ವಿನಾಯಿತಿ ವೇಳೆ ಮಿತಿಮೀರಿದ ಓಡಾಟ

Team Udayavani, Apr 30, 2021, 4:04 PM IST

ರಾಯಚೂರು: ಕೊರೊನಾ ಕರ್ಫ್ಯೂ ಎರಡನೇ ದಿನವೂ ಜನ ಹೊರಗೆ ಬರುವುದನ್ನು ನಿಲ್ಲಿಸದ ಕಾರಣ ಪೊಲೀಸರು ಕಠಿಣ ಕ್ರಮ ಕೈಗೊಳ್ಳುವ ಮೂಲಕ ಎಚ್ಚರಿಕೆ ನೀಡಿದರು. ಅನಗತ್ಯವಾಗಿ ಓಡಾಡಿದ ಆಟೋಗಳನ್ನು ಸೀಜ್‌ ಮಾಡಿದರೆ, ಬೈಕ್‌ ಸವಾರರಿಗೆ ದಂಡದ ಬರೆ ಬಿದ್ದವು. ನಗರದ ಅಂಬೇಡ್ಕರ್‌ ವೃತ್ತದಲ್ಲಿ ಅಖಾಡಕ್ಕಿಳಿದ ಪೊಲೀಸರು ಪ್ರಯಾಣಿಕರಿಗೆ ಬಿಸಿ ಮುಟ್ಟಿಸಿದರು.

ಸುಖಾಸುಮ್ಮನೆ ಪ್ರಯಾಣಿಕರನ್ನು ಹೊತ್ತೂಯ್ಯುತ್ತಿದ್ದ ಆಟೋಗಳನ್ನು ವಶಕ್ಕೆ ಪಡೆದರು. ಈ ವೇಳೆ ಆಟೋ ಚಾಲಕರು ಪೊಲೀಸರ ಜತೆ ವಾಗ್ವಾದಕ್ಕಿಳಿದ ಪ್ರಸಂಗ ಕೂಡ ನಡೆಯಿತು. ಪ್ರಯಾಣಿಕರನ್ನು ಕರೆದೊಯ್ಯಲು, ತುರ್ತು ಕೆಲಸಕ್ಕೆ ಕರೆದೊಯ್ಯಲು ಅವಕಾಶ ನೀಡಲಾಗಿದೆ. ಹೀಗಾಗಿ ಆಟೋ ಓಡಿಸುತ್ತಿದ್ದೇವೆ ಎಂದು ಚಾಲಕರು ತಿಳಿಸಿದರು.

ಆದರೆ, ತುರ್ತು ಸಂದರ್ಭದಲ್ಲಿ ಮಾತ್ರ ಕರೆದೊಯ್ಯಬೇಕು. ಅದಕ್ಕೂ ದಾಖಲೆ ನೀಡಬೇಕು. ಹೀಗೆ ಹಗಲಿರುಳು ಓಡಾಡಲು ಅವಕಾಶ ಇಲ್ಲ ಎಂದು ಪೊಲೀಸರು ಪ್ರತಿ ಆಟೋಕ್ಕೆ 500 ದಂಡ ವಿ ಧಿಸಿದರು. ಅಲ್ಲದೇ, ಮತ್ತೆ ಇದು ಮರುಕಳಿಸಿದರೆ, ಆಟೋಗಳನ್ನು ಸೀಜ್‌ ಮಾಡುವುದಾಗಿ ಎಚ್ಚರಿಸಿದರು. ಅನಗತ್ಯವಾಗಿ ಓಡಾಡಿದ ಬೈಕ್‌ ಸವಾರರಿಗೂ ಪೊಲೀಸರು ದಂಡದ ಬಿಸಿ ಮುಟ್ಟಿಸಿದರು. ಅಗತ್ಯ ವಸ್ತುಗಳ ಖರೀದಿಗೆ ಬೆಳಗ್ಗೆ 6ರಿಂದ 10 ಗಂಟೆವರೆಗೆ ನೀಡಿದ ವಿನಾಯಿತಿ ವೇಳೆಯ ಜನರ ಓಡಾಟ ಹೆಚ್ಚಾಗುತ್ತಿದೆ. ಈ ವೇಳೆ ಯಾರನ್ನು ತಡೆಯುವ ಗೋಜಿಗೆ ಹೋಗದ ಪೊಲೀಸರು 10 ಗಂಟೆ ನಂತರವೇ ಜನರನ್ನು ಚದುರಿಸಲು ಮುಂದಾಗುತ್ತಿದ್ದಾರೆ. ಇದರಿಂದ ವಿನಾಯಿತಿ ಸಮಯ 10ರಿಂದ 11 ಗಂಟೆವರೆಗೂ ಹೋಗುತ್ತಿದೆ.

ತೀರ ಅನಿವಾರ್ಯದ ಕೆಲಸಗಳಿಗೆ ಮಾತ್ರ ಹೊರಬರುವಂತೆ ತಿಳಿಸಿದಾಗ್ಯೂ ತೆರೆಮರೆಯಲ್ಲಿ ಎಲ್ಲ ರೀತಿಯ ವಹಿವಾಟು ನಡೆಯುತ್ತಿದೆ. ಅರ್ಧ ಶೆಟರ್‌ ತೆಗೆದು ವ್ಯಾಪಾರ-ವಹಿವಾಟು ನಡೆಸುವವರ ಸಂಖ್ಯೆ ಹೆಚ್ಚಾಗಿದೆ. ಈಗಾಗಲೇ ಕೆಲ ಅಂಗಡಿಗಳ ಮಾಲೀಕರ ವಿರುದ್ಧ ಪ್ರಕರಣ ಬೇರೆಯವರು ಎಚ್ಚೆತ್ತಂತೆ ಕಾಣಿಸುತ್ತಿಲ್ಲ. ತರಕಾರಿ ಮಾರುಕಟ್ಟೆ, ಹೂ ಹಣ್ಣು, ದಿನಸಿ, ಪಟೇಲ್‌ ರಸ್ತೆ ಸೇರಿದಂತೆ ಇತರ ಕಡೆ ಬೆಳಗ್ಗೆ ಜನಸಂಚಾರ ಹೆಚ್ಚಾಗಿತ್ತು. ಗ್ರಾಮೀಣ ಭಾಗದ ಜನ ಕೂಡ ಬೆಳ್ಳಂಬೆಳಗ್ಗೆಯೇ ನಗರಗಳತ್ತ ಮುಖ ಮಾಡುತ್ತಿದ್ದು, 10 ಗಂಟೆಗೆಲ್ಲ ಕೆಲಸ ಮುಗಿಸಿಕೊಂಡು ಹಿಂದಿರುಗುತ್ತಿದ್ದಾರೆ.

ಕಚೇರಿ ಕೆಲಸಗಳು ಎಂದಿನಂತೆ ನಡೆಯುತ್ತಿದ್ದರೂ ಪೊಲೀಸರಿಗೆ ಸೂಕ್ತ ದಾಖಲೆ ನೀಡಬೇಕಿರುವ ಕಾರಣ ಜನ ಬರಲು ಹಿಂದೇಟು ಹಾಕುತ್ತಿದ್ದಾರೆ. ಇದರಿಂದ ಬಹುತೇಕ ಸರ್ಕಾರಿ ಕಚೇರಿಗಳು ಜನರಿಲ್ಲದೇ ಭಣ ಭಣ ಎನ್ನುತ್ತಿವೆ.