ಬೆಳಗ್ಗೆ ತಿಂಡಿ ತಿನ್ನದೇ ಬಂದರೂ ಬಸ್‌ ಸಿಗಲ್ಲ

Team Udayavani, Jan 14, 2019, 7:00 AM IST

ಎಚ್‌.ಡಿ.ಕೋಟೆ: ಪಟ್ಟಣದಲ್ಲಿ ಕೆಎಸ್‌ಆರ್‌ಟಿಸಿ ಬಸ್‌ ಘಟಕವಿದ್ದರೂ ಎಚ್‌.ಡಿ.ಕೋಟೆ ಪಟ್ಟಣದಿಂದ ಮೈಸೂರು ನಗರಕ್ಕೆ ನಿಗದಿತ ಸಮಯಕ್ಕೆ ಬಸ್‌ಗಳ ಸಂಚಾರ ಇಲ್ಲದ ಪರಿಣಾಮ ಉನ್ನತ ವ್ಯಾಸಂಗಕ್ಕೆ ತೆರಳುವ ಕಾಲೇಜು ವಿದ್ಯಾರ್ಥಿಗಳು ಪ್ರತಿದಿನ ಪರದಾಡುವಂತಾಗಿದೆ.

ಎಚ್‌.ಡಿ.ಕೋಟೆ ಪಟ್ಟಣ ಸೇರಿದಂತೆ ತಾಲೂಕಿನ ವಿವಿಧ ಗ್ರಾಮಗಳಿಂದ ನೂರಾರು ವಿದ್ಯಾರ್ಥಿಗಳು ಎಂಎ, ಎಂಸಿಎ, ಪಿಎಚ್‌ಡಿ ಮತ್ತು ಎಂಜಿನಿಯರಿಂಗ್‌ ಮತ್ತಿತರ ಪದವಿಗಾಗಿ ಮೈಸೂರು ನಗರದ ಕಾಲೇಜುಗಳಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. 

ಅವ್ಯವಸ್ಥೆ: ಸಮರ್ಪಕ ಬಸ್‌ ಸಂಚಾರ ವ್ಯವಸ್ಥೆ ಇಲ್ಲದಿರುವುದರಿಂದ ತಾಲೂಕು ಆಡಳಿತ, ಕೆಎಸ್‌ಆರ್‌ಟಿಸಿ ಅಧಿಕಾರಿಗಳು ಹಾಗೂ ಡಿಪೋ ವ್ಯವಸ್ಥಾಪಕರಿಗೆ ಹಿಡಿಶಾಪ ಹಾಕುತ್ತಾ ಸಂಚರಿಸುತ್ತಿರುವುದು ಸಾಮಾನ್ಯವಾಗಿದೆ.

ಸಕಾಲಕ್ಕೆ ಬಸ್‌ ಬರಲ್ಲ: ಪಟ್ಟಣ ಸೇರಿದಂತೆ ತಾಲೂಕಿನ ವಿವಿಧ ಭಾಗಗಳ ವಿದ್ಯಾರ್ಥಿಗಳು ಮೈಸೂರು ನಗರದಲ್ಲಿರುವ ಪ್ರತಿಷ್ಠಿತ ಕಾಲೇಜುಗಳಲ್ಲಿ ಉನ್ನತ ವ್ಯಾಸಂಗ ಮಾಡುತ್ತಿದ್ದಾರೆ. ಹೀಗಾಗಿ ಪಟ್ಟಣದ ಕೆಎಸ್‌ಆರ್‌ಟಿಸಿ ಬಸ್‌ಗಳನ್ನೇ ಅವಲಂಬಿಸಿದ್ದು, ತಿಂಡಿಯನ್ನು ತಿನ್ನದೇ ಬೆಳಗ್ಗೆ 6 ಗಂಟೆಗೆ ಬಸ್‌ ನಿಲ್ದಾಣಕ್ಕೆ ಬರುತ್ತಾರೆ. ಅದರೆ, ನಿಗದಿತ ಸಮಯಕ್ಕೆ ಬಸ್‌ ಮಾತ್ರ ಬರುವುದಿಲ್ಲ. ಇದರಿಂದಾಗಿ ಕಾಲೇಜಿಗೆ ಸರಿಯಾದ ಸಮಯಕ್ಕೆ ತಲುಪಲು ಆಗದೇ, ತರಗತಿಗಳಲ್ಲಿ ಪಾಠಗಳನ್ನು ಕೇಳಲಾಗುತ್ತಿಲ್ಲ ಎಂದು ವಿದ್ಯಾರ್ಥಿಗಳು ಅವಲತ್ತುಕೊಂಡಿದ್ದಾರೆ.

ಪರೀಕ್ಷೆ ವೇಳೆಯೂ ಪರದಾಟ: ಎಚ್‌.ಟಿ.ಕೋಟೆ- ಮೈಸೂರು 53 ಕಿ.ಮೀ. ಅಂತರವಿದೆ. ಸಮರ್ಪಕ ಬಸ್‌ ಸಂಚಾರವಿಲ್ಲ. ಇದೀಗ ಪರೀಕ್ಷೆ ಸಮಯವಾಗಿರುವುದರಿಂದ ವಿದ್ಯಾರ್ಥಿಗಳು ಬೆಳ್ಳಂ ಬೆಳಗ್ಗೆಯೇ ಪಟ್ಟಣದ ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣಕ್ಕೆ ಬಂದರೂ ನಿಗದಿತ ಸಮಯಕ್ಕೆ ಬಸ್‌ಗಳು ಬರುವುದಿಲ್ಲ. ಹಲವಾರು ಮಂದಿ ಬಸ್‌ಪಾಸ್‌ ಹೊಂದಿದ್ದರೂ ಖಾಸಗಿ ವಾಹನಗಳಲ್ಲಿ ಸಂಚರಿಸುವಂತಾಗಿದೆ. ಬಹುತೇಕ ವಿದ್ಯಾರ್ಥಿಗಳು ಸರ್ಕಾರಿ ಬಸ್‌ಗಳನ್ನೇ ಅವಲಂಬಿಸಿದ್ದು, ಗಂಟೆಗಟ್ಟಲೇ ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಬೇಜವಾಬ್ದಾರಿ: ಪಟ್ಟಣದಲ್ಲಿ ಕೆಎಸ್‌ಆರ್‌ಟಿಸಿ ಬಸ್‌ ಘಟಕವಿದ್ದು, 78 ಮಾರ್ಗಗಳನ್ನು ಹೊಂದಿದೆ. ಸುಮಾರು 180ಕ್ಕೂ ಹೆಚ್ಚು ಬಸ್‌ಗಳನ್ನು ಘಟಕ ಒಳಗೊಂಡಿದೆ. ಪ್ರತಿಯೊಂದು ಮಾರ್ಗಕ್ಕೂ ಸಮಯ ನಿಗಪಡಿಸಲಾಗಿದೆ. ಅದರೆ, ಇಲ್ಲಿನ ಡಿಪೋ ವ್ಯವಸ್ಥಾಪಕ ಹಾಗೂ ನಿಲ್ದಾಣ ನಿಯಂತ್ರಣ ಅಧಿಕಾರಿಗಳ ಬೇಜವಾಬ್ದಾರಿಯಿಂದಾಗಿ ನಿಯೋಜಿತ ಬಸ್‌ಗಳು ನಿಗತ ಸಮಯಕ್ಕೆ ನಿಲ್ದಾಣಕ್ಕೆ ಬರುತ್ತಿಲ್ಲ ಎಂದು ಶಾಂತಿಪುರ ಗ್ರಾಮದ ಟಿ.ಜಯರಾಮ್‌, ಅಂತರಸಂತೆ ಆರ್‌.ಸುರೇಶ್‌ ದೂರಿದ್ದಾರೆ.

ಇನ್ನಾದರೂ ಕ್ಷೇತ್ರದ ಶಾಸಕ ಅನಿಲ್‌ ಚಿಕ್ಕಮಾದು ಹಾಗೂ  ಡಿಪೋ ವ್ಯವಸ್ಥಾಪಕ ಮತ್ತು ನಿಲ್ದಾಣ ನಿಯಂತ್ರಣಾಧಿಕಾರಿಗಳು ಸೂಕ್ತ ಕ್ರಮಕೈಗೊಂಡು ಮೈಸೂರಿನ ಕಾಲೇಜುಗಳಿಗೆ ತೆರಳುವ ವಿದ್ಯಾರ್ಥಿಗಳಿಗೆ ಸಕಾಲದಲ್ಲಿ ನಿಗತ ಸಮಯಕ್ಕೆ ಬಸ್‌ ಸೌಲಭ್ಯ ಕಲ್ಪಿಸಬೇಕಾಗಿದೆ.

ಎಚ್‌.ಡಿ.ಕೋಟೆ ಬಸ್‌ ನಿಲ್ದಾಣದಲ್ಲಿ ಒಂದೆರಡು ಬಾರಿ ಬಸ್‌ಗಳ ವ್ಯತ್ಯಯ ಆಗುತ್ತಿದೆ. ಈಗ ಎಲ್ಲಾ ಸರಿಯಾಗಿದೆ. ಮುಂದಿನ ದಿನಗಳಲ್ಲಿ ಬೆಳಗಿನ ಸಮಯ ಮೈಸೂರು  ನಗರಕ್ಕೆ ತೆರಳುವ ವಿದ್ಯಾರ್ಥಿಗಳಿಗೆ ತೊಂದರೆಯಾಗದಂತೆ ಕ್ರಮವಹಿಸಲು ನಿಲ್ದಾಣದ ಸಂಚಾರ ನಿಯಂತ್ರಕರಿಗೆ ಸೂಚಿಸುತ್ತೇನೆ.
-ತ್ಯಾಗರಾಜ್‌, ಡಿಪೋ ವ್ಯವಸ್ಥಾಪಕ 

* ಬಿ.ನಿಂಗಣ್ಣಕೋಟೆ