ಕೊಟ್ಟಿಗೆ ಗೊಬ್ಬರಕ್ಕೆ ಭಾರೀ ಬೇಡಿಕೆ

Team Udayavani, May 19, 2022, 5:27 PM IST

ಮುದಗಲ್ಲ: ಪಟ್ಟಣ ಸೇರಿದಂತೆ ಸುತ್ತಲಿನ ಭಾಗದಲ್ಲಿ ಕೊಟ್ಟಿಗೆ(ತಿಪ್ಪೆ)ಗೊಬ್ಬರಕ್ಕೆ ಭಾರೀ ಬೇಡಿಕೆ ಬಂದಿದೆ. ತಾಲೂಕಿನಲ್ಲಿ ಕಾಲುವೆ, ಕೊಳವೆ ಬಾವಿ-ತೆರೆದ ಬಾವಿ, ಕೆರೆ-ಕುಂಟೆ, ಹಳ್ಳ-ಕೊಳ್ಳಗಳಲ್ಲಿನ ನೀರು ಉಪಯೋಗಿಸಿ ಕೊಂಡು ತೋಟ, ಗದ್ದೆ ಮಾಡಿ ವ್ಯವಸಾಯ ಮಾಡುವ ಇಲ್ಲಿಯ ರೈತರು ರಾಸಾಯನಿಕ ಗೊಬ್ಬರ ಬಳಸುತ್ತಿದ್ದರು ಇದರಿಂದ ಈ ಭಾಗದ ಶೇ.36 ಜಮೀನು ಬರಡಾಗಿ ಬಿತ್ತಿದ ಪೈರು ಬೆಳೆಯದಂತಾಗಿತ್ತು. ಇದನ್ನು ಮನಗಂಡ ಇಲ್ಲಿಯ ರೈತರು ಈಗ ಕೊಟ್ಟಿಗೆ ಗೊಬ್ಬರಕ್ಕೆ ಮರಳಿ ಮಾರು ಹೋಗಿದ್ದಾರೆ.

ಸಾವಯವ ಕೃಷಿ ಹಾಗೂ ತೋಟದ ಪದ್ಧತಿಯನ್ನು ಅನುಸರಿಸುತ್ತಿದ್ದಾರೆ. ಹಳ್ಳಿಗಾಡಿನಲ್ಲಿ ಈಗ ಜಾನುವಾರುಗಳ ಸಂಖ್ಯೆಯೂ ಕಡಿಮೆಯಾಗಿದ್ದರಿಂದ ಕೊಟ್ಟಿಗೆ ಗೊಬ್ಬರ ಸಂಗ್ರಹ ಕಡಿಮೆಯಾಗಿದೆ. ಖರೀದಿಸುವವರ ಸಂಖ್ಯೆ ಹೆಚ್ಚಾಗಿದ್ದರಿಂದ ತಿಪ್ಪೆ ಗೊಬ್ಬರಕ್ಕೆ ಭಾರಿ ಡಿಮ್ಯಾಂಡ್‌ ಬಂದು ಬೇಡಿಕೆ ಹೆಚ್ಚಾಗಿದೆ.

5000 ದಿಂದ 6000: ಸದ್ಯ ಕೊಟ್ಟಿಗೆ ಗೊಬ್ಬರದ ಬೆಲೆ ಗಗನಕ್ಕೇರಿದೆ. ಒಂದು ಟ್ರ್ಯಾಕ್ಟರಿಗೆ 5000ರಿಂದ 6500 ವರೆಗೂ ಖರೀದಿಸಲಾಗುತ್ತಿದೆ. ಹಣದ ಅವಶ್ಯಕತೆ ಇರುವ ಬಡ ರೈತರು, ಜಮೀನು ಇಲ್ಲದ ಕೂಲಿಕಾರರು ಕೊಟ್ಟಿಗೆ ಗೊಬ್ಬರ ಮಾರುತ್ತಿದ್ದಾರೆ.

ಕೆಲವರ ಭೂಮಿಗಳಿಗೆ ಹೆಚ್ಚಾಗಿ ರಾಸಾಯನಿಕ ಗೊಬ್ಬರ ಬಳಸಿದ್ದರಿಂದ ಭೂಮಿ ಸವಳಾಗಿದೆ. ಮೊದಲಿಗೆ ಉತ್ತಮ ಫಸಲು ಬರುತಿತ್ತು ಆದರೆ ಈಗ ಕಾಲಕಳೆದಂತೆ ಜಮೀನು ಸವಳಾಗುತ್ತ ಸಾಗಿದೆ. ನಾಗರಾಳ, ಬೊಮ್ಮನಾಳ, ನರಕಲದಿನ್ನಿ, ಆನಾಹೂಸೂರ, ನವಲಿ, ಜಾಗೀರನಂದಿಹಾಳ, ಭೋಗಾಪೂರ, ನೀರಲಕೇರಿ, ಈಚನಾಳ, ರೋಡಲಬಂಡ, ಜಾವೂರ, ಜೂಲಗುಡ್ಡ ಸೇರಿದಂತೆ ತಾಲೂಕಿನ ನೂರಾರು ಗ್ರಾಮಗಳ ಜಮೀನು ಸವಳಾಗಿ ಮಾರ್ಪಟ್ಟಿದೆ.

ಖರ್ಚು ಮಾಡಿ ಬಿತ್ತಿದ ಬೀಜದ ಅಸಲು ಬರುತ್ತಿಲ್ಲ. ಸವಳು ಜಮೀನನ್ನು ಮೂಲ ರೂಪಕ್ಕೆ ತರಲು ಫಸಲು ಚೆನ್ನಾಗಿ ಬೆಳೆಯಲು ರೈತರು ಈಗ ಕೊಟ್ಟಿಗೆ ಗೊಬ್ಬರದ ಮೊರೆ ಹೋಗಿದ್ದಾರೆ. ತಿಪ್ಪೆ ಗೊಬ್ಬರದ ಹಿಂದೆ ದುಂಬಾಲು ಬಿದ್ದಿರುವ ರೈತರು ದೂರದ ಊರುಗಳಿಂದ ಹೆಚ್ಚಿಗೆ ಹಣ ನೀಡಿ ಗೊಬ್ಬರ ಖರೀದಿಸುತ್ತಿದ್ದಾರೆ.

ದೇವಪ್ಪ ರಾಠೋಡ