ಪತ್ನಿಗೆ ಸಾವಿನ ಸುದ್ದಿ ತಿಳಿಸಲು ಹೆಣಗಿದ ಸಹಪಾಠಿಗಳು

Team Udayavani, Feb 24, 2017, 12:14 PM IST

ಮೈಸೂರು: ಮೈಸೂರು- ಬೆಂಗಳೂರು ಹೆದ್ದಾರಿಯ ರಾಮೋಹಳ್ಳಿ ಬಳಿ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ದುರ್ಮರಣಕ್ಕೀಡಾದ ಮೈಸೂರು ಲೋಕಾಯುಕ್ತ ಎಸ್‌ಪಿ ಎಸ್‌.ರವಿಕುಮಾರ್‌ ಅವರ ಪತ್ನಿ ಅನಿತಾ ಫೆ.14ರಂದು ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದು, ಬಾಣಂತಿಯಾಗಿರುವ ಅವರನ್ನು ಬುಧವಾರ ರಾತ್ರಿಯೇ ಬೆಂಗಳೂರಿಗೆ ಕರೆದೊಯ್ಯಲಾಯಿತು.

ಬಾಣಂತನದ ಆರೈಕೆಯಲ್ಲಿರುವ ಅನಿತಾ ಅವರಿಗೆ ಪತಿಯ ಸಾವಿನ ಆಘಾತಕಾರಿ ಸುದ್ದಿ ತಿಳಿಸುವುದು ಹೇಗೆ ಎಂದು ರವಿಕುಮಾರ್‌ ಅವರ ಸಹಪಾಠಿಗಳು ಸಾಕಷ್ಟು ಹೆಣಗಾಡಿದರಾದರು ಕಡೆಗೂ ವಿಷಯ ತಿಳಿಸಲೇಬೇಕಾಯಿತು. ಇದಕ್ಕಾಗಿಯೇ ಮನೆಯ ಟಿವಿಯನ್ನೂ ಬಂದ್‌ ಮಾಡಲಾಗಿತ್ತು.

ಮಾಧ್ಯಮದವರು ಮನೆಯ ಬಳಿ ಬಂದರೆ ಅನಿತಾ ಅವರಿಗೆ ವಿಷಯ ಗೊತ್ತಾಗಲಿದೆ ಎಂಬ ಕಾರಣಕ್ಕೆ ರವಿಕುಮಾರ್‌ ಅವರ ಬಗೆಗೆ ಹೆಚ್ಚಿನ ಮಾಹಿತಿ ಬಯಸಿ ದೂರವಾಣಿ ಕರೆ ಮಾಡಿದ ಪತ್ರಕರ್ತರಿಗೆಲ್ಲ ರವಿಕುಮಾರ್‌ ಅವರ ಸಹಪಾಠಿಯಾಗಿದ್ದ ನಗರದ ವಿಶೇಷ ಪೊಲೀಸ್‌ ದಳದ ಪುಟ್ಟಣ್ಣ, ಬಿಕ್ಕಿ ಬಿಕ್ಕಿ ಅಳುತ್ತಲೇ ದಯವಿಟ್ಟು ಮನೆಯ ಹತ್ತಿರ ಬರಬೇಡಿ…. ಎಂದು ಮನವಿ ಮಾಡಿದ್ದರು.