ಮೃಗಾಲಯದಲ್ಲಿ ರಾತ್ರಿ ಸಫಾರಿ ಆರಂಭಿಸಿ: ಸಿಎಂ

Team Udayavani, Aug 11, 2017, 12:07 PM IST

ಮೈಸೂರು: ಮೈಸೂರು ಮೃಗಾಲಯಕ್ಕೆ ಇನ್ನೂ ಹೆಚ್ಚಿನ ಜನರನ್ನು ಆಕರ್ಷಿಸುವಂತಾಗಲು ರಾತ್ರಿ ಸಫಾರಿ ಆರಂಭಿಸುವ ಬಗ್ಗೆ ಕಾರ್ಯ ಪ್ರವೃತ್ತರಾಗುವಂತೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದರು. ಶ್ರೀ ಚಾಮರಾಜೇಂದ್ರ ಮೃಗಾಲಯದ 125ನೇ ವರ್ಷದ ಸಂಭ್ರಮಾಚರಣೆ ಮತ್ತು ಮೃಗಾಲಯದ ಆವರಣದಲ್ಲಿ ಹೊಸದಾಗಿ ನಿರ್ಮಿಸಲಾಗಿರುವ ವನ್ಯರಂಗ ಮಂದಿರ ಉದ್ಘಾಟಿಸಿ ಮಾತನಾಡಿದರು.

ಅಗತ್ಯ ಮೂಲ ಸೌಕರ್ಯ ಕಲ್ಪಿಸಿ: 1892ರಲ್ಲಿ ಅಂದಿನ ಮೈಸೂರು ಮಹಾರಾಜ ಚಾಮರಾಜ ಒಡೆಯರ್‌ ಅವರು ಸ್ಥಾಪಿಸಿದ ಮೈಸೂರು ಮೃಗಾಲಯ ಎಂದೇ ಜನಜನಿತವಾಗಿರುವ ಶ್ರೀ ಚಾಮರಾಜೇಂದ್ರ ಮೃಗಾಲಯಕ್ಕೆ ಇಂದು 125ನೇ ವರ್ಷದ ಸಂಭ್ರಮದ ದಿನ. ಮೃಗಾಲಯ ಮೈಸೂರು ನಗರಕ್ಕೆ ಭೂಷಣ ಇದ್ದಂತೆ. ಇನ್ನೂ ಹೆಚ್ಚಿನ ಜನರನ್ನು ಆಕರ್ಷಿಸಬೇಕಾದರೆ, ಜಗತ್ತಿನ ಎಲ್ಲ ರೀತಿಯ ಪ್ರಾಣಿಗಳೂ ಇಲ್ಲಿರುವಂತಾಗಬೇಕು. ಜತೆಗೆ ಅಗತ್ಯ ಮೂಲ ಸೌಕರ್ಯ ಕಲ್ಪಿಸಿ ಎಂದು ಸಲಹೆ ನೀಡಿದರು.

ಸಚಿವರಿಗೆ ಸೂಚನೆ: ಇಲ್ಲಿ ದುಡಿಯುತ್ತಿರುವ ನೌಕರರಿಂದಲೇ ಮೃಗಾಲಯ ಅಭಿವೃದ್ಧಿ ಕಾಣುತ್ತಿದೆ. ಆದರೆ, ಮೃಗಾಲಯಕ್ಕೆ ಸಂಬಂಧಿಸಿದಂತೆ ಪ್ರತ್ಯೇಕ ವೃಂದ ಮತ್ತು ನೇಮಕಾತಿ ನಿಯಮಾವಳಿ ಇಲ್ಲದ್ದರಿಂದ ಇಲ್ಲಿನ ನೌಕರರನ್ನು ಸಕ್ರಮಗೊಳಿಸಲು ಹಾಗೂ ಅನುಕಂಪದ ಆಧಾರದ ಮೇಲೆ ಅವರ ಅವಲಂಬಿತರಿಗೆ ಕೆಲಸ ಕೊಡಲಾಗುತ್ತಿಲ್ಲ. ಹೀಗಾಗಿ ಮೃಗಾಲಯಕ್ಕೆ ವೃಂದ ಮತ್ತು ನೇಮಕಾತಿ ನಿಯಮಾವಳಿ ರೂಪಿಸಿ, ನಾನು ಹಣಕಾಸು ಇಲಾಖೆಗೆ ಹೇಳುತ್ತೇನೆ ಎಂದು ಅರಣ್ಯ ಸಚಿವ ರಮಾನಾಥ ರೈ ಅವರಿಗೆ ಸೂಚಿಸಿದರು. ಮೃಗಾಲಯ ವಿಸ್ತರಣೆಗೆ ರೇಸ್‌ಕೋರ್ಸ್‌ ಜಾಗ ಬಳಸಿಕೊಳ್ಳಲು, ಆ ವಿಚಾರ ನ್ಯಾಯಾಲಯದಲ್ಲಿರುವುದರಿಂದ ಸದ್ಯಕ್ಕೆ ಆಗುವುದಿಲ್ಲ ಎಂದರು.

ಕರ್ನಾಟಕ ಮೃಗಾಲಯ ಪ್ರಾಧಿಕಾರದ ಅಧ್ಯಕ್ಷೆ ಮಲ್ಲಿಗೆ ವೀರೇಶ್‌ ಮಾತನಾಡಿ, ಮೈಸೂರು ಮೃಗಾಲಯದ ವಾಹನ ನಿಲುಗಡೆ ತಾಣ ನಿರ್ಮಾಣಕ್ಕೆ 25 ಕೋಟಿ ರೂ., ಮೈಸೂರು ಮಹಾ ನಗರಪಾಲಿಕೆ ಕೈಗೆತ್ತಿಕೊಂಡು ಅಪೂರ್ಣಗೊಳಿಸುವ ಮತ್ಸಾಲಯ ಕಾಮಗಾರಿ ಪೂರ್ಣಗೊಳಿಸಲು 25 ಕೋಟಿ ರೂ ಹಾಗೂ ಕೂರ್ಗಳಿಯಲ್ಲಿರುವ ಚಾಮುಂಡೇಶ್ವರಿ ವನ್ಯಜೀವಿಗಳ ಪುನರ್ವಸತಿ ಕೇಂದ್ರದ ಅಭಿವೃದಿಗೆ 30 ಕೋಟಿ ರೂ. ಮಂಜೂರು ಮಾಡುವಂತೆ ಮನವಿ ಮಾಡಿದರು.

ಬಿಡುಗಡೆ: ಇದೇ ಸಂದರ್ಭದಲ್ಲಿ ಮೃಗಾಲಯದ 125ನೇ ವರ್ಷಾಚರಣೆ ಸಂಬಂಧ ನಿರ್ಮಿಸಿರುವ ಸಾಕ್ಷÂ ಚಿತ್ರದ ಸೀಡಿ ಹಾಗೂ ಅಂಚೆ ಲಕೋಟೆ ಮತ್ತು ಅಂಚೆಚೀಟಿಗಳನ್ನು ಮುಖ್ಯಮಂತ್ರಿ ಬಿಡುಗಡೆ ಮಾಡಿದರು. ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಎಚ್‌.ಸಿ.ಮಹದೇವಪ್ಪ, ಅರಣ್ಯ ಸಚಿವ ಬಿ.ರಮಾನಾಥ ರೈ, ಆಹಾರ ಮತ್ತು ನಾಗರಿಕ ಸರಬರಾಜು ಸಚಿವ ಯು.ಟಿ. ಖಾದರ್‌, ಶಾಸಕ ಎಂ.ಕೆ.ಸೋಮಶೇಖರ್‌, ವಿಧಾನಪರಿಷತ್‌ ಸದಸ್ಯ ಸಂದೇಶ್‌ ನಾಗರಾಜ್‌, ಜಿಪಂ ಅಧ್ಯಕ್ಷೆ ನಯಿಮಾ ಸುಲ್ತಾನ, ಅರಣ್ಯ ಇಲಾಖೆ ಹಿರಿಯ ಅಧಿಕಾರಿಗಳಾದ ಕಿಶನ್‌ಸಿಂಗ್‌ ಸುಗಾರ್‌, ಬಿ.ಪಿ.ರವಿ, ಸಿ.ರವಿಶಂಕರ್‌ ಇತರರು ಇದ್ದರು.

ನೆನಪಿನಾಳಕ್ಕಿಳಿ ಸಿಎಂ
ನಾನು ಐದೋ-ಆರನೇ ತರಗತಿಲಿದ್ದಾಗ ಒಂದ್ಸಾರಿ ಮೃಗಾಲಯಕ್ಕೆ ಬಂದಿದ್ದೆ. 1957-58ನೇ ಇಸವಿ ಇರಬಹುದು. ಆಗ ಸ್ಕೂಲಿಂದ ಕೆಆರ್‌ಎಸ್‌, ಚಾಮುಂಡಿಬೆಟ್ಟ, ಜ್ಹೂ ಗೆಲ್ಲ ಕರ್ಕೊಬಂದಿದ್ರು. ಅದು ಬುಟ್ರೆ, ಈ ಸುಶೀಲ ಕೇಶವಮೂರ್ತಿ ಜೂ ಅಥಾರಿಟಿ ಛೇರ್ಮನ್‌ ಆಗಿದ್ದಾಗ ಒಂದ್ಸಾರಿ ಕರ್ಕೊ ಬಂದಿದ್ರು. ಅದು ಬುಟ್ರೆ ಈಗ ಬಂದಿದ್ದೀನಿ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ನೆನಪಿನಾಳಕ್ಕೆ ಇಳಿದರು.

ಮೃಗಾಲಯ ಪ್ರಾಧಿಕಾರಕ್ಕೆ ರಾಜ್ಯ ವ್ಯಾಪಿ ಇದೆ. ಮೈಸೂರು ಮೃಗಾಲಯ ಚೆನ್ನಾಗಿದೆ ಅಂಥಾ ಇದನ್ನೇ ನೋಡ್ಕೊಂಡು ಕೂತ್ಕೊಬುಡ್‌ ಬೇಡಾ, ಇನ್ನೂ 8 ಮೃಗಾಲಯ ಅವಂತೆ ಅವಕ್ಕೂ ಹೋಗು, ಸದಸ್ಯರನ್ನೂ ಒಮ್ಮೆ ಅಲ್ಲಿಗೆಲ್ಲ ಟೂರ್‌ ಕರ್ಕೊಂಡೋಗು ಎಂದು ಮೃಗಾಲಯ ಪ್ರಾಧಿಕಾರದ ಅಧ್ಯಕ್ಷೆ ಮಲ್ಲಿಗೆ ವೀರೇಶ್‌ಗೆ ಸಿಎಂ ಸಲಹೆ ನೀಡಿದರು.

ಆಗ ಮೃಗಾಲಯ ಪ್ರಾಧಿಕಾರದ ಸದಸ್ಯರೊಬ್ಬರು ಫಾರಿನ್‌ ಟೂರ್‌ ಕಳಿಸ್ಕೊಡಿ ಸಾರ್‌ ಎಂದು ಮುಖ್ಯಮಂತ್ರಿಯವರಿಗೆ ಬೇಡಿಕೆ ಇಟ್ಟರು. ಇಲ್ಲಿ ಜ್ಹೂ ನೋಡ್ಕೊ ಬಾ ಅಂದ್ರೆ, ಫಾರಿನ್‌ ಟೂರ್‌ ಕೇಳ್ತೀಯಾ, ನಾನೇ ಫಾರಿನ್‌ ಟೂರ್‌ ಹೋಗಲ್ಲ, ನೀನು ಹೋಗ್ಬೇಕಾ ಸುಮ್ನೆ ಕೂತ್ಕೊ ಎಂದು ತಮ್ಮ ಎಂದಿನ ಶೈಲಿಯಲ್ಲಿ ಗದರಿದರು.