ಸಾಮೂಹಿಕ ವಿವಾಹಗಳಿಂದ ಸಾಮಾಜಿಕ ಸಾಮರಸ್ಯ

Team Udayavani, Jul 26, 2017, 1:16 PM IST

ಸಿಂಧನೂರು: ಸಾಮೂಹಿಕ ವಿವಾಹಗಳಿಂದ ಸಮಾಜದಲ್ಲಿ ಸಾಮರಸ್ಯ ಹೆಚ್ಚುತ್ತದೆ ಎಂದು ಮಾಜಿ ಸಂಸದ ಕೆ.ವಿರೂಪಾಕ್ಷಪ್ಪ ಹೇಳಿದರು.

ತಾಲೂಕಿನ ಕಲ್ಲೂರು ಗ್ರಾಮದಲ್ಲಿ ಶ್ರೀ ಸೊನ್ನಲಿಗ ಶಿವಯೋಗಿ ಸಿದ್ಧರಾಮೇಶ್ವರ 4ನೇ ವರ್ಷದ ಜಾತ್ರೆ ನಿಮಿತ್ತ ಆಯೋಜಿಸಿದ್ದ
ಸಾಮೂಹಿಕ ವಿವಾಹ ಸಮಾರಂಭದಲ್ಲಿ ಅವರು ಮಾತನಾಡಿದರು. ರಾಜ್ಯದಲ್ಲಿ ತೀವ್ರ ಬರಗಾಲ ಉಂಟಾಗಿದೆ. ಕುಡಿಯುವ ನೀರು, ಮೇವಿಗಾಗಿ ಪರದಾಟ ನಡೆದಿದೆ. ಕಷ್ಟ-ನೋವುಗಳು ಏನೇ ಇದ್ದರೂ ಕೂಡ ದೇವರ ಜಾತ್ರೆ ಹೆಸರಿನಲ್ಲಿ ಭಕ್ತಿಯಿಂದ ಸಮರ್ಪಣೆ ಮಾಡಿಕೊಳ್ಳುತ್ತಾರೆ. ಪ್ರಸ್ತುತ ದಿನಗಳಲ್ಲಿ ಸಾಮೂಹಿಕ ವಿವಾಹ ಕಾರ್ಯಕ್ರಮಗಳು ಹೆಚ್ಚು ನಡೆಯುತ್ತಿರುವುದು ಸ್ವಾಗತಾರ್ಹ. ಶ್ರೀಮಂತರು-ಬಡವರು ಸೇರಿ ಸಾಮೂಹಿಕ ವಿವಾಹಗಳಲ್ಲಿ ಮದುವೆಯಾಗಬೇಕು. ಅಂದಾಗ ಸಮಾಜದಲ್ಲಿ ಭಾವೈಕ್ಯತೆ,
ಸಮಾನತೆ ಬೆಳೆಯುತ್ತದೆ ಎಂದರು. 

ಈ ಹಿಂದೆ ಸಾಲ ಮಾಡಿ ಮದುವೆ ಮಾಡುತ್ತಿದ್ದರು. ಸಾಲ ತೀರಿಸಲು ಅವರನ್ನೇ ಒತ್ತೆ ಇಡುತ್ತಿದ್ದರು. ಈಗ ಕಾಲ ಬದಲಾಗಿದೆ. ಆರ್ಥಿಕ ಹೊರೆ ತಗ್ಗಿಸಿಕೊಳ್ಳಲು ಸಾಮೂಹಿಕ ವಿವಾಹದಲ್ಲಿ ಮದುವೆಯಾಗುತ್ತಿರುವುದು ಉತ್ತಮ ಬೆಳವಣಿಗೆ ಎಂದರು. ಜಿಪಂ ಸದಸ್ಯ ಎನ್‌.ಶಿವನಗೌಡ ಗೊರೇಬಾಳ ಮಾತನಾಡಿ, ಹುಟ್ಟಿದ ಮನೆಯಿಂದ ಗಂಡನ ಮನಗೆ ಹೋದ ಮೇಲೆ ಹೆಣ್ಣು ಸಂಪೂರ್ಣ ಗೃಹಿಣಿಯಾಗಿ ಮಾರ್ಪಡುತ್ತಾಳೆ. ಹಲವಾರು ಜವಾಬ್ದಾರಿಗಳನ್ನು ಹೊತ್ತುಕೊಳ್ಳಬೇಕಾಗುತ್ತದೆ. ಸಂಸಾರವೆಂದರೆ ಅದು ಹಾಲು, ನೀರಿನಂತಿರಬೇಕು. ಹಾಲು   ಮಜ್ಜಿಗೆಯಾಗಬಾರದು. ಹಾಲಿನಲ್ಲಿ ಎಷ್ಟೇ ನೀರು ಬೆರೆಸಿದರೂ ಬೇರೆಯಾಗುವದಿಲ್ಲ.  ಆದರೆ ಮಜ್ಜಿಗೆಯೊಳಗೆ ನೀರು ಬೆರೆಸಿದರೆ ಮೇಲೆ ತೇಲುತ್ತದೆ. ಅತ್ತೆಯಂದಿರು ಸೊಸೆಯನ್ನು ಮಕ್ಕಳಂತೆ ಕಾಣಬೇಕು. ಸೊಸೆ ಅತ್ತೆಯನ್ನು ತಾಯಿಯಂತೆ ಕಂಡರೆ ಆ ಕುಟುಂಬ ಸುಖೀಯಾಗಲಿದೆ ಎಂದರು. 

ಸಾನಿಧ್ಯ ವಹಿಸಿದ್ದ ಇರಕಲ್‌ ಮಠದ ಶ್ರೀ ಬಸವಪ್ರಭು ಸ್ವಾಮೀಜಿ ವಧುವರರಿಗೆ ಆಶೀರ್ವದಿಸಿದರು. ಪಿಕಾರ್ಡ್‌ ಬ್ಯಾಂಕ್‌ ಅಧ್ಯಕ್ಷ ಎಂ.ದೊಡ್ಡಬಸವರಾಜ,  ಮುಖಂಡರಾದ ಅಭಿಷೇಕ ನಾಡಗೌಡ,  ಶಿವರೆಡ್ಡಿ ಕಲ್ಲೂರು, ಭೋವಿ ಸಮಾಜದ ಮುಖಂಡರಾದ ವೀರೇಶ ಸಿದ್ರಾಂಪುರ, ಮರಿಯಪ್ಪ ಬಂಡಿ, ಮುತ್ತಣ್ಣ ಹಸಮಕಲ್‌, ಡಾ| ರಾಘವೇಂದ್ರ ಸೋಮಲಾಪುರ, ಹನುಮಂತ ಹಂಚಿನಾಳ, ಕರಿಯಪ್ಪ,
ಗೋವಿಂದರಾಜ ಕಲ್ಲೂರು ಸೇರಿದಂತೆ ಅನೇಕರು ಭಾಗವಹಿಸಿದ್ದರು.