರಿ ಚಿರತೆ ಕಾಣಿಸಿಕೊಂಡಿದೆ.  ಕಿರಂಗೂರು ಸುತ್ತಮುತ್ತಲು ಚಿರತೆ ಹಿಡಿಯಲು ಅರಣ್ಯ ಇಲಾಖೆ ಕ್ರಮವಹಿಸಿ ರೈತರ ತೊಂದರೆ ತಪ್ಪಿಸುವಂತೆ ಗ್ರಾಮಸ್ಥರು ಆಗ್ರಹಿಸಿದ್ದಾರೆ.