ರಾಯಚೂರು 8ನೇ ವಾರ್ಡ್‌ನಲ್ಲಿ ಮತ್ತೆ ಜೆಡಿಎಸ್‌ ಗೆಲುವು

Team Udayavani, Apr 1, 2021, 6:41 PM IST

ರಾಯಚೂರು: ನಗರಸಭೆಯ 8ನೇ ವಾರ್ಡ್ ನಲ್ಲಿ ಜೆಡಿಎಸ್‌ ಸದಸ್ಯನಿಂದ ತೆರವಾಗಿದ್ದ ಸ್ಥಾನಕ್ಕೆ ನಡೆದ ಚುನಾವಣೆಯಲ್ಲಿ ಮತ್ತೆ ಜೆಡಿಎಸ್ ಗೆಲುವಿನ ನಗೆ ಬೀರಿದೆ. ಅನುಕಂಪದ ಅಲೆ ಕೆಲಸ ಮಾಡಿದ್ದು, ಮೃತ ಸದಸ್ಯನ ಪತ್ನಿಗೆ ಗೆಲುವಿನ ಮಾಲೆ ದಕ್ಕಿದೆ.

ಜೆಡಿಎಸ್‌ ಅಭ್ಯರ್ಥಿ ನಿಖತ್‌ ಸಲ್ಮಾ 406 ಮತಗಳ ಅಂತರಗಳಿಂದ ಗೆಲುವು ತಮ್ಮದಾಗಿಸಿಕೊಂಡಿದ್ದಾರೆ. ನಗರದ ತಹಸೀಲ್ ಕಚೇರಿಯಲ್ಲಿ ಬುಧವಾರ ಮತ ಎಣಿಕೆ ಪ್ರಕ್ರಿಯೆ ನಡೆಯಿತು. ಜೆಡಿಎಸ್‌ ಪಕ್ಷದ ಅಭ್ಯರ್ಥಿ ನಿಖತ್‌ ಸಲ್ಮಾ ಅವರು 1224 ಮತ ಪಡೆದರೆ, ಕಾಂಗ್ರೆಸ್‌ ಅಭ್ಯರ್ಥಿ ಸೈಯ್ಯದ್‌ ಶಂಶುದ್ದೀನ್ 818 ಮತ ಪಡೆದು ಪರಾಭವಗೊಂಡಿದ್ದಾರೆ.

ಎಸ್‌ಡಿಪಿಐ ಪಕ್ಷದ ಅಭ್ಯರ್ಥಿ ಮಹ್ಮದ್ ಗೌಸ್‌ ಮೊಹಿನುದ್ದೀನ್‌ 153, ಪಕ್ಷೇತರ ಅಭ್ಯರ್ಥಿಗಳಾದ ನಜೀಮಾ ಬೇಂಗ ಅವರು 355, ಮಹ್ಮದ್‌ ನೂರ್‌ 345, ಮಹ್ಮದ್‌ ಶರೀಫ್‌ 36 ಮತಗಳನ್ನು ಪಡೆದುಕೊಂಡಿದ್ದಾರೆ. ಮೂರು ನೋಟಾ ಮತ ಚಲಾವಣೆಗೊಂಡಿವೆ. ಮಾ.29ರಂದು ಉಪಚುನಾವಣೆ ನಡೆದಿತ್ತು. ಬೆಳಗ್ಗೆ 8 ಗಂಟೆಯಿಂದಲೇ ಮತ ಎಣಿಕೆ ಕಾರ್ಯ ಶುರುವಾಯಿತು. ಮಧ್ಯಾಹ್ನ 11 ಗಂಟೆಗೆಲ್ಲ ಗೆಲುವು ಪ್ರಕಟಿಸಲಾಯಿತು. ವಾರ್ಡ್‌ನಲ್ಲಿ ಕಾರ್ಯಕರ್ತರು, ಪಟಾಕಿ ಸಿಡಿಸುವ ಮೂಲಕ ಸಂಭ್ರಮಾಚರಣೆ ಮಾಡಿದರು.

ಅಲ್ಪಸಂಖ್ಯಾತರೇ ಹೆಚ್ಚಾಗಿರುವ ಈ ವಾರ್ಡ್ ನಲ್ಲಿ ಕಾಂಗ್ರೆಸ್‌ಗೂ ಗೆಲ್ಲುವ ಅವಕಾಶಗಳಿದ್ದವು. ಆದರೆ, ಆಂತರಿಕ ಭಿನ್ನಮತದಿಂದ ಗೆಲುವು ಕೈ ತಪ್ಪಿದೆ ಎಂಬ ಮಾತು ಒಂದೆಡೆಯಾದರೆ, ಜೆಡಿಎಸ್‌ ಅಭ್ಯರ್ಥಿಗೆ ಅನುಕಂಪದ ಅಲೆ ಜೋರಾಗಿ ಕೆಲಸ ಮಾಡಿದೆ ಎನ್ನಲಾಗುತ್ತಿದೆ. ಇನ್ನೂ ಜೆಡಿಎಸ್‌ನಿಂದ ಜಿಲ್ಲೆಯ ಇಬ್ಬರು ಶಾಸಕರು ಮನೆ-ಮನೆ ಪ್ರಚಾರ ನಡೆಸುವ ಮೂಲಕ ಮತಬೇಟೆ ಮಾಡಿದ್ದು, ಫಲ ನೀಡಿದೆ. ಗೆಲುವು ಸಾಧಿಸಿದ ಜೆಡಿಎಸ್‌ ಅಭ್ಯರ್ಥಿಗೆ ಚುನಾವಣಾಧಿಕಾರಿ ಡಾ| ಟಿ.ರೋಣಿ ಪ್ರಮಾಣ ಪತ್ರ ನೀಡಿದರು. ಪಕ್ಷದ ಕಾರ್ಯಕರ್ತರು, ಮುಖಂಡರು ಸ್ಥಳದಲ್ಲಿಯೇ ಪರಸ್ಪರ ಸಿಹಿ ಹಂಚಿ ಸಂಭ್ರಮಿಸಿದರು.

ಬಿಜೆಪಿ ಜಾಣ ನಡೆ
ನಗರಸಭೆಯಲ್ಲಿ ಈಗಾಗಲೇ ಕಾಂಗ್ರೆಸ್ ಚುಕ್ಕಾಣಿ ಹಿಡಿದಿದೆ. ಮತ್ತೂಂದೆಡೆ 8ನೇ ವಾರ್ಡ್‌ನಲ್ಲಿ ಅಲ್ಪಸಂಖ್ಯಾತರ ಪ್ರಾಬಲ್ಯ ಇದೆ. ಅದರ ಜತೆಗೆ ಸದಸ್ಯನ ಅಕಾಲಿಕ ಮರಣದಿಂದ ಅನುಕಂಪದ ಅಲೆಯೂ ಜೋರಾಗಿತ್ತು. ಈ ಎಲ್ಲ ಲೆಕ್ಕಾಚಾರಗಳನ್ನು ಹಾಕಿಕೊಂಡು ಬಿಜೆಪಿ ನಾಯಕರು ವಾಡ್ ನಲ್ಲಿ ಅಭ್ಯರ್ಥಿಯನ್ನು ಕಣಕ್ಕಿಳಿಸದೆ ಜಾಣ ನಡೆ ಪ್ರದರ್ಶಿಸಿತು. ಆದರೆ, ನಗರದಲ್ಲಿ ಪ್ರಾಬ್ಲಿಯ ಹೊಂದಿದ್ದು, ಅಧಿಕಾರ ಚುಕ್ಕಾಣಿ ಹಿಡಿದಿರುವ ಕಾಂಗ್ರೆಸ್‌ಗೆ ಗೆಲ್ಲುವ ಅವಕಾಶಗಳಿದ್ದರೂ ಸರಿಯಾಗಿ ಪ್ರಚಾರ ಕೈಗೊಳ್ಳದೆ ಸೋಲೊಪ್ಪಿಕೊಂಡಿದೆ. ಜೆಡಿಎಸ್‌ನಿಂದ ತೆರವಾದ ಸ್ಥಾನ ಜೆಡಿಎಸ್ ತೆಕ್ಕೆಗೆ ಬಂದಿರುವುದರಿಂದ ನಗರಸಭೆ ಆಡಳಿತದಲ್ಲಿ ಭಾರೀ ಬದಲಾವಣೆಗೆ ಕಾರಣವಾಗಿಲ್ಲ.

ಜೆಡಿಎಸ್‌ ಪಕ್ಷದ ಪದಾಧಿಕಾರಿಗಳು, ಮುಖಂಡರು ನಮ್ಮ ಕುಟುಂಬದ ಮೇಲಿಟ್ಟಿರುವ ಅಭಿಮಾನಕ್ಕೆ ಮಾತೇ ಬರುತ್ತಿಲ್ಲ. ಎಲ್ಲರಿಗೂ ನಾನು ಕೃತ್ಯಜ್ಞಳಾಗಿದ್ದೇವೆ. ಈ ಗೆಲುವು ಕೇವಲ ನನ್ನ ಗೆಲುವು ಆಗಿಲ್ಲ. 8ನೇ ವಾರ್ಡ್‌ ಮತದಾರರು ಹಾಗೂ ಜೆಡಿಎಸ್‌ ಪಕ್ಷದ ಪ್ರತಿ ಕಾರ್ಯಕರ್ತರ ಗೆಲುವಾಗಿದೆ.
ನಿಖತ್‌ ಸಲ್ಮಾ, ನೂತನ ನಗರಸಭೆ ಸದಸ್ಯೆ