ಸರ್ಕಾರ ಭದ್ರಾ ಯೋಜನೆ ನಿರ್ಲಕ್ಷಿಸಿದ್ರೆ ಪ್ರತಿಭಟನೆಗೂ ಸಿದ್ಧ

Team Udayavani, Jul 1, 2019, 3:21 PM IST

ನಾಯಕನಹಟ್ಟಿ: ತಿಪ್ಪೇರುದ್ರಸ್ವಾಮಿ ದೇವಾಲಯದ ವತಿಯಿಂದ ಸಂಸದ ಎ. ನಾರಾಯಣಸ್ವಾಮಿ ಅವರನ್ನು ಅಭಿನಂದಿಸಲಾಯಿತು.

ನಾಯಕನಹಟ್ಟಿ: ಭದ್ರಾ ಮೇಲ್ದಂಡೆ ಯೋಜನೆಯನ್ನು ಪೂರ್ಣಗೊಳಿಸಲು ಮೊದಲ ಆದ್ಯೆತ ನೀಡುತ್ತೇನೆ ಎಂದು ಸಂಸದ ಎ. ನಾರಾಯಣಸ್ವಾಮಿ ಹೇಳಿದರು.

ಭಾನುವಾರ ಇಲ್ಲಿನ ತಿಪ್ಪೇರುದ್ರಸ್ವಾಮಿ ದೇವಾಲಯಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸಿದ ನಂತರ ಸುದ್ದಿಗಾರರೊಂದಿಗೆ ಅವರು ಮಾತನಾಡಿದರು.

ಜಿಲ್ಲೆಯ ಜನರ ಜೀವನಾಡಿಯಾಗಿರುವ ಭದ್ರಾ ಮೇಲ್ದಂಡೆ ಯೋಜನೆಯನ್ನು ಪೂರ್ಣಗೊಳಿಸಲು ಬದ್ಧನಾಗಿದ್ದೇನೆ. ಈಗಿನ ಯೋಜನೆಯನ್ನು ಮೊದಲ ಹಂತದಲ್ಲಿ ಪರಿಶೀಲಿಸಿದ್ದೇನೆ. ಇದರಲ್ಲಿರುವ ಲೋಪಗಳನ್ನು ಗುರುತಿಸಿದ್ದು, ಈಗ ಜಾರಿಯಾಗಿರುವ ಭದ್ರಾ ಮೇಲ್ದಂಡೆ ಯೋಜನೆಯಲ್ಲಿ ಹನಿ ನೀರಾವರಿ ಹಾಗೂ ಕೆರೆಗೆ ನೀರು ತುಂಬಿಸುವ ನೀರಿನ ಪೈಪ್‌ಲೈನ್‌ ಎರಡನ್ನೂ ಒಂದೇ ಪೈಪ್‌ನಲ್ಲಿ ತರಲಾಗಿದೆ. ಇದರಿಂದ ಸಮಸ್ಯೆಗಳು ಉಂಟಾಗುತ್ತಿವೆ. ಇಲ್ಲಿನ ಪ್ರದೇಶಕ್ಕೆ ಹನಿ ನೀರಾವರಿ ಸೂಕ್ತವಲ್ಲ. ಯೋಜನೆಯಲ್ಲಿನ ಲೋಪವನ್ನು ನೀರಾವರಿ ಇಲಾಖೆಯ ಹಿರಿಯ ಇಂಜಿನಿಯರ್‌ಗಳ ಹಾಗೂ ಜಲಸಂಪನ್ಮೂಲ ಇಲಾಖೆ ಸಚಿವ ಡಿ.ಕೆ. ಶಿವಕುಮಾರ್‌ ಅವರ ಗಮನಕ್ಕೆ ತಂದಿದ್ದೇನೆ. ಇಲ್ಲಿನ ಪ್ರದೇಶದ ಜನರಿಗೆ ಕೆರೆಗಳಿಗೆ ನೀರು ತುಂಬಿಸುವ ಕಾರ್ಯಕ್ಕೆ ಹೆಚ್ಚಿನ ಗಮನ ಹರಿಸಲಾಗುವುದು. ಸಂಸತ್‌ ಅಧಿವೇಶನ ಪೂರ್ಣಗೊಂಡ ನಂತರ ಇದರ ಬಗ್ಗೆ ಅಧಿಕಾರಿಗಳು ಸ್ಪಷ್ಟ ತೀರ್ಮಾನಕ್ಕೆ ಬರುವಂತೆ ತಿಳಿಸಿದ್ದೇನೆ. ರಾಜ್ಯ ಸರ್ಕಾರ ಭದ್ರಾ ಮೇಲ್ದಂಡೆ ಯೋಜನೆಯನ್ನು ನಿರ್ಲಕ್ಷಿಸಿದರೆ ಪ್ರತಿಭಟನೆಗೆ ಹಿಂಜರಿಯುವುದಿಲ್ಲ. ಅಗತ್ಯ ಎನ್ನಿಸಿದರೆ ವಿಧಾನಸೌಧದ ಎದುರು ಬೃಹತ್‌ ಪ್ರತಿಭಟನೆ ನಡೆಸಲೂ ಸಿದ್ಧ ಎಂದು ಘೋಷಿಸಿದರು.

ದೊಡ್ಡ ಪ್ರಮಾಣದ ಹಣವನ್ನು ಹನಿ ನೀರಾವರಿಗೆ ನೀಡುವುದು ಸರಿಯಲ್ಲ. ಜತೆಗೆ ಹನಿ ನೀರಾವರಿ ತೋಟಗಾರಿಕಾ ಬೆಳೆಗಳಿಗೆ ಸೂಕ್ತವಾಗಿದೆ. ಇಲ್ಲಿನ ಜನರು ಪ್ರಮುಖವಾಗಿ ಶೇಂಗಾವನ್ನು ಅವಲಂಬಿಸಿದ್ದಾರೆ. ಹೀಗಾಗಿ ಇಲ್ಲಿನ ಜನರ ಆಶೋತ್ತರಕ್ಕೆ ತಕ್ಕಂತೆ ಯೋಜನೆ ರೂಪುಗೊಳ್ಳಬೇಕಾಗಿದೆ. ಕೆರೆಗಳಿಗೆ ನೀರು ತುಂಬಿಸಿದರೆ ಸುತ್ತಲಿನ ಪ್ರದೇಶಗಳಲ್ಲಿ ಅಂತರ್ಜಲ ವೃದ್ಧಿಯಾಗುತ್ತದೆ ಎಂದು ಅಭಿಪ್ರಾಯಪಟ್ಟರು.

ನಾನು ಪಕ್ಷದ ಕಾರ್ಯಕರ್ತರ ಸೇವಕನಾಗಿರುತ್ತೇನೆ. ಆದರೆ ಕೆಲಸ ಮಾಡದೆ ಜನಪ್ರತಿನಿಧಿಗಳನ್ನು ದಿಕ್ಕು ತಪ್ಪಿಸುವ ಹಾಗೂ ಸೋಮಾರಿ ಅಧಿಕಾರಿಗಳಿಗೆ ಬಿಸಿ ಮುಟ್ಟಿಸುತ್ತೇನೆ. ಕುಡಿಯುವ ನೀರಿನ ಹಾಗೂ ಕೃಷಿಗೆ ಮೊದಲ ಆದ್ಯತೆ ನೀಡುತ್ತೇನೆ. ಜಿಲ್ಲೆಯಲ್ಲಿನ 367 ಕೆರೆಗಳಿಗೆ ನೀರೊದಗಿಸುವ ಪ್ರಯತ್ನ ನಡೆಸಿದ್ದೇನೆ. ಆಲಮಟ್ಟಿ-ಬಳ್ಳಾರಿ-ಚಿತ್ರದುರ್ಗ ನೇರ ರೈಲ್ವೆ ಮಾರ್ಗ ಯೋಜನೆಯನ್ನು ಮುಂದಿನ ಬಾರಿಯ ಬಜೆಟ್‌ಗೆ ಸೇರಿಸಲು ಪ್ರಯತ್ನ ನಡೆಸುತ್ತೇನೆ. ಈ ಯೋಜನೆಗೆ ಸರ್ವೆ ಕಾರ್ಯ ನಡೆದಿದೆ. ಈ ರೈಲ್ವೆ ಮಾರ್ಗದಿಂದ ವಾಣಿಜ್ಯ ವ್ಯವಹಾರಗಳು ಹೆಚ್ಚಲಿವೆ. ಚೆನ್ನೈ-ಮುಂಬೈ ಕಾರಿಡಾರ್‌ ಜತೆಗೆ ಸಂಪರ್ಕ ಕಲ್ಪಿಸಿದರೆ ವ್ಯವಹಾರಗಳ ವೇಗ ಹೆಚ್ಚಲಿದೆ ಎಂದರು.

ಎ. ನಾರಾಯಣಸ್ವಾಮಿ ಗೆಲುವಿಗಾಗಿ ಅಭಿಮಾನಿ ಶಿವದತ್ತ 1001 ತೆಂಗಿನಕಾಯಿಗಳನ್ನು ಒಡೆಯುವ ಹರಕೆ ಹೊತ್ತಿದ್ದರು. ಆದರೆ ಎಲ್ಲ ಕಾಯಿಗಳನ್ನು ಒಡೆದರೆ ಹಾಳಾಗಿ ಚೆಲ್ಲಾಡುತ್ತವೆ ಎನ್ನುವ ಉದ್ದೇಶದಿಂದ ದೇವಾಲಯದ ಮುಂಭಾಗದಲ್ಲಿ ಐದು ಈಡುಗಾಯಿ ಒಡೆಯಲಾಯಿತು. ಉಳಿದ ತೆಂಗಿನಕಾಯಿಗಳನ್ನು ದೇವಾಲಯದ ದಾಸೋಹಕ್ಕೆ ಅರ್ಪಿಸಲಾಯಿತು. ಜಿಪಂ ಸದಸ್ಯರಾದ ಓಬಳೇಶ್‌, ಓ. ಮಂಜುನಾಥ್‌, ಬಿಜೆಪಿ ಮಂಡಲಾಧ್ಯಕ್ಷ ಎಂ.ವೈಟಿ. ಸ್ವಾಮಿ, ಪ್ರಧಾನ ಕಾರ್ಯದರ್ಶಿ ಪಿ. ಶಿವಣ್ಣ, ಸಿ.ಬಿ. ಮೋಹನ್‌, ತಿಪ್ಪೇರುದ್ರಸ್ವಾಮಿ ದೇವಾಲಯ ಸಮಿತಿ ಅಧ್ಯಕ್ಷ ಜೆ.ಪಿ. ರವಿಶಂಕರ್‌, ಪಪಂ ಸದಸ್ಯ ಮಹಾಂತಣ್ಣ, ಪರಮೇಶ್ವರಪ್ಪ, ಪಿ.ಬಿ. ತಿಪ್ಪೇಸ್ವಾಮಿ. ತಳಕು ನಾಗರಾಜ್‌ ಮತ್ತಿತರರು ಇದ್ದರು.