ಸಾಹಿತ್ಯಕ್ಕಿದೆ ಸಮಾಜ ಪರಿವರ್ತನೆ ಶಕ್ತಿ

Team Udayavani, Mar 5, 2018, 4:56 PM IST

ಮುದಗಲ್ಲ: ದೇಶ ಮತ್ತು ಸಮಾಜ ಪರಿವರ್ತನೆ ಶಕ್ತಿ ಸಾಹಿತ್ಯಕ್ಕಿದೆ ಎಂದು ಸಾಹಿತಿ ಹಾಗೂ ರಂಗಕರ್ಮಿ ಖಾಜಾವಲಿ ಈಚನಾಳ ಹೇಳಿದರು.

ಬೆಂಗಳೂರು ಕನ್ನಡ ಪುಸ್ತಕ ಪ್ರಾಧಿಕಾರ ಹಾಗೂ ನಾಗರಾಳ ಸಜ್ಜಲಶ್ರೀ ಕಲಾ ಪದವಿ ಮಹಾವಿದ್ಯಾಲಯದ ಆಶ್ರಯದಲ್ಲಿ ಸಮೀಪದ ನಾಗರಾಳ ಗ್ರಾಮದಲ್ಲಿ ಏರ್ಪಡಿಸಿದ್ದ ಹಿರಿಯ ಸಾಹಿತಿಗಳೊಂದಿಗೆ ಸಂವಾದ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು. ಸಾಹಿತಿಗಳು ಸಮಾಜದಲ್ಲಿ ನಡೆಯುವ ಕೆಟ್ಟ ಘಟನೆಗಳನ್ನು ತಮ್ಮ ಕಾವ್ಯ, ಕಥೆ, ಕಾದಂಬರಿ ಮೂಲಕ ಕಟ್ಟಿಕೊಟ್ಟು ಆರೋಗ್ಯಕರ ಸಮಾಜ ನಿರ್ಮಾಣ ಮಾಡುತ್ತಾರೆ. ವಿದ್ಯಾರ್ಥಿ ಸತತ ಅಭ್ಯಾಸ ಮಾಡುವ ಜೊತೆಗೆ ಸಾಹಿತ್ಯದಲ್ಲಿ ಆಸಕ್ತಿ ಬೆಳೆಸಿಕೊಂಡು ಬರವಣಿಗೆ ರೂಢಿಸಿಕೊಳ್ಳಬೇಕು. ಕಥೆಗಾರ, ಕವಿ, ಕಾದಂಬರಿಕಾರರಾಗಿ ಬೇಳೆಯಬೇಕು ಎಂದರು.

ವಿದ್ಯಾರ್ಥಿಗಳು ಕಾವ್ಯ, ಕಥೆ, ಕಾದಂಬರಿ ರಚನೆ, ವಸ್ತು, ಪಾತ್ರ, ಸಾಹಿತಿಗಳ ಗುಣಲಕ್ಷಣ ಸೇರಿ ವಿವಿಧ ವಿಷಯಗಳ ಕುರಿತು ಪ್ರಶ್ನೆಕೇಳಿದರು ಸಾಹಿತಿಗಳಿಂದ ಉತ್ತರ ಪಡೆದರು. ಸಾಹಿತಿಗಳಾದ ರಹಿಮಾನ್‌ ಮುಲ್ಲಾ, ಗವಿಸಿದ್ದಪ್ಪ ಗುರಿಕಾರ, ಖೈರವಾಡಗಿ ಪ್ರೌಢಶಾಲೆ ಮುಖ್ಯಶಿಕ್ಷಕ ಕೃಷ್ಣ ಮುಳ್ಳೂರು, ಶಿಕ್ಷಕರಾದ ಚಂದ್ರಶೇಖರ, ಸಜ್ಜಲಶ್ರೀ ಕಲಾ ಪದವಿ ಮಹಾವಿದ್ಯಾಲಯ ಉಪನ್ಯಾಸಕ ಇಸ್ಮಾಯಿಲ್‌ ಖಾದ್ರಿ, ಚಂದ್ರಶೇಖರ ವ್ಯಾಕರನಾಳ ಮಾತನಾಡಿದರು. ಯಂಕಪ್ಪ ಕೆಲ್ಲೂರು, ಶಾಂತಮ್ಮ ತೋಟದ, ಹನುಮೇಶ ಗೌಡರ ಇದ್ದರು.