ಅಖಾಡ ಸಿದ್ಧ: ವಾರ್ಡ್‌ ವಶಕ್ಕೆ ಅಭ್ಯರ್ಥಿಗಳ ಕಾದಾಟ

ತಿ.ನರಸೀಪುರ: ಪುರಸಭೆ ಚುನಾವಣೆಯಲ್ಲಿ ಪಟ್ಟಣದ ಜನರಿಗೆ ಸ್ಪಂದಿಸುವ ಮನೋಭಾವ ಹೊಂದಿರುವ ಯೋಗ್ಯರಿಗೆ ಪಕ್ಷದ ಟಿಕೆಟ್ ನೀಡಿರುವುದರಿಂದ ಬನ್ನೂರು ಪುರಸಭೆಯಲ್ಲಿ ಈ ಬಾರಿ ಜೆಡಿಎಸ್‌ ಅಧಿಕಾರಕ್ಕೆ ಬರುವುದು ಖಚಿತ ಎಂದು ಶಾಸಕ ಎಂ.ಅಶ್ವಿ‌ನ್‌ ಕುಮಾರ್‌ ವಿಶ್ವಾಸ ವ್ಯಕ್ತಪಡಿಸಿದರು.

ತಾಲೂಕಿನ ಬನ್ನೂರು ಪುರಸಭೆ ಆವರಣದಲ್ಲಿರುವ ಸಿಡಿಎಸ್‌ ಭವನದಲ್ಲಿ ವಿವಿಧ ವಾರ್ಡ್‌ಗಳಿಗೆ ಜೆಡಿಎಸ್‌ ಅಭ್ಯರ್ಥಿಗಳ ನಾಮಪತ್ರ ಸಲ್ಲಿಕೆ ಕಾರ್ಯದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಪುರಸಭೆಯ 23 ವಾರ್ಡ್‌ಗಳಿಗೆ ಕಾರ್ಯಕರ್ತರು ಹಾಗೂ ಮುಖಂಡರ ಸಲಹೆಯಂತೆ ಗೆಲ್ಲುವ ಸಾಮರ್ಥ್ಯವಿರುವ ‌ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದೇವೆ. ಹೆಚ್ಚಿನ ವಾರ್ಡ್‌ಗಳಲ್ಲಿ ಜೆಡಿಎಸ್‌ ಸದಸ್ಯರು ಆಯ್ಕೆಗೊಳ್ಳುವುದರಿಂದ ಪುರಸಭೆ ಅಧಿಕಾರವನ್ನು ಹಿಡಿಯುತ್ತೇವೆ ಎಂದರು.

ಕಾರ್ಯಕರ್ತರ ಪಕ್ಷ:ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರು ಹಾಗೂ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ನಾಯಕತ್ವದ ಜಾತ್ಯತೀತ‌ ಜನತಾದಳ ಎಂದೆಂದಿಗೂ ಕಾರ್ಯಕರ್ತರ ಪಕ್ಷವಾಗಿದೆ. ಬನ್ನೂರು ತಾಲೂಕಾಗಿ ಮತ್ತಷ್ಟು ಅಭಿವೃದ್ಧಿ ಹೊಂದಲು ಹೋಬಳಿ ಕೇಂದ್ರದಲ್ಲಿರುವ ಪುರಸಭೆಯಲ್ಲಿ ಜೆಡಿಎಸ್‌ ಪಕ್ಷವನ್ನು ಜನರು ಅಧಿಕಾರಕ್ಕೆ ತರಬೇಕಿದೆ. ಆಕಾಂಕ್ಷಿಗಳ ಸಂಖ್ಯೆ ಹೆಚ್ಚಿರುವುದರಿಂದ ಎಲ್ಲರಿಗೂ ಸ್ಪರ್ಧೆಗೆ ಅವಕಾಶ ನೀಡಲಿಕ್ಕೆ ಸಾಧ್ಯವಾಗಿಲ್ಲ. ಹೀಗಾಗಿ ಟಿಕೆಟ್ ವಂಚಿತರ ಕ್ಷಮೆ ಕೋರುತ್ತೇನೆ. ಕಾರ್ಯಕರ್ತರು ಹಾಗೂ ಮುಖಂಡರು ಒಗ್ಗಟ್ಟಿನಿಂದ ಅಭ್ಯರ್ಥಿಗಳನ್ನು ಗೆಲ್ಲಿಸಬೇಕು ಎಂದು ಮನವಿ ಮಾಡಿದರು.

ಕಾರ್ಯತಂತ್ರ: ಪುರಸಭೆ ಚುನಾವಣೆ ನಾಮಪತ್ರ ಸಲ್ಲಿಸುವ ವೇಳೆ ಜನದಟ್ಟಣೆ ಹೆಚ್ಚಾಗುವುದನ್ನು ತಡೆಗಟ್ಟಲು ಜೆಡಿಎಸ್‌ ಅಭ್ಯರ್ಥಿಗಳನ್ನು ಮೂರು ಹಂತದಲ್ಲಿ ಕಣಕ್ಕಿಳಿಸಲಾಗುತ್ತಿದೆ. ಉಮೇದುವಾರಿಕೆಯನ್ನು ಸಲ್ಲಿಸಲಿದ್ದಾರೆ. ಹಾಗೆಯೇ ಗೆಲ್ಲಲಿಕ್ಕೂ ಕಾರ್ಯತಂತ್ರ ರೂಪಿಸಿದ್ದೇವೆ ಎಂದು ಎಂ.ಅಶ್ವಿ‌ನ್‌ಕುಮಾರ್‌ ತಿಳಿಸಿದರು.

ನಾಮಪತ್ರ ಸಲ್ಲಿಕೆ: ಬನ್ನೂರು ಪುರಸಭೆಯ 5ನೇ ವಾರ್ಡ್‌- ಕೃಷ್ಣೇಗೌಡ, 7ನೇ ವಾರ್ಡ್‌-ನಂಜುಂಡಸ್ವಾಮಿ, 8ನೇ ವಾರ್ಡ್‌- ಬಿ.ಆರ್‌.ಶ್ರೀನಿವಾಸ್‌, 9ನೇ ವಾರ್ಡ್‌-ಬಿ.ಎನ್‌.ಕುಮಾರ, 15ನೇ ವಾರ್ಡ್‌- ಧನಲಕ್ಷ್ಮೀ, 18ನೇ ವಾರ್ಡ್‌-ಕಂಬು, 19ನೇ ವಾರ್ಡ್‌- ಬಿ.ಕೆ.ಕಾಂತರಾಜು, 21ನೇ ವಾರ್ಡ್‌- ಚಲುವರಾಜು, 22ನೇ ವಾರ್ಡ್‌- ಸಿ.ಎಚ್.ಜಯಕುಮಾರ್‌ ಹಾಗೂ 23ನೇ ವಾರ್ಡ್‌ಗೆ ರಂಗಸ್ವಾಮಿ ಜೆಡಿಎಸ್‌ ಪಕ್ಷದ ಅಧಿಕೃತ ಅಭ್ಯರ್ಥಿಗಳಾಗಿ ಉಮೇದುವಾರಿಕೆ ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಪುರಸಭೆ ಮಾಜಿ ಅಧ್ಯಕ್ಷೆ ಸುಕನ್ಯಾ ಕಂಬು, ಜೆಡಿಎಸ್‌ ಜಿಲ್ಲಾ ಉಪಾಧ್ಯಕ್ಷ ಸಿ.ಆರ್‌.ರಂಗಸ್ವಾಮಿ, ಮುಖಂಡರಾದ ಲಯನ್ಸ್‌ ಬಿ.ಎಸ್‌.ಸತೀಶ್‌, ಮೀಸೆ ರಂಗಸ್ವಾಮಿ, ಹೆಗ್ಗೂರು ಸತೀಶ್‌, ಬಿ.ಎನ್‌.ಕೃಷ್ಣಪ್ಪ, ರಾಜು, ಮಧು, ಸಾವಿತ್ರಿ ಇತರರು ಹಾಜರಿದ್ದರು.

ಕೆ.ಆರ್‌.ನಗರ ಪುರಸಭೆ: 23 ವಾರ್ಡ್‌ಗೂ ದಳ, ಕೈ, ಕಮಲ ಸ್ಪರ್ಧೆ