ಮತ್ತೆ ಅಧಿಕಾರಕ್ಕೆ ಬರುತ್ತೇವೆ

Team Udayavani, May 8, 2018, 3:00 PM IST

ಮೈಸೂರು: ನನಗೆ ಚುನಾವಣೆಯ ಯಾವ ಭಯವೂ ಇಲ್ಲ, ಅಂಜಿಕೆಯೂ ಇಲ್ಲ. ಸೋಲುವವರು ಭಯ ಪಡುತ್ತಾರೆ. ನನಗ್ಯಾಕೆ ಭಯ. ಸ್ಪಷ್ಟ ಬಹುಮತದೊಂದಿಗೆ ಮತ್ತೆ ನಾವೇ ಅಧಿಕಾರಕ್ಕೆ ಬರುತ್ತೇವೆ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ವಿಶ್ವಾಸ ವ್ಯಕ್ತಪಡಿಸಿದರು.

ಚುನಾವಣೆ ಪ್ರಚಾರ ಸಲುವಾಗಿ ಮೈಸೂರಿಗೆ ಆಗಮಿಸಿ ಟಿ.ಕೆ.ಲೇಔಟ್‌ನ ತಮ್ಮ ನಿವಾಸದಲ್ಲಿ ವಾಸ್ತವ್ಯ ಹೂಡಿದ್ದ ಅವರು, ಸೋಮವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ಚುನಾವಣೆಯೆಂಬ ರಣರಂಗದಲ್ಲಿ ಸೇನಾಧಿಪತಿ ಮುನ್ನುಗ್ಗಿದರೆ ತಾನೇ ಸೈನಿಕರು ಹಿಂದೆ ಬರುತ್ತಾರೆ ಎಂದು ಪ್ರಶ್ನಿಸಿದ ಅವರು ಸೇನಾಧಿಪತಿಯಾಗಿ ಮುನ್ನುಗ್ಗುತ್ತಿದ್ದೇನೆ ಎಂದರು.

ಪ್ರಧಾನಿ ನರೇಂದ್ರ ಮೋದಿ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ರಾಜ್ಯಕ್ಕೆ ಬಂದ ನಂತರ ಕಾಂಗ್ರೆಸ್‌ ಪರವಾದ ಅಲೆ ಹೆಚ್ಚಿದೆ. ರಾಜ್ಯದಲ್ಲಿ ಕಾಂಗ್ರೆಸ್‌ ಪೂರ್ಣ ಬಹುಮತದೊಂದಿಗೆ ಮತ್ತೆ ಅಧಿಕಾರಕ್ಕೆ ಬರಲಿದೆ ಎಂದು ಹೇಳಿದರು.

ಕಿಂಗ್‌ ಮೇಕರ್‌ ಆದ್ರಾ?: ಜೆಡಿಎಸ್‌ ಪ್ರಣಾಳಿಕೆ ಒಪ್ಪುವ ಪಕ್ಷದ ಜೊತೆಗೆ ಹೋಗುತ್ತೇವೆ ಎಂಬ ಎಚ್‌.ಡಿ.ಕುಮಾರಸ್ವಾಮಿ ಹೇಳಿಕೆಗೆ ಪ್ರತಿಕ್ರಿಯಿಸಿದ ಸಿಎಂ, ಈವರೆಗೆ ನಾನೇ ಕಿಂಗ್‌ ಅನ್ನುತ್ತಿದ್ದವರು, ಈಗ ಕಿಂಗ್‌ ಅಲ್ವಾ? ಕಿಂಗ್‌ ಮೇಕರ್‌ ಆದ್ರಾ ಎಂದು ಲೇವಡಿ ಮಾಡಿದರು.

ನಟ ಸುದೀಪ್‌, ಸಿಸಿಎಲ್‌ ಕ್ರಿಕೆಟ್‌ ಪಂದ್ಯಾವಳಿ ಉದ್ಘಾಟನೆಗೆ ಆಹ್ವಾನಿಸಲು ಬಂದಿದ್ದಾಗ ಮೇ 9ರಂದು ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ತಮ್ಮ ಪರ ಪ್ರಚಾರಕ್ಕೆ ಬರುವುದಾಗಿ ಈ ಹಿಂದೆ ಹೇಳಿದ್ದರು. ಅದಾದ ನಂತರ ಮತ್ತೆ ನಾನು ಅವರನ್ನು ಸಂಪರ್ಕಿಸಿಲ್ಲ. 9ಕ್ಕೆ ಬರಬಹುದು ಅಂದುಕೊಂಡಿದ್ದೇನೆ. ಸ್ವಯಂಪ್ರೇರಿತರಾಗಿ ಬಂದು ಪ್ರಚಾರ ಮಾಡಿದರೆ ಸಂತೋಷ ಎಂದು ಹೇಳಿದರು.

ಮಂಗಳವಾರ ಮಂಡ್ಯ ಜಿಲ್ಲೆ ಪ್ರವಾಸ ಕೈಗೊಳ್ಳಲಿದ್ದು, ಮೇಲುಕೋಟೆ ಕ್ಷೇತ್ರದಲ್ಲಿ ಸ್ವರಾಜ್‌ ಇಂಡಿಯಾ ಪಕ್ಷದ ಅಭ್ಯರ್ಥಿ ದರ್ಶನ್‌ ಪುಟ್ಟಣ್ಣಯ್ಯ ಪರ ತಾವು ಪ್ರಚಾರ ಮಾಡುವುದಾಗಿ ತಿಳಿಸಿದರು.

ವಾಚ್‌ ಕಟ್ಟಿಕೊಳ್ಳುತ್ತಿದ್ದೇನಾ?: ಉದ್ಯಮಿಯಿಂದ ದುಬಾರಿ ವಾಚ್‌ ಉಡುಗೊರೆ ಪಡೆದಿದ್ದಾರೆ ಎಂಬ ಬಿಜೆಪಿ ಆರೋಪಕ್ಕೆ ಸಿಡಿಮಿಡಿಗೊಂಡ ಸಿಎಂ, ನಾನು ವಾಚ್‌ ಕಟ್ಟಿರುವುದು ನಿಜ. ಆದರೆ, ಬಿಜೆಪಿಯವರು ಬಿಡುಗಡೆ ಮಾಡಿರುವ ಫೋಟೋದಲ್ಲಿ ನಾನೇನು ವಾಚ್‌ ಕಟ್ಟಿಸಿಕೊಳ್ಳುತ್ತಿದ್ದೇನಾ? ಪದೇ ಪದೆ ಯಾಕೆ ವಾಚ್‌ ವಿಚಾರ ಎತ್ತುತ್ತೀರಾ?

ಆ ವಾಚ್‌ ಯಾರು ಕೊಟ್ಟರು ಎಂಬುದರ ಬಗ್ಗೆ ಈಗಾಗಲೇ ಚರ್ಚೆ ಆಗಿ, ವಾಚ್‌ ವಾಪಸ್‌ ಕೊಟ್ಟಾಗಿದೆ. ಆದರೂ ಈಗಲೂ ಅದೇ ವಿಷಯ ಮಾತನಾಡುತ್ತಾರೆಂದರೆ ಅವರಿಗೆ ಮಾತನಾಡಲು ಬೇರೆ ವಿಷಯವಿಲ್ಲ. ನೀವು ನೂರು ಬಾರಿ ಸುಳ್ಳು ಆರೋಪ ಮಾಡಿದರೂ ನಾನು ಕೊಡುವ ಉತ್ತರ ಒಂದೇ ಎಂದು ಬಿಜೆಪಿ ವಿರುದ್ಧ ಹರಿಹಾಯ್ದರು.

ವಾಚ್‌ ಬಗ್ಗೆ ಮಾತನಾಡುವವರು ಮೋದಿ ಸೂಟ್‌ ಬಗ್ಗೆಯೂ ಮಾತನಾಡಲಿ? ಆ ಸೂಟ್‌ ಎಲ್ಲಿಂದ ಬಂತು? ಹೇಗೆ ಬಂತು? ತೆರಿಗೆ ಪಾವತಿಸಿದ್ದಾರಾ? ಎಂಬುದನ್ನು ಹೇಳಲಿ ಎಂದು ಸವಾಲು ಹಾಕಿದರು. ಪ್ರಧಾನಿ ಮೋದಿ ಈ ಮಟ್ಟಕ್ಕೆ ಇಳಿದಿದ್ದು ಬೇಸರ ತರಿಸಿದೆ.

ಆದರೂ ಪದೇ ಪದೆ ನನ್ನ ಹೆಸರು ಹೇಳುತ್ತಿರುವುದಕ್ಕೆ ನನಗೆ ಸಂತೋಷ ಆಗಿದೆ. ಮೋದಿಗೆ ನನ್ನನ್ನು ಕಂಡರೆ ಭಯ ಇದೆ. ಅದಕ್ಕೆ ಅವರು ಯಾವಾಗಲೂ ನನ್ನನ್ನೇ ಗುರಿಯಾಗಿಸಿಕೊಂಡಿದ್ದಾರೆ. ಅವರಿಗೆ ಚುನಾವಣೆಯಲ್ಲಿ ಸೋಲಿನ ಭೀತಿ ಎದುರಾಗಿದೆ. ಅದಕ್ಕೆ ಈ ರೀತಿ ಮಾತನಾಡುತ್ತಿದ್ದಾರೆ ಎಂದು ಹರಿಹಾಯ್ದರು.