ಕಾಡಿನ ಬೆಂಕಿ ನಂದಿಸುವವರ ನೆರವಿಗೆ ಮನವಿ

Team Udayavani, Feb 27, 2019, 6:56 AM IST

ಮೈಸೂರು: ಬಂಡೀಪುರ ಹುಲಿ ಸಂರಕ್ಷಿತ ಅರಣ್ಯದಲ್ಲಿ ಉಂಟಾಗಿರುವ ಕಾಡ್ಗಿಚ್ಚು ನಂದಿಸಲು ಶ್ರಮಿಸುತ್ತಿರುವ ಅರಣ್ಯ ಸಿಬ್ಬಂದಿ ಹಾಗೂ ಸ್ವಯಂಸೇವಕರಿಗೆ ಅಗತ್ಯ ವಸ್ತುಗಳನ್ನು ಪೂರೈಸುವ ಮೂಲಕ ಅವರ ನೆರವಿಗೆ ಧಾವಿಸುವಂತೆ ಅರಣ್ಯ ಇಲಾಖೆ ಮನವಿ ಮಾಡಿದೆ.

ಇದಕ್ಕಾಗಿ ಮೈಸೂರು ಮೃಗಾಲಯದಲ್ಲಿ ಕೌಂಟರ್‌ ತೆರೆಯಲಾಗಿದ್ದು, 5 ಲೀಟರ್‌ ನೀರಿನ ಕ್ಯಾನುಗಳು, ಸಿದ್ಧಪಡಿಸಿ ಒಬ್ಬರಿಗೆ ಒಂದರಂತೆ ಪ್ಯಾಕ್‌ ಮಾಡಲಾದ ಹೆಚ್ಚು ಖಾರವಿಲ್ಲದ ಊಟ, ಕಡಿಮೆ ತೂಕವುಳ್ಳ ಟಾರ್ಚುಗಳು, ಸುಟ್ಟ ಗಾಯಗಳಿಗೆ ಹಚ್ಚುವ ಬರ್ನಲ್‌ ಕ್ರೀಮ್‌, ಬಾಳೆಹಣ್ಣು , ಮೂಸಂಬಿ, ಸೇಬು, ಕಿತ್ತಳೆ, ದ್ರಾಕ್ಷಿ ಮೊದಲಾದ ಕಾಡಲ್ಲಿ ತೆಗೆದುಕೊಂಡು ಹೋಗಲು ಸಾಧ್ಯವಾಗುವಂತಹ ಹಣ್ಣುಗಳು, ಗ್ಲುಕೋಸ್‌ ಹಾಗೂ ಓಆರ್‌ಎಸ್‌ ಲಿಕ್ವಿಡ್‌ಗಳನ್ನು ನೀಡಬಹುದಾಗಿದೆ. 

ಈ ಸಾಮಗ್ರಿಗಳನ್ನು ಮೈಸೂರು ಮೃಗಾಲಯದಲ್ಲಿ ತೆರೆಯಲಾಗಿರುವ ಕೌಂಟರ್‌ನಲ್ಲಿ ವಲಯ ಅರಣ್ಯಾಧಿಕಾರಿ ಕೆ.ವಿ.ಸತೀಶ್‌ ಅವರಿಗೆ ತಲುಪಿಸಬಹುದು. ಹೆಚ್ಚಿನ ಮಾಹಿತಿಗೆ ಮೊ.9686668867 ಸಂಪರ್ಕಿಸಬಹುದು.