ಜಿಲ್ಲೆಯ 50 ಕೇಂದ್ರಗಳಲ್ಲಿ ಪಿಯು ಪರೀಕ್ಷೆ

Team Udayavani, Mar 2, 2018, 12:31 PM IST

ಮೈಸೂರು: ರಾಜಾದ್ಯಂತ ಗುರುವಾರದಿಂದ ಆರಂಭಗೊಂಡ ದ್ವಿತೀಯ ಪಿಯುಸಿ ಪರೀಕ್ಷೆ ಜಿಲ್ಲೆಯ 50 ಪರೀûಾ ಕೇಂದ್ರಗಳಲ್ಲಿ ವ್ಯವಸ್ಥಿತವಾಗಿ ನಡೆಯಿತು. ಮೊದಲ ದಿನದಂದು ನಡೆದ ಅರ್ಥಶಾಸ್ತ್ರ ವಿಷಯದ ಪರೀಕ್ಷೆಯನ್ನು 21,182 ವಿದ್ಯಾರ್ಥಿಗಳ ಪೈಕಿ 19,985 ವಿದ್ಯಾರ್ಥಿಗಳು ಬರೆದಿದ್ದು 1,197 ವಿದ್ಯಾರ್ಥಿಗಳು ಗೈರಾದರು.

ಇನ್ನು ಭೌತಶಾಸ್ತ್ರ ವಿಷಯದ ಪರೀಕ್ಷೆಯನ್ನು 12,404 ವಿದ್ಯಾರ್ಥಿಗಳ ಪೈಕಿ 12,105 ವಿದ್ಯಾರ್ಥಿಗಳು ಎದುರಿಸಿದ್ದು, 299 ವಿದ್ಯಾರ್ಥಿಗಳು ಗೈರಾದರು. ಪರೀಕ್ಷೆ ಸಂದರ್ಭದಲ್ಲಿ ಯಾವುದೇ ಗೊಂದಲ ಮತ್ತು ಅಕ್ರಮ ನಡೆಯದಂತೆ ಮುನ್ನೆಚ್ಚರಿಕೆಯಾಗಿ ಜಿಲ್ಲಾದ್ಯಂತ ಎಲ್ಲಾ ಪರೀûಾ ಕೇಂದ್ರಗಳಲ್ಲಿ ಕಟ್ಟುನಿಟ್ಟಿನ ಕ್ರಮವಹಿಸಲಾಗಿತ್ತು. ಮೊದಲ ದಿನದಂದು ಯಾವುದೇ ವಿದ್ಯಾರ್ಥಿ ಡಿಬಾರ್‌ ಆಗಿಲ್ಲ ಎಂದು ಪದವಿ ಪೂರ್ವ ಶಿಕ್ಷಣ ಇಲಾಖೆ ಉಪ ನಿರ್ದೇಶಕ ಡಾ.ದಯಾನಂದ ತಿಳಿಸಿದ್ದಾರೆ.