ಕಾಂಗ್ರೆಸ್‌ ಮುಕ್ತ ಕರ್ನಾಟಕಕ್ಕೆ ಚಾಲನೆ ಸಿಗಲಿ

Team Udayavani, Mar 19, 2017, 12:16 PM IST

ನಂಜನಗೂಡು: ಇಲ್ಲಿನ ಉಪ ಚುನಾವಣೆ ಬಿಜೆಪಿ ಅಭ್ಯರ್ಥಿ ವಿ ಶ್ರೀನಿವಾಸ್‌ ಪ್ರಸಾದ್‌ ಅವರ ಸ್ವಾಭಿಮಾನ ಹಾಗೂ ಕಾಂಗ್ರೆಸ್‌ನ ಸಿದ್ದು ಸರ್ಕಾರದ ದುರಹಾಂಕರದ ನಡುವಿನ ಹೋರಾಟದ ಚುನಾವಣೆ ಎಂದು ಮಾಜಿ ಸಚಿವ ಸುರೇಶಕುಮಾರ್‌ ಹೇಳಿದರು.

ಪಟ್ಟಣದಲ್ಲಿ ಕಾರ್ಯಕರ್ತರೊಂದಿಗೆ ಅನೇಕ ಬಡಾವಣೆಗಳಲ್ಲಿ ಮತ ಯಾಚಿಸಿದ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿ, ಈ ಚುನಾವಣೆ ಯಡಿಯೂರಪ್ಪ ಹಾಗೂ ಸಿದ್ದರಾಮಯ್ಯ ಮಧ್ಯೆ ಹೋರಾಟದೊಂದಿಗೆ ಬಿಜೆಪಿ ಅಭ್ಯರ್ಥಿ ಪ್ರಸಾರ್‌ ಸಾಭಿಮಾನ ಹಾಗೂ ಕಾಂಗ್ರೆಸ್‌ ಪಕ್ಷದ ದುರಹಂಕಾರದ ನಡುವಿನ ಹೋರಾಟ ಎಂದರು. 

ಉತ್ತರ ಕಾಶಿಯ ಜನ ಬಿಜೆಪಿಗೆ ಜಯ ತಂದಿದ್ದಾರೆ. ದಕ್ಷಿಣ ಕಾಶಿಯ ಜನ ತಾವೇನು ಕಡಿಮೆ ಎಂಬತೆ ಬಿಜೆಪಿಗೆ ಹುರಿಯಾಳನ್ನು ಭಾರಿ ಅಂತರದಿಂದ ಗೆಲ್ಲಿಸಿ ಮೋದಿ ಹಾಗೂ ಯಡಿಯೂರಪ್ಪನವರ ಕೈ ಬಲ ಪಡಿಸಲಿದ್ದಾರೆ ಎಂದು ಅಭಿಪ್ರಾಯಪಟ್ಟರು.

ಮಾಡಬಾರದ ಅವಮಾನ: ಯಾವ ಆಡಳಿತವೂ  ತನ್ನ ಸಹೋದ್ಯೋಗಿಗೆ ಮಾಡಬಾರದ ಅವಮಾನ ವನ್ನು ಸಿದ್ದರಾಮಯ್ಯ ಶ್ರೀನಿವಾಸ್‌ ಪ್ರಸಾದರಿಗೆ ಮಾಡಿದ್ದಾರೆ. ರಾಜಕಾರಣದ ಚುನಾವಣೆ ಸಾಕು ಎಂದಿದ್ದ ಅವರನ್ನು ಕತ್ತು ಹಿಡಿದು ಹೊರತಳ್ಳುವಂತೆ ಕಳಿಸಿದ್ದು, ಪ್ರಸಾದ್‌ರೊಂದಿಗೆ ಅವರನ್ನು ಆಯ್ಕೆ ಮಾಡಿ ಕಳಿಸಿದ ನಂಜನಗೂಡಿನ ಜನತೆಗೆ ಮುಖ್ಯಮಂತ್ರಿಗಳು ಮಾಡಿದ ಅವಮಾನವಲ್ಲದೆ ಇನ್ನೇನು ಎಂದು ಪ್ರಶ್ನಿಸಿದರು.

ಜನರ ರೋಗದ ವಾಸಿಗೆ ಈ ಸ್ಥಳದಲ್ಲಿ ಓಷಧ ತಯಾರಿಸಲಾಗುತ್ತದೆ, ಕಾಂಗ್ರೆಸ್‌ನ ಆಡಳಿತದಿಂದ ಗರ ಬಡಿದ ರಾಜ್ಯದ ಕಾಯಿಲೆಗೂ ನಂಜನಗೂಡಿ ನಿಂದಲೇ ಓಷಧಿ ಸಿಗಬೇಕೆಂಬುದು ತಮ್ಮ ಬಯಕೆ ಎಂದ ಅವರು ಕಾಂಗ್ರೆಸ್‌ ಮುಕ್ತ ಕರ್ನಾಟಕಕ್ಕೆ  ನಂಜನಗೂಡಿಂದಲೆ ಚಾಲನೆ ಸಿಗಬೇಕಾಗಿದೆ ಎಂದರು. ನಗರಸಭಾ ಉಪಾಧ್ಯಕ್ಷ ಪ್ರದೀಪ್‌ ಸದಸ್ಯರುಗಳಾದ ಗೀರಿಶ, ಆನಂದ್‌, ಮಂಗಳಾ, ಜಿಪಂ ಸದಸ್ಯೆ ಮಂಗಳಾಸೋಮಶೇಖರ, ಎನ್‌ಆರ್‌ ಕೃಷ್ಣಪ್ಪಗೌಡ್‌ ಬಸವರಾಜು, ಕಪೀಲೇಶ ಇದ್ದರು.