ಕೋವಿಡ್ ಆರ್ಭಟ ಮುಂದುವರಿಕೆ

Team Udayavani, Jul 19, 2020, 1:18 PM IST

ರಾಯಚೂರು: ಜಿಲ್ಲೆಯಲ್ಲಿ ಶನಿವಾರ 16 ಪಾಸಿಟಿವ್‌ ಪ್ರಕರಣಗಳು ದೃಢಪಟ್ಟಿವೆ. ಆ ಮೂಲಕ ಒಟ್ಟು ಸೋಂಕಿತರ ಸಂಖ್ಯೆ 964ಕ್ಕೆ ತಲುಪಿದೆ.

ರಾಯಚೂರು ಮತ್ತು ಸಿಂಧನೂರಿನಲ್ಲಿ ವೈರಸ್‌ ಹರಡುವಿಕೆ ಮುಂದುವರಿದಿದ್ದು, 15 ಪ್ರಕರಣಗಳು ಅಲ್ಲಿಂದಲೇ ದೃಢಪಟ್ಟಿವೆ. ನಗರದಲ್ಲಿ 9 ಪಾಸಿಟಿವ್‌ ಪ್ರಕರಣದೃಢಪಟ್ಟರೆ, ಆರು ಪ್ರಕರಣ ಸಿಂಧನೂರಿನಲ್ಲಿ ದೃಢಪಟ್ಟಿವೆ. ಒಂದು ಸಿರವಾರ ಪಟ್ಟಣದಲ್ಲಿ ದೃಢಪಟ್ಟಿದೆ. ಅದರಲ್ಲೂ 15 ಪುರುಷರಿಗೆ ಸೋಂಕು ತಗುಲಿದರೆ, ಒಬ್ಬ ಮಹಿಳೆಗೆ ಸೋಂಕು ವಕ್ಕರಿಸಿದೆ. 9 ಪ್ರಕರಣಗಳ ಸಂಪರ್ಕ ಪತ್ತೆ ಹಚ್ಚಲಾಗುತ್ತಿದ್ದರೆ, ಆರು ಪ್ರಕರಣಗಳು ಪ್ರಾಥಮಿಕ ಸಂಪರ್ಕದಿಂದ ಹರಡಿವೆ.  ಇನ್ನೊಂದು ಐಎಲ್‌ಐ ಪ್ರಕರಣವಾಗಿದೆ.  ಎಲ್ಲರನ್ನು ಒಪೆಕ್‌ನ ಐಸೊಲೇಶನ್‌ ವಾರ್ಡ್‌ಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಜಿಲ್ಲಾಧಿಕಾರಿ ತಿಳಿಸಿದ್ದಾರೆ.

ಮಾದರಿ ಸಂಗ್ರಹಿಸದ ಆರೋಪ: ಮಾಣಿಕ್‌ ನಗರದ ಮಾಜಿ ಸೈನಿಕರೊಬ್ಬರು ಮೃತಪಟ್ಟಿದ್ದು, ಅವರಿಗೆ ಕೋವಿಡ್ ಪಾಸಿಟಿವ್‌ ಇದೆ ಎಂಬ ಕಾರಣಕ್ಕಾಗಿ ಶವವನ್ನು ಮನೆಯವರಿಗೆ ಕೊಡದೆ ಶವಸಂಸ್ಕಾರ ಮಾಡಲಾಗಿತ್ತು. ಆದರೆ, ಇವರ ಮನೆಯವರು ಈ ವಿಷಯ ತಿಳಿಯುತ್ತಿದ್ದಂತೆ ಸ್ವ ಇಚ್ಛೆಯಿಂದ ಕ್ವಾರೆಂಟೈನ್‌ಗೆ ಒಳಗಾಗಿದ್ದಾರೆ. ಆದರೂ ಆರೊಗ್ಯ ಇಲಾಖೆ ಸಿಬ್ಬಂದಿ ಈ ಮನೆಯವರ ಮಾದರಿ ಸಂಗ್ರಹಿಸಿಲ್ಲ. ಮನೆಯವರೇ ತಪಾಸಣೆ ಮಾಡುವಂತೆ ಕೇಳುತ್ತಿದ್ದರೂ ಸ್ಪಂದಿಸಿಲ್ಲ ಎಂದು ಕುಟುಂಬ ಸದಸ್ಯರು ದೂರಿದ್ದಾರೆ.